Rôm̃i 18

1Isam̃u yiṉo vya, alubwi Pol avila gw’Atèn, aṽya gô Kôrinti. 2N’alèngi yè vovo mw’Iju, ini nyè ne Akilas, ayanyô gô Pontus, aliwô apili gw’Italya n’ômwantô wè Prisila, konde nè, Klôdyon aliwô azômbyi nè, Iju sôdu si ga lubwe avila gô Rôma. N’aṽyeṉi Pol gôre waô; 3na gô re nè, avegagi na waô eṽilô emô, alwaṉi na waô ayanja vovo, konde eṽilô zaô z’avegagi gô pang’inagô s’akuku.

4Agambagi Pol gô nagô yi soṉo soṉo edu, aṽela gô pang’Iju ni Grèk gô jivira. 5Ndô gw’aṽyeṉi Silas ni Timôte avila gô Makedônya, Pol aveṉi ôkuṽi wè gw’igamba, ntankilyaga gôr’Iju inè, Yesu ayè ne Krist. 6Na gw’aziri waô igamba aroṽa nyô, Pol azug’ingoy sè, awulinya waô inè: Ntyiṉi yaṉi yi ga lwaṉe gô wônjô yaṉimè! My’are pupu. Avila vèṉo mi be kènda gôr’aṉongo. 7Na gw’alubwi yè avila vovo, age jingiṉi gô nagô y’ôṉôm̃e, ini nyè ne Yustus, ôma w’azaviṉag’Anyambyè, ni nagô yè y’avegagi dukizô pa ngu gô nagô yi soṉo. 8Krispus kè, ewônjô zi nagô yi soṉo, aṽekelyi Rerè ayè ni nagô yè yôdu. Ni Kôrinti awenge w’ayogyô Pol w’aṽekelyi kè, aṽatizô.

9Agambi Rerè ni Pol ôgwèra gô nyinô inè: Arya du, ndô gamba, ko alwaṉa dodo, 10konde my’are na wè, e zel’ôma be taly’ôgo gôre wè gô jeṉizo nkaza; gamba, konde my’are n’aṉag’awenge gô nkala yiṉo.

11N’alwaṉi yè vovo ômpum̃a n’agwèli ôrôṽa, nènjag’igamba ny’Anyambyè gôre Kôrinti.

12Gw’avegagi Galyon prôkonsul y’Akaya, Iju s’agum̃aṉi n’ôrèm̃’ômô gô sire Pol, aṽagè gô mbôra y’ijèkèlya, awulya inè: 13Ôṉôme wiṉo e bela gô pang’aṉaga gô saviṉ’Anyambyè ni mpoṉo yi re yi zele sokè n’ivanga. 14Ndô gw’arweṉi Pol pyèrè gô nunguṉ’ôgwaṉi wè, Galyon awuliny’Iju inè: Arwe nè, nyiṉo igamba ny’apekwa ge nyi janj’ôsam̃u ômbe, gavoṉo my’atô pôganyô ṉwè Iju; 15ndô j’adwaṉ’impaga g’ômwanja w’agamba, na g’ômwanja w’ana, na g’ômwanja w’ivangi nyaṉi, yoṉo ndagi yaṉimè: mi pa bela gô dwaṉ’ôyèkèli w’isam̃u mèyoṉo. 16N’azugi yè waô avila gw’eka z’ijèkèlya. 17N’agôti waôdu agôte Sostène, ewônjô zi nagô yi soṉo, awôle swaswo n’eka z’ijèkèlya, ndô Galyon e pa soziṉ’isam̃u mèyoṉo.

18N’arô dwaṉi Pol ôling’ôla gô Kôrinti. Vovo alèkizi yè awarerè ôjaṉi, agweṉa g’ôwatanga gô kènda gô Sirya ni Prisila n’Akilas w’agèndi na yè, n’azèngiṉi yè ewônjô zè gô Kenkreas, konde avegagi pangaṉa p’ômpangaṉô.

19N’aṽyeṉi waô gw’Efèsi, n’alèkizi Pol irangaṉô yè vovo. Ndô gw’ayingiṉi yè gô nagô yi soṉo, agambi n’Iju, 20n’aṽambyi waô yè gô dinga na waô vyagaṉô. Ndô e pa jivira, 21n’alèkizi yè waô ôjaṉi, awulya inè: Mi ko kènda gô fèti gô Yerusalèm. Mi be tô fwinya gôre ṉwè, j’Anyambyè ajivira. N’alubwi yè avila gw’Efèsi. 22Gw’avungi yè n’ôwatanga gô Sezare, aralwi yè gô Yerusalèm, n’ayè sanguṉa pe mandô, avyagaṉi yè gw’Antyok.

23Ayè dinga p’ôlingô wa kwè gw’Antyok, alubwi Pol avila vovo, avyagaṉa gô ntye yi Galati ni Frijya, njolizag’iṉèngi yôdu.

24Mw’Iju, ini nyè n’Apôlos, ayanyô gw’Alekisandrya, ôkambi w’ôma, n’imya gw’Irèndo, aṽyeṉi gw’Efèsi. 25Ôṉôm̃e wiṉo avegagi nènjô pa gô mpoṉo ya Rerè, n’avegagi yè ni mpyô g’ôrèm̃a, agambiṉaga ni nènjaga mbyambye g’ômwanja wi Yesu, ndô amyeṉi kaô ibatiza si Yôan. 26N’avakilyi yè gô kamba ni nkagandè gô nagô yi soṉo. Gw’ayogyô Akilas ni Prisila ayogo yè, w’awongi yè gôre waô, aṽènguṉè mpoṉo ya Rerè mbyambye vyagaṉô. 27Na gw’aṽeli yè gô pyagaṉa gw’Akaya, awarerè w’azindyi yè, arèndiṉ’iṉèngi gô bongè. Gw’aṽyeṉi yè, v’imèpiṉô s’Anyambyè, aṉunguṉi pôlô waô w’aliwô w’abekelyi; 28konde ageṽ’Iju ni ngulu gw’azô m’aṉaga, ntevaga gw’Irèndo inè, Yesu ne Krist.

Currently Selected:

Rôm̃i 18: MYE

Highlight

Copy