PALABURU 39

I Yusupu pai rongo mPotipa

39:1-23

1Pangkeni nto Sumaila i Yusupu ri tana Masiri, jela njairia nawali mpobalu ri Potipa, tadulako ncurodado i datu siʼa tadulako ntopojaga ri langkanae. 2#Pwn. 7:9 I Pue mantulungi i Yusupu painaka pura-pura tetalanya madago pewalinya. Siʼa maroo-roo ri banua mpuenya to Masiri setu. 3Nakita mpuenya i Pue mantulungi i Yusupu inceʼe painaka ri waʼa ntetala anu nawianaka madago pewalinya. 4Napokapuru i mPotipa i Yusupu painaka nasarumakamo mamporiokoi siʼa; inceʼe painaka i Yusupu nasarumakamo da mampasilolongani somborinya sangkani pai waʼa aga-aganya. 5Montepuʼu ungka ri tempo setu, ua kaʼi Yusupu ndadonco i mPue sombori nto Masiri setu pai mpengaya-ngaya anu napotumpu, madago anu ri raya banua madago anu ri jamaa. 6Mpengaya-ngaya anu napotumpu napesarumakaka ri Yusupu, pai i Potipa bareʼemo nanawa-nawakono pampasilolongani raya ncombori, jamo pangkoninya anu napasilolongani.

I Yusupu sambaʼa ngalitau anu madolidi. 7Lawi masaemo napamporaya-rayaka rongo i mPotipa i Yusupu, painaka nasale ngalitau setu da yore pai siʼa. 8Paikanya bareʼe napokono i Yusupu, pai natoʼoka siʼa, “Neʼe makodi rayami nyonya, sira i Potipa mampesarumakakamo pura-pura anua ri yaku. Sira bareʼemo manawa-nawa nunjaa anu ri raya banua seʼi. 9Ireʼi kuasaku pai kuasaa siwia kabangkenya. Bareʼemo reʼe anu bareʼe ndapesarumakaka ri yaku, banya mantoʼo komi nyonya. Ewambeʼi da pewalinya yaku da mangawianaka powia anu majaʼa setu pai da masalaa ri Pue Ala?” 10Sandeme-sandeme nakanarasi rongo i mPotipa i Yusupu, paikanya bareʼe napokono ngalitau setu da yore pai siʼa.

11Ri anu sandeme sindara mpesua i Yusupu ri raya banua da mangawianaka tetalanya, bareʼemo reʼe tau ntaninya njairia. 12Rongo mPotipa mangkekeni i Yusupu ri jubanya, nanoʼo natoʼoka, “Maʼimo takayore sangkani-ngkani.” Mebunde i Yusupu naleʼo lapa, nepa molonco ri sambalikunya, paikanya jubanya njau nakekeni mbeʼa setu. 13Pangkita rongo i mPotipa i Yusupu moloncomo pai jubanya napalaikamo, 14napeboomo waʼa ntoporiokonya natoʼoka tau seʼe, “Koisa ndipeole! To Ibarani anu nakeni langkaiku ri banua seʼi, mampetikodi kita. Siʼa mesua Ri lincuku da mangajaʼati yaku, paikanya mekiu yaku. 15Padongenya pekiuku molonco ri sambalikunya napalaika jubanya seʼi.” 16Nadika rongo i mPotipa juba setu da natujuka langkainya ane ratamo siʼa. 17Butu rata langkainya, liu-liu napauka langkainya anu tepewali setu, natoʼo, “To Ibarani anu nukeni ireʼi setu, mesua ri raya lincu da mangajaʼati yaku, 18Paikanya butu meboo yaku, molonco ri sambalikunya siʼa napalaikamo jubanya seʼi.” 19Maʼai kojo kasengke i mPotipa. 20Napesongkaka da naka maliga-liga ndasoko i Yusupu pai ndapapesua ri raya ntarunggu, njairia ndapangawunca waʼa ntau anu nahuku i datu. 21#Pwn. 7:9 Paikanya i Pue mantulungi i Yusupu pai bareʼe bali ndapampotowe siʼa, painaka napokapuru i ntadulako ntarunggu siʼa. 22Waʼa ntau anu ndatarunggu ntaninya, ndapesarumakakamo ri Yusupumo anu ndasarumaka mampasilolongani wuwunya waʼa ntetala ri raya ntarunggu setu. 23I tadulako ntarunggu bareʼemo mampasilolongani ngaya-ngaya anu roomo napesarumakaka ri Yusupu, maka i Pue anu mentulungi siʼa painaka mewali waʼa anu napotetalaka.

Currently Selected:

PALABURU 39: LAIPMF

Highlight

Copy