PALABURU 40

I Yusupu mamposoki pangipi waʼa ntau ri raya ntarunggu

40:1-23

1Bareʼe masae ungkalairia, reʼe radua toporioko i datu nto Masiri, inceʼemo toporioko panginu pai toporioko roti, mampowia sala ri datu. 2Inceʼe painaka majaʼa raya i datu ri toporioko radua setu, 3inceʼe painaka ndawunca ri tarunggu anu ri banua i ntadulako ntopojaga langkanae, ri kareʼe pantarunggu i Yusupu. 4Masae kalau ntau seʼe ri raya ntarunggu setu, pai tadulako ntarunggu langkanae setu mampesarumakaka ri Yusupu mampasilolongani tau seʼe.

5Ri anu sambengi toporioko panginu pai toporioko roti setu mangipi. Posoki mpangipi ntau seʼe bareʼe siwia. 6Bangke reme mowuro-wuro rata i Yusupu mampeole tau seʼe, nakita tau radua setu momondo-mondo masusa rayanya. 7Meoasi siʼa natoʼo, “Wenu komi kukita sandeme seʼi masusa rayami?”

8Mesono tau seʼe natoʼo, “Ingena mawengi kami mangipi, pai bereʼe anu maincani posokinya.”

Natoʼo i Yusupu, “Podo i Pue Ala anu da mampapaincanika tau posoki mpangipi. Koisa pepau pangipimu setu.”

9Natoʼo ntoporioko panginu, “Ri raya mpangipi setu kukita reʼe radua mpuʼu anggoro ri suaraku. 10Puʼu anggoro setu mopanga tatogo. Nepa montepuʼu pinca moira waʼa raʼanya setu, meboʼamo sesenya, nepa matasamo wuanya. 11Sindara setu yaku mangkekeni galasi mpanginu i datu, mewali kupupu wua anggoro setu nepa kupaa ri raya galasi i datu, nepa kukenika sira.”

12Natoʼo i Yusupu, “Ewaseʼi posokinya, Raʼanya anu tatogo setu inceʼe tatogo ndeme. 13Tatogo ndeme waseʼi i datu da malapasaka siko, sira bareʼemo mangkitanaka salamu pai da mampapewalili muni siko ri tetalamu owi. Siko da mampeporiokoka galasi mpanginu ri datu ewa i owi. 14Paikanya neʼe nukalingani ane madagomo katedikanakamu, tulungi parata ka i datu katedikanakaku, da naka yaku ndalapa ungka ri tarunggu seʼi. 15Maka kamonconya yaku seʼi owi podo ndapangangka ungka ri tana nto Ibarani ewanceʼe seʼe woʼu ri tana Masiri seʼi, bareʼe reʼe kupampowia jaʼa rantani ndawunca yaku ri raya ntarunggu.”

16Butu naincani ntoporioko roti posoki mpangipi ntoporioko panginu setu madago, mompau woʼu siʼa ri Yusupu natoʼo, “Yaku seʼe woʼu mangipi, yaku mangasuʼu karanji roti tatogo. 17Ri raya ngkaranji anu ri wawonya lau kukisi mpengaya-ngaya da gala i datu, paikanya rata waʼa ntonci mangkoni waʼa ngkukisi setu.”

18Natoʼo i Yusupu, “Ewanceʼi posokinya pangipi setu: Tatogo karanji setu posokinya tatogo ndeme. 19Tatogo ndeme waseʼi da napokau i datu tau da mampewoʼoki siko, nepa wata ngkoromu da ndaloeka ri kaju, da maʼi waʼa ntonci mangkoni sangamu.”

20Tatogo ndeme ungka njairia kono ri reme mpoharijadi i datu, napareʼe posusa bangke tila waʼa mpegawai. Nasongka tau da mampapesuwu i toporioko panginu pai toporioko roti ungka ri raya ntarunggu pai da ndakeni ri suara waʼa mpegawai langkanae. 21I Toporioko panginu ndapapewalili muni ri tetalanya owi. 22Paikanya i toporioko roti ndahuku mate. Pura-pura setu tepewali silulu pai nunjaa anu natoʼo i Yusupu. 23Paikanya i toporioko panginu setu bareʼe naendo i Yusupu. Manoto nakalinganimo kojo siʼa.

Currently Selected:

PALABURU 40: LAIPMF

Highlight

Copy