PALABURU 29
29
Kajela i Yako ri banua i Laba
29:1-14
1Napaliu i Yako pelinjanya njoĘĽu ri tondo mpebetea ntana KanaĘĽa. 2Tingkarasaka nakita sambaĘĽa tibubu ri tongo mpada, pai njau tatogo ntibura mbula pai bimba anu moyuku-yuku ri sorinya, waĘĽa mpinatuwu setu biasa ndapapanginu njairia. Tibubu setu ndapaloka pai watu bangke. 3Ane tepasambakamo waĘĽa mbula pai bimba njairia, da nayalimo waĘĽa nto pongkambi watu setu, nepa da ndapapanginu waĘĽa mbula pai bimba setu. Ane roo setu, da nawali dampo muni waĘĽa nto pongkambi tibubu setu.
4Nepa meoasi i Yako ri waʼa nto pongkambi anu njau njairia, “Ee bale, ungka ri mbeʼi komi seʼi?”
Mesono tau seʼe natoʼo, “Kami seʼi ungka ri Harani.”
5Meoasi woʼu i Yako natoʼo, “Bara ndiincani i Laba ana i Nahori?”
Mesono tau seʼe natoʼo, “Kaincani.”
6Meoasi woʼu i Yako natoʼo, “Ewambeʼi katedikanakaa?”
Mesono tau seʼe natoʼo, “Madago-dago.”
“Peolemo, setu maʼi ananya anu weʼa anu mampotoʼo i Raheli. Siʼa maʼi mangkeni waʼa mbula pai bimba mpapanya.”
7Natoʼo i Yako, “Ntongo ndatekapa reme, banyapa temponya da ndapampapesua mbula pai bimba ri raya bonconya, paikanya wenu painaka bareʼe ndipapanginu waʼa mpinatuwu setu nepa ndilapa da napangande woʼu ri pada?”
8Mesono tau seʼe natoʼo, “Nepa da kakoto mampapanginu waʼa bimba setu sangadi tepasambakamo pura-pura tibura waʼa bimba setu ireʼi pai roo ndaduli watu palo ntibubu setu.”
9Ntongo mompasimbaju i Yako pai tau seʼe, ratamo i Raheli pai tibura mbula pai bimbanya. 10Pangkita i Yako i Raheli sangkani pai tibura mpinatuwunya, njoʼumo i Yako ri tibubu setu, nepa naduli watu palo ntibubu setu, napapanginumo waʼa mpinatuwu setu. 11Roo setu natimosuki i Raheli naeki, nepa tumangi ua merata kamawo ndayanya. 12Natoʼoka i Raheli, “Yaku ana i Ribeka, tuaʼi mpapamu.”
Liu-liu molonco i Raheli ndeku ri banua mampatumbuka papanya anu mewali setu. 13Butu nadonge i Laba bambari kono i Yako, pinoananya setu, moloncomo siʼa njoʼu madadu, nepa napoyunu ndeku ri banuanya. Butu roo napau i Yako pura-pura katedikanakanya ri Laba, 14natoʼo i Laba, “Lawi monco, siko tinaku anu mosu kojo pai yaku.”
Maroo-roomo i Yako ri banua setu muntu-muntu sambuya.
Potetala i Yako ri Laba ua da mamporongo i Raheli pai Lea
29:15-30
15Ri anu sandeme natoʼo i Laba ri Yako, “Bareʼe sintinaja siko da motetala ri yaku podo malenge ngkabongo, ua kasikonya sambaʼa tinaku. Mewali sangkuja saromu anu da nuperapi ri yaku?”
16I Laba mampotumpu radua ananya weĘĽa; anu tukaka i Lea toĘĽonya, pai tuaĘĽinya i Raheli toĘĽonya. 17I Lea magaya matanya, paikanya i Raheli madolidi potari ngkoronya pai magaya lionya.
18I Yako metaka rayanya ri Raheli, inceʼe painaka nasonoka i Laba, “Yaku kupokono motetala ri raya anu papitu ntaʼu ane da ndiwai tama yaku da mamporongo i Raheli.”
19Natoʼo i Laba, “Sangkadagonya yau ane siʼa kuwaika siko, painaka podo da tau ntaninya; mewali karoo-roomo ireʼi.” 20Motetalamo kojo i Yako ri raya anu papitu ntaʼu da napaleʼo mamporongo i Raheli, paepe i Yako tempo anu motaʼu-taʼu setu podo ewa sandemeja kasaenya, ua napampomawo anaweʼa setu.
21Pusamo papitu ntaʼu setu natoʼo i Yako ri Laba, “Mewali seʼi pusamo papitu ntaʼu; mewali da ndiwaimo yaku mamporongo anami tama.” 22Inceʼe painaka napowiamo i Laba posusa mpopawawa, napeboo pura-pura tau ri kota setu. 23Paikanya ri wengi setu, banya i Raheli paikanya i Lea anu nawawa i Laba ri Yako, pai yoremo i Yako pai siʼa. (24Nawai i Laba anamayunya anu weʼa i Silipa da napoanamayunu i Lea.) 25Bangke reme nepa naincani i Yako kaʼi Leanya anu naporongo. Inceʼe painaka njoʼu i Yako ri Laba, natoʼo, “Wenu tama painaka ndipowia yaku ewanceʼi? Ara banya potetalaku setu ua da mamporongo i Raheli? Wenu painaka komi tama mantengosi yaku?”
26Mesono i Laba natoʼo, “Malulu ada ireʼi, anu tuaʼi bareʼe maya molangkai ane bareʼepa molangkai anu tukaka. 27Popeamo nakapusa eo mposusa pitu ndeme, nepa kuwaika woʼu siko i Raheli, podoia nupokono da motetala woʼu ri raya anu papitu ntaʼu.”
28Nasintuwunaka i Yako, pusa papitu ndeme nawaimo i Laba i Raheli naporongo i Yako. (29Nawai i Laba anamayununya anu weĘĽa i Bila da napoanamayunu i Raheli.) 30Naporongomo i Yako i Raheli woĘĽu, pai lawi i Raheli anu maruu napampomawo painaka i Lea. Ungkalairia motetala woĘĽu siĘĽa ri raya anu papitu ntaĘĽu.
WaĘĽa ana i Yako
29:31–30:24
31Butu ndakita i mPue i Lea bareʼe ntani napomawo ewa i Raheli, inceʼe painaka i Lea ndawai i mPue moana, paikanya i Raheli bareʼe moana. 32Manee koro i Lea nepa napoana sambaʼa ana tuama. Natoʼo, “I Pue mangkita kapari ndayaku, pai seʼi-seʼi langkaiku da mampomawomo yaku.” Nepa napapotoʼoka ananya setu i Rube. 33Manee woʼu koro i Lea nepa napoana woʼu sambaʼa ana tuama. Natoʼo i Lea, “I Pue mangawaimo woʼu ananggodi seʼi ri yaku, maka ndadongemo yaku bareʼe napomawo.” Nepa napapotoʼoka ananya setu i Simeo. 34Manee woʼu koro i Lea, napoana woʼu sambaʼa ana tuama. Natoʼo, “Seʼi-seʼi langkaiku da metakamo rayanya ri yaku, maka yaku mampoanamo tatogo ana tuama.” Nepa napapotoʼoka ananya setu i Lewi. 35Ungkalairia manee woʼu koro i Lea pai napoana woʼu sambaʼa ana tuama. Natoʼo, “Sangkani seʼi yaku da mangaunde i Pue.” Nepa napapotoʼoka ananya setu i Yahuda. Roo inceʼe bareʼemo moana i Lea.
Currently Selected:
PALABURU 29: LAIPMF
Highlight
Share
Copy
Want to have your highlights saved across all your devices? Sign up or sign in
