PALABURU 27
27
I Saki madonco i Yako
27:1-29
1Ri anu sandeme, ri tempo ngkamatuʼamo i Saki pai butamo woʼu matanya, napeboomo i Esau, ananya anu tukaka, nepa natoʼoka siʼa, “Anaku!”
Mesono i Esau natoʼo, “Seʼi yaku papa!”
2Natoʼo i Saki, “Nuincanimo anaku yaku seʼi matuʼamo pai bara bareʼemo masae da katuwuku. 3Mewali timamo gorosi mpanamu pai waʼa mata mpanamu, palaimo mangelasi kaku sambaʼa pinatuwu ri pada. 4Poapumo mawongi-wonginya ewa pepokonoku, nepa da nukenika yaku. Ane roomo kukoni, nepa da kudonco siko ri kabareʼepanya mate yaku.”
5Pompasimbaju i Saki pai i Esau setu nadonge-donge i Ribeka. Inceʼe painaka butu tepalaimo i Esau mangela, 6natoʼo i Ribeka ri Yako, “Nepa roo pinca kudonge natoʼo mpapamu ri Esau, ewaseʼi, 7‘Pangelasimo sambaʼa pinatuwu pai poapumo pakawongi da kukoni. Ane roomo kukoni, nepa da waika siko popadoncoku ri suara mPue, ri kabareʼepanya mate yaku.’ 8Mewali natoʼo” woʼu Ribeka, “mewali anaku, pedongekamo pai wianakamo nunjaa anu da kutoʼo seʼi. 9Palaimo njoʼu ri kareʼe bimbata, pilisimo radua ana mbula anu maboko, nepa da kupoapuka siko malulu pepokono mpapamu. 10Nepa da nukenika papamu da napangkoni, ane roo setu nepa da nawaika siko popadonconya ri kabareʼepanya mate siʼa.”
11Paikanya natoʼo i Yako ri inenya, “Ine, koro i Esau mawuyu, pai koroku bareʼe? 12Boi ndapejama i mpapa koroku painaka da ndaincani yaku mambambasi sira; painaka banya ndadonco paikanya ndatusaki yaku.”
13Mesono inenya natoʼo, “Neʼe nupoʼipu ndaya anaku. Mbolimo yaku anu mangangkoyo pura-pura petusakinya. Wianakamo nunjaa anu kutoʼoka siko, palaimo njoʼu tima waʼa mbula setu.” 14Njoʼumo kojo i Yako mantima waʼa mbula setu nakenika inenya, nepa napoapu i Ribeka pangkoni ewa anu napokono i Saki. 15Ungka lairia natima i Ribeka rengko i Esau anu maʼai kalesenya anu nadika-dika ri banua, napaporengkoka i Yako. 16Pale pai leʼe i Yako anu bareʼe mawuyu setu nawewesika pela mbula. 17Nepa nawaika i Yako wayawo anu mananamo setu pai roti anu nepa napowia.
18Roo setu njoʼumo i Yako ri papanya natoʼo, “Papa!”
Mesono i Saki natoʼo, “Nunjaa, isema siko i Esau bara i Yako?”
19Mesono i Yako natoʼo, “Yaku i Esau ana i mpapa anu uyue; anu ndiperapi seʼi tokamo. Ndipotundamo mangkoni wayawo anu kupangelasi, da naka ndidonco yaku.”
20Natoʼo i Saki, “Maliga kojo pangaleʼomu anaku.”
Mesono i Yako natoʼo, “Ua i Pue Ala anu ndipanyomba papa mantulungimo yaku.”
21Nepa natoʼo i Saki ri Yako, “Maʼimo mosu-mosunya ri yaku da kupampejama siko. Bara monco kojo siko i Esau?” 22Natimosuki i Yako papanya, nepa napejama mpapanya siʼa natoʼo, “Oni ngangamu ewa oni nganga i Yako, paikanya palemu ewa pale i Esau.” 23Bareʼe naincani i Saki i Yakonya maka palenya seʼe mawuyu ewa pale i Esau. Paikanya ri da napangadoncomo i Yako, 24ntongo sangkanipa napeoasi, “Bara monco kojo siko seʼi i Esau?”
Mesono i Yako natoʼo, “Monco.” 25Nepa natoʼo i Saki, “Wai kaku maʼi wayawo setu. Ane roo mangkoni yaku nepa da kuwaika siko popadoncoku.” Nawaimo i Yako wayawo setu ri papanya pai reʼe woʼu sakodi anggoro da nainu. 26Nepa natoʼo mpapanya ri siʼa. “Maʼi pakamosuka mpodago ri yaku anaku, pai da nueki yaku.” 27#Ib. 11:20 Ri pantimosuki i Yako da mangaeki, naenga i Saki wau rengko i Esau, inceʼe painaka nadoncomo siʼa. Natoʼo i Saki. “Kawongi wau ngkoro anaku ewa kawongi wau mpada anu ndadonco i mPue. 28Mbolimo i Pue Ala da mampatuduka siko rini ungka ri yangi, anu da mampakalimbokori waʼa bodemu! Mbolimo Sira da mawaika siko gandu pai anggoro anu gana-gana! 29#Pal. 12:3 Mbolimo waʼa banca da mewali anamayunumu, pai waʼa lemba da meʼuru ri siko. Mbolimo siko da mangkuasai waʼa ntinamu, pai waʼa muli inemu da mombukotu ri suaramu. Mbolimo tetusaki pura-pura tau anu mantusaki siko, pai ndadoncomo pura-pura tau anu madonco siko.”
I Esau merapi popadonco ungka ri Saki
27:30-41
30Nepa malai pinca i Yako ri karoonya nadonco mpapanya i Saki, jelamo tukakanya i Esau ungka ri pangelanya. 31Siʼa woʼu mampoapu pangkoni anu mawongi nepa nakenika papanya, natoʼo, “Ndipotundamo, papa, ndikonimo wayawo anu kukenika komi papa, da naka ndidonco yaku.”
32Meoasi i Saki natoʼo, “Ara isema siko?”
Mesono i Esau natoʼo, “Yaku i Esau anami anu uyue.”
33Montepuʼumo kandende-ndende koro i Saki, nepa meoasi siʼa natoʼo, “Ane ewanceʼe, isema anu mampangelasi pinatuwu anu napoapu nepa nakenika yaku ngena? Roomo kukoni ri kabareʼepanya jela siko. Pai roomo woʼu kuwaika popadoncoku anu kapusanya ri siʼa, mewali seʼi-seʼi popadonco setu da napotumpumo rantani masae-sae.”
34Butu nadonge i Esau inceʼe, tumangi siʼa marimbo oni nganganya nakeni ngkapari ndayanya, nepa natoʼo, “Ndidoncomo yaku seʼe papa!
35Natoʼo i Saki tuaʼimu roomo maʼi mambambasi yaku. Pai siʼa roomo mantima popadonco anu kamonconya da kuwaika siko.”
36 #
Pal. 25:29-34
Natoʼo i Esau, “Karua ngkaninyamo seʼi napantengosi yaku. Sintinaja kojo toʼonya i Yako. Roomo natima katukakaku, seʼi natima woʼu popadonco anu kamonconya da galaku. Ara bareʼemo reʼe popadonco anu ntaninya da galaku papa?”
37Mesono i Saki natoʼo, “Yaku mampapewalimo siʼa puemu, pai pura-pura waʼa ntinanya kupapewali anamayununya. Roo kuwaika siʼa gandu pai anggoro. Seʼi-seʼi bareʼemo reʼe bara nunjaa-njaa anu da kukoto mawaika siko anaku!”
38 #
Ib. 12:17
Paikanya bareʼe naowe i Esau merapi ri papanya, “Ara podo sambaʼaja yau popadonco anu ndipotumpu papa? Ndidoncomo woʼu yaku seʼi papa!” Painaka motumangi woʼu siʼa.
39 #
Ib. 11:20
Ungka lairia natoʼo i Saki ri siʼa,
“Bareʼe da reʼe rini ungka ri yangi da tilamu,
bareʼe da reʼe bonde anu malimbokori tilamu.
40 #
Pal. 36:8, 2 Raj. 8:20 Siko da mampotuwu mata mpenaimu,
paikanya da mewali anamayunu ntuaʼimu,
paikanya ane meewa siko,
da lapa siko ungka ri kuasanya.”
41Inceʼe painaka napobanciika i Esau i Yako ua napampepombaikamo mpapanya popadonconya ri tuaʼinya setu. Natoʼo ri rayanya, “Bareʼemo masae i papa da matemo pai ane pusamo pampoomboka, da kupepate i Yako!”
I Saki mampokau i Yako da njoʼu ri Laba
27:42–28:5
42Butu nadonge i Ribeka tangara ndaya i Esau setu, napokau tau mampeboo i Yako nepa natoʼoka, “Pedongeka, tukakamu i Esau da mantima wela mpesawa da mampepate siko. 43Mewali, wianakamo nunjaa anu dakutoʼo seʼi. Pakaligamo malai njoʼu ri tuakakaku i Laba ri Harani, 44karoo-roomo sangkani-ngkani njairia bara tesangkuja ntaʼu, rantani manda kajaʼa ndaya ntukakamu 45pai napangkalingani waʼa anu roo nupowia ri siʼa. Nepa da kupokau tau njoʼu mantima siko mewalili ireʼi. Maka bareʼe kupokono radua anaku da paya sandeme-ndeme.”
46Natoʼo i Ribeka ri Saki, “Malente kojo rayaku mangkita poʼengko waʼa ndongo i Esau anu banca ntaninya setu. Ane i Yako da mamporongo woʼu anaweʼa nto Heti, moruana matemo yaku seʼi.”
Currently Selected:
PALABURU 27: LAIPMF
Highlight
Share
Copy
Want to have your highlights saved across all your devices? Sign up or sign in
