PALABURU 26

I Saki maroo-roo ri Gera

26:1-25

1Ri anu santempo merampe woʼu oro bangke ri tana setu ewa anu mewali ri tempo ngkatuwu i Burahima. Inceʼe painaka njoʼu i Saki mampomberataka i Abimele, mokole nto Pelisiti, ri Gera, merapi siʼa da maroo-roo njairia. 2Painaka njoiria kanjoʼunya maka i Pue roomo mampapamara koroa ri siʼa pai natoʼoka siʼa, “Neʼe njoʼu ri tana Masiri; karoo-roomo ri tana seʼi, ewa anu roomo kusongkaka siko. 3#Pal. 22:16-18 Yaku da mangkariani pai da mangadonco siko. Juku-juku tana seʼi da kuwaika siko pai waʼa mulimu. Yaku da mangabangani janjiku anu roo kutoʼo ri papamu i Burahima. 4Yaku da mangawaika siko mulimu da ewa kasondo betuʼe ri yangi, pai juku-juku tana seʼi da kuwaika tau seʼe. Pura-pura banca ri wawo lino da merapi ri yaku da naka kudonco tau seʼe ewa kupangadonco waʼa mulimu. 5Yaku da mangadonco komi, ua i Burahima mepoʼinayamo ri yaku pai mamporewu waʼa mpadika pai songkaku.”

6Mewali maroo-roomo i Saki ri Gera. 7#Pal. 12:13, 20:2 Butu napeoasi waʼa ntau njairia, isema i Ribeka, mesono i Saki natoʼo, siʼa setu tuaʼinya, banya rongonya. Maka maeka raya i Saki da napepate waʼa ntau njairia siʼa, nepa da natima rongonya i Ribeka anu maʼai ngkadolidi setu. 8Masae-saemo sakodi karoo-roo i Saki njairia, ri anu sandeme i Mokole Abimele metango ungka ri tuke banuanya, nakita njau i Saki ntongo mombesokowaka pai i Ribeka. 9Inceʼe painaka napeboo i Saki, natoʼo, “Ara banya weʼa setu rongomu? Wenu painaka nutoʼo siʼa setu tuaʼimu?”

Mesono i Saki natoʼo, “Kunawa-nawa, boi ndapepate yaku ane kutoʼo siʼa setu rongoku.”

10Natoʼo i Abimele, “Nunjaa anu roo nupowiaka kami? Ane rapanya reʼe sambaʼa ri oyo mpaliliku anu njoʼu mamperouka rongomu, siko ngkaliomu anu da mangkoyo kasala mami setu.” 11Ungka lairia napatiendo i Abimele waʼa mpalilinya pura-pura natoʼo, “Bara isema tau anu mampakasusa tau seʼi bara rongonya, da ndahuku mate.”

12Mojamaa pai mopinamuyamo i Saki ri tana setu, ndadonco i mPue, painaka wua mpinamuyanya reʼe saatu ngkani karianya ungka ri anu napomuya. 13Kako teranga-rangani kakoreʼenya painaka maʼai kojomo kakoreʼenya. 14Manyau raya nto Pelisiti ri siʼa maka siʼa mampotumpu anamayunu anu sondo, ewanceʼe seʼe waʼa bimba pai japinya. 15Inceʼe painaka naiwuni ntau seʼe waʼa ntibubu anu roo nakae waʼa anamayunu i Burahima sindara tuwupa siʼa.

16Ungka lairia natoʼo i Abimele ri Saki, “Palaimo ungka ri tana mami seʼi. Maka tongawa siko meruumo kakuasamu ungka ri kami.” 17Inceʼe painaka malaimo i Saki, nepa nawangu kemanya ri Yombo Gera. Masae sakodi karoo-roonya njairia. 18Nawali ngkae muni waʼa ntibubu anu ndakae ri tempo ngkatuwu i Burahima pai anu roomo naiwuni nto Pelisiti ua matemo i Burahima. Waʼa ntibubu setu napapotoʼoka ewa toʼo anu roo napapotoʼoka mpapanya.

19Waʼa anamayunu i Saki mangkae woʼu waʼa ntibubu anu ntaninya ri Yombo Gera setu painaka gana-gana ue anu narata ntau seʼe. 20Paikanya waʼa ntopongkambi ri Gera mopaiso pai waʼa ntopongkambi i Saki. Maka natoʼo ntau seʼe, “Ue seʼi kami tumpunya.” Inceʼe painaka napapotoʼo i Saki tibubu setu, “Popaiso”.

21Waʼa anamayunu i Saki mangkae woʼu tibubu anu ntaninya, paikanya mewali woʼu popaiso ua tibubu setu. Inceʼe painaka, napapotoʼo i Saki tibubu setu, “Poʼiwali”. 22Ungka lairia melimba siʼa ungka njairia, nakae woʼu tibubu anu katatogo. Sangkani seʼi bareʼemo mewali popaiso. Inceʼe painaka napapotoʼo i Saki tibubu setu, “Katesorepaka”. Natoʼo, “Seʼi-seʼi i Pue madoncomo kita mawaimo ri kita katesorepaka da meari ri tana seʼi, pai da gana-gana katuwuta ireʼi.”

23Ungka lairia malai i Saki rata siʼa ri Beriseba. 24Ri wengi setu i Pue mampapamara koroa ri siʼa, ndatoʼo, “Yakumo Pue Ala pue mpapamu i Burahima. Neʼe maeka siko; yaku mangkariani siko. Yaku da mangadonco siko pai da mawaika siko mulimu anu sondo silulu pai janjiku ri anamayunuku i Burahima.” 25Nepa nawangu i Saki lampaʼani, nepa manyomba ri Pue njairia. Nawangu kemanya njairia, nakae woʼu waʼa anamayununya tibubu anu ntaninya.

Pojanji i Saki pai i Abimele

26:26-33

26 # Pal. 21:22 Ri anu sandeme ratamo i Abimele ungka ri Gera sangkani pai Ahusa topontotorakanya, pai i Piko tadulako ncurodadonya, da momberata pai i Saki. 27Meoasi siʼa i Saki natoʼo, “Wenu painaka komi maʼi mampomberataka yaku, ntanoka i owi ndipobanciika yaku pai ndiiri yaku ungka ri tanami?”

28Nepa mesono tau seʼe natoʼo, “Seʼi-seʼi manotomo ri raya mami kasikonya ndakariani i mPue, painaka kaepe moruana kita mampareʼe pojanji. Pontandokoromo 29kasikonya bareʼe da mampowia jaʼa ri kami, ewa kami woʼu bareʼe reʼe kapampowia jaʼa ri siko. Maka kami katujumo powia anu madago ri siko, kapapalai siko madago-dago. Pai tongawamo ri kami kasikonya ndadonco i mPue.” 30Ungka lairia napolinggona i Saki tau seʼe, napakoni pai napapanginu tau seʼe. 31Bangke reme mowuro-wuro, sambaʼa-sambaʼa tau seʼe mampasowamo pojanji anu napakaroso pai pontandokoro. Napapoiwo i Saki tau seʼe nepa mogaʼa-gaʼa mpodago ewa tau sabale.

32Ri eo setu seʼe waʼa anamayunu i Saki rata mampetumbuka siʼa kono tibubu anu roo nakae ntau seʼe. Natoʼo ntau seʼe, “Reʼemo ue karata.” 33Nepa napapotoʼo i Saki tibubu setu “Pontandokoro”. Inceʼemo tepuʼunya kota setu ndapapotoʼoka Beriseba.

Waʼa rongo i Esau ungka banca ntaninya

26:34-35

34Ri tempo tinuwu i Esau opo mpuyu ntaʼu, naporongo radua anaweʼa nto Heti, inceʼemo i Yudi ana i Beeri pai i Basima ana i Eloni. 35Weʼa radua setu mampakasusa raya i Saki pai i Ribeka.

Currently Selected:

PALABURU 26: LAIPMF

Highlight

Copy