Joh. 12

Tutulaji Jesus ka Betania

(Mat. 26:6-13; Mrk. 14:3-9)

1Ai le enem ngagogoi ibara Paska, ei Jesus ka Betania, laggai Latsarus sisuruakenen Jesus ka simamatei. 2Galairangan pasiraumaat ka tubunia sedda, si marta masipuuku, si Latsarus te sara sipakudduake Jesus mukom. 3#Luk. 7:37, 38 Lepa alanangan sitenga kilo tula simasingin bulat narwastu simakeppu saki si Maria, tulajinangan reret Jesus, kaunangan alainia masiposa; salu le lalep singinnia tula nenda. 4Kuanangan si Judas Iskariot, sara ka talagat sipasiului Jesus – sipasisesegeake nia geti –, 5“Angoi ta tusakiake tula simasingin nene telu ngotu ropia, samba bulagatnia tukau ka simageba?” 6Tapoi kei ikukua nene ta ukut bagania ka simageba, sipananangkou le nia, mareirei iala bulagat ka suppit siukkaakenennia.

7Kuanangan Jesus, “Obaake kam nia! Masirepdep gogoi katurateiatku le igagali nene. 8#5Mos. 15:11 Ai le mariuriu simageba ka bebemui, aku geti ta mariuriu ka bebemui.”

Pukerekat bagada masimateiake si Latsarus

9Maigi sia tai Jahudi amasiagai kababarat Jesus sedda. Oirangan leu, ta sarat kalulut Jesus, tapoi obara leu masiitco si Latsarus, sisuruakenen Jesus simamatei. 10Teuakerangan tai imam sabeu bule si Latsarus leu tumateiake; 11kalulut nia le poi maigi tau Jahudi masikaddiuake sia samba masikatonemi Jesus.

Katugurukat samba katuroroiat Jesus ka Jerusalem

(Mat. 21:1-11; Mrk. 11:1-11; Luk. 19:28-40)

12Pato, kele araarep nia sirimanua simigi siooi mupunen aimomoi Jesus ka Jerusalem, 13#Psalm. 118:25, 26 alarangan rorot poula, ei sia masiroroi nia, pusogaarangan, “Hosanna! kau imatulu tubunia siooi ka onin Tuhan, Rimatada tai Israel!”

14Kele aisese sara kalidei siooko Jesus, Jananginangan nia, bulat ipo kele sitususurat ka Surat sipunena,

15 # Zakh. 9:9 “Ba maloloto okko Sion!

Amoian te Rimatam,

mukuddu ka teitei togat kalidei!”

16Ka panandaatnia ta raagai nene sipasiului Jesus, teret aitulatsatnakean le Jesus, ia pei repdeprangan, pagalaiat tubunia le atusuratnake ka Surat Sipunenan, samba kisedda leu aragalai ka tubunia.

17Sangamberi sirimanua sipaalei Jesus ka teteret aisogai si Latsarus ka ratei aisuruake nia simamatei masimunengake sangamberi sibabara. 18Ia te lulunia araei sirimanua simigi ka tubut Jesus, kalulut aarepda aigalai kerek nene. 19Kuarangan tai Parise pasasambada, “Anuitcoan kam, bulat siboboi le kam. Itco pei kam, sangalio polak masitut nia.”

Tai Grika sipasigagaba Jesus

20Ka talagada sirimanua sieei manindou ka punen, ai piga pa tai Grika. 21Sia nene, mei kai Pilipus sibara ka Betsaida ka Galilea, kuarangan ka matania, “Tuan, koba kuitco kai Jesus.”

22Ei si Pilipus masisegeake kai Andreas; lepa ei sia ruada masisegeake nia ka Jesus. 23Kuanangan ka matada Jesus, “Aiailingan te teterenia itulatsatnake Togatsirimanua. 24Kukua nia ka matamui: Ke ta bele ka polak ngambet bera ianau, sangambenia leu ne. Tapoi ke ianau geti buaakenangan bua simaigi. 25#Mat. 10:39, 16:25; Mrk. 8:35; Luk. 9:24, 17:33 Simanuntu baga ka engania, ia te sipalimai nia, tapoi sitaipuletsei engania ka polak nene, ia te sipasikeli nia teret ka purimanuaiat sitaitatata. 26Kasei sioba mupagugulet ka tubuku, kau itut aku; kaipa aku sedda leu paguguletku. Kasei sioba mupagugulet ka tubuku umunakenen Ukkuiku te nia.”

Ipoiliat Jesus pagalaiat kamateiatnia

27“Mareureu bagat Ketsatku kineneiget, kipa pa kukukua? Kukukua pa, “Ukkui, romake aku ka jam nene’? Taa, lulut nene le poi akuoi ka jam nene. 28Ukkui, latsatnake onim!” Maarepnangan nganga sibara ka manua masikua, “Akulatsatnakean, ai leu kulatsatnake nia minca.”

29Kele araarep nene sirimanua simigi sipuririo sedda kuarangan, “Leleggu le nenda!” Sabagei masikua, “Ai le ipatitiboake nia sara malaika!”

30Kuanangan ka matada Jesus, “Ta kalulut aku aibara nganga nene, kalulut kam le. 31Kineneiget aiailingan teterenia katuukuman ka taikapolak; keneneigetnan te tukekele rimatada taikapolak. 32Samba ke atubuakngakean aku ka polak, tiktikkungan sangamberi sirimanua ka tubuku.” 33Ikukua nia nene, ia te masipoiliat pagalaiat kamateiatnia.

34 # Psalm. 110:4; Jes. 9:6; Jehz. 37:25; Dan. 7:14 Kuarangan ka matania sirimanua simigi, “Siarepmai geti ka surat Surukat, riuriu le ipurimanua Kristus teret buruburu; kipa te nukukua tububuakngake te Togatsirimanua? Kasei nia Togatsirimanua nenda?”

35Kuanagan ka matada Jesus, “Taan mauuju ikuddu ka kam pato. Oto puenung kam ka teteret ai pei le pato ka kam, bui isaksak kam gepgep; aipoi sipueenung ka gepgep, ta iagai kaipa ieei. 36Ujut ai pei le pato ka kam, kau imatonem bagamui ka pato, bule ibailiu kam tatogat pato.”

Tai Jahudi sitaimatonem baga

Lepa aikua nene Jesus, tui nia iareuake tubunia ka matada. 37Kenanen kise iginia aigalai kerek Jesus ka matada, tapoi ta matonem bagada ka tubunia. 38#Jes. 53:1 Kisedda te ipuaili siniboi nabi Jesaya sipasikukua,

“Tuhan, kasei amatonem baga ka ngantomanmai?

Kasei ka tubu atupatoila geget Tuhan?”

39Ia te ta iooi ramatonem baga, aikua poi minca si Jesaya, “Aikua Taikamanua,

40 # Jes. 6:10 ‘Akupesetnakean matada,

samba akukelaakean paatuatda,

bui imaitco matada samba bui raagai masipaatu,

bui rabauake paatuatda,

bui kualeake sia.’ ”

41Ia te aitiboi si Jesaya, aiitcoan poi pulatsanan Jesus samba aitiboian pagalaiat tubunia.

42Kenanen kisedda, maigi leu siabeu ka tai Jahudi masikatonemi Jesus, tapoi ta rapatoila kalulut tai Parise bui rakekele sia ka uma parurukat. 43Umun sibara ka sirimanua pei le poi raoba bele pei umun sibara ka Taikamanua.

Tiboiet Jesus sibailiu masiukum

44Lepa pusoganangan Jesus, kuanangan, “Sikatonemi aku, ta aku aikatonemi, sipasikokoiniake aku le aikatonemi. 45Samba sipasiitco aku, sipasikokoiniake aku le aiitco. 46Sibailiu patora le aku akuoi ka polak, bule sangamberi sikatonemi aku ta mukukuddu ka gepgep. 47Samba sipasiaarep tiboietku, tapoi ta ireddet, ta aku iuukum nia, ta poi masiukum taikapolak akuoi, masiarauake le. 48Simamin baga ka tiboietku samba sitaisilo tiboietku, aian siukumake nia; tiboiet siniboiku, ia te iuukumake nia ka gogoi sialu. 49Aipoi ta sibara ka teu bagaku kutitiboi, Ukkui sipasikokoiniake aku le amasipatone kaku, apa kuanenku, samba apa segeakenenku. 50Samba kuagai, patonekatnia ia te purimanuaiat sitaitatata. Oto apa siniboiku, siripot sikuat Ukkui ka mataku le kutitiboi.”

Currently Selected:

Joh. 12: MWV

Highlight

Copy