Joh. 13
13
Ibui rereda sipasiuluinia Jesus
1Kei iaili gogoi Punen Paska, aiagaian Jesus aiailingan teterenia ikaddiuake polak nene iei ka Ukkui. Kipa riuriu ipukateki baga sia bakkatnia sikuddu ka polak, kisedda Ieu ipukateki sia baga teret kalepakatnia.
2Kele arapukom sinoibo, alepaan aitubbui sanitu bagat Judas togat Simon iskariot, ipajo Jesus. 3Aiagaian Jesus, sangamberinia, aisegeakean ka kabeinia Ukkui, samba sibara ka Taikamanua le nia, samba ka Taikaimanua leu ieei. 4Lepa purionangan Jesus, goloknangan leppeinia, alanangan komang poposa, apparaakenangan nia ka tengania. 5Uruakenangan oinan ka sambong, taddaakenangan masibui rereda sipasiuluinia, posanangan nia komang situaappara ka tengania. 6Kele aioi kai Simon Petrus, kuanangan ka matania, “Tuhan, ekeu le sibui rereku?”
7Aleginangan nia Jesus ikua ka matania, “Sigalaiku kineneiget ta nuagai, buruburu geti againungan nia.”
8Kuanangan ka mataniasi Petrus, “Ta kuoobaake nubui rereku buru.” Kuanangan ka matania Jesus, “Ke ta kubui ekeu, ta anai bakkatnu kaku.”
9Kuanangan ka matania Jesus, “Sipurarau, taan leu tububui minca, sarat rerengan le, amalinaan poi tubunia. Amalinaan kam, tapoi ta sangamberimui.” 11Iagai poi Jesus sipajo nia, ia te aikua, “Ta sangamberimui malina.”
12 #
Luk. 22:27
Lepa aibui rereda Jesua, pakeinangan minca leppeinia, uddet nia minca ka kudduatnia. Lepa kuanangan ka matada, “Nuagai leu kam sigalaiku ka tubumui? 13Nuooniake tebai kam aku Guru samba Tuhan; aisesengan sikuamui, aipoi kirenangan aku Guru samba Tuhan. 14Oto ke aku, Tuhan samba Gurumui ibui reremui, kam leu mateu nupabui kam rere pasasambamui. 15Uluiet te sigalaiku nene ka kam, bule bugalai kam kele sigalaiku ka tubumui. 16#Mat. 10:24; Luk. 6:40; Joh. 15:20 Kukua nia ka matamui; ta abeu pagugulet kai tuannia, ele pakoiniet ka sipasikokoiniake nia. 17Ke anuagaian kam nene, mauktuk te kam ke nugalaiake kam nia.
18 #
Psalm. 41:10
Ta pagalaiat kam sangamberimui sikuaku nene. Kuagai poi sia sipiliku. Tapoi bule ipuaili siniboi Surat Sipunenan sipasikukua, ‘Alei pakomakenenku aikieakean rerenia ka tubuku.’ 19Kutiboi le nia ka matamui kineneiget, enan tapei amuaili, bule kei muaili, matonemnangan bagamui, aku te nia. 20#Mat. 10:40; Mrk. 9:37; Luk. 9:48, 10:16 Kukua nia ka matamui: Sipasiaala sikoiniakenenku, aku le aiala; sipasiaala aku, sipasikokoiniake aku le aiala.”
Ipoiliat Tuhan Jesus pagalaiat pajoat ka tubunia
(Mat. 26:20-25; Mrk. 14:17-21; Luk. 22:21-23)
21Lepa aikua nene Jesus, mareureunangan bagania, lepa munengakenangan, “Kukua nia ka matamui: sara ka kam masipajojo aku.”
22Paitcorangan mata sipasiuluinia, tenan ingo sia kasei nenda ititiboi. 23Sara ka sipasiului Jesus ia te kilibet bagania ai nia mukukuddu ka bebet Jesus. 24Ngeingeinangan nia si Simon Petrus, kuanangan ka matania, “Nounou pei, kasei ititiboi!”
25Legereakenangan tubunia sipasiului nenda ka tubut Jesus kuanangan ka matania, “Tuhan, kasei nenda?”
26Aleginangan nia Jesus, “Pasikaunanku roti lepa akusuusuuake nia, ia te nia.” Lepa alanangan roti Jesus, suusuuakenangan nia, kaunangan nia kai Judas togat Simon Iskariot. 27Kele aiala roti si Judas guru ka paatuatnia sanitu. Kuanangan ka matania Jesus, “Olaakean nugalai apa siobanu!” 28Tapoi ta anai sia ka talagada sipukokom sedda siagai nia apa lulu ikukua nene kai Judas. 29Ka bagada le te sabagei aikoiniake le nia Jesus masisaki apa pa besiakenen ka punen, ele masikau panguruat ka simageba, siukkaake bulagat poi si Judas.
30Lepana le aiala roti si Judas, bela nia ka gerat. Amasoiboan ka teteret nenda.
Surukat sibau
31Kele aibela si Judas, kuanangan Jesus, “Kineneiget tulatsatnake Togatsirimanua taikamanua leu tulatsatnake ka tubunia. 32Ke tulatsatnake Taikamanua ka tubunia, nia leu ilatsatnake Taikamanua, maruei le ilatsatnake nia. 33#Joh. 7:34 Kam tatogaku, taan mauuju kukuddu ka bebemui. Nugagaba te kam aku, tapoi kele siniboiku ka tai Jahudi, kisedda leu kukua ka matamui: Ka kudduat eijananku, ta momi nuooi kam. 34#Joh. 15:12, 17; 1Joh. 3:23; 2Joh. 1:5 Kineneiget kuake ka kam surukat sibau, ia te bule pakate kam baga pasasambamu; kele katet bagaku ka tubumui, kisedda leu nupakate kam baga pasasambamui. 35Ka pakakatemui baga pasasambamui, agairangan nia sangamberi sirimanua, sipasiuluiku te kam.”
Ipoiliat Jesus pagalaiat pakekelena nia si Petrus
(Mat. 26:31-35; Mrk. 14:27-31; Luk. 22:31-34)
36Kuanangan ka matania si Simon petrus, “Kaipa nueei Tuhan?”
Aleginangan nia Jesus, “Ka kudduat eijananku, ta momoi nutut aku kineneiget, tapoi lepa geti nututut leu aku.”
37Kuanangan ka matania si petrus, “Tuhan, ta kodda momoi kutut ekeu kineneiget? Matarek le aku matei punu tubum!”
38Aleginangan nia Jesus, “Nuoba matei punu tubuku? Kukua nia ka matam: Tapei mutotokki gougou, anupakelengan aku telu ngaminca!”
Currently Selected:
Joh. 13: MWV
Highlight
Share
Copy
Want to have your highlights saved across all your devices? Sign up or sign in
@LAI 2015
