Joh. 11

Kamateiat Latsarus

1 # Luk. 10:38, 39 Ai sara simabesi sipuoni si Latsarus ka Betania, laggai kudduat Maria samba sarainania si Marta. 2#Joh. 12:3 Si Maria, nia te amasitulaji reret Tuhan tula simasingin, alainia aikau masiposa nia. Si Latsarus simabesi nene maniura. 3Ia geti koiniakerangan samaniunia sieei ka Jesus masikua ka matania, “Tuhan, kilibet bagam, ai nia muooringen.”

4Kele aiarep nia Jesus, kuanangan, “Ta kamateiat oringen nene, tapoi sibailiu katulatsanan Taikamanua le, bule imalatsat Togat Taikamanua kalulut nene.”

5Jesus geti manuntu le bagania kai Marta samba ka sarainania samba kai Latsarus. 6Tapoi kele aiarep puooringen Latsarus, kuddu pei le nia rua ngagogoi ka kudduatnia. 7Pasat nene, kuanangan ka matat sipasiuluinia, “Sita kam taei minca ka Judea.”

8Kuarangan ka matania sipasiuluinia, “Rabbi, simaruei le aragele tai Jahudi masibaijuk ekeu, kineneiget mei ekeu minca ka sia?”

9Aleginangan nia Jesus, “Ta pulu rua ngajam sangagogoi? Sipueenung sinago, ta tusosoksok rerenia, iitco poi pato ka polak nene. 10Sipueenung sinoibo geti, tusosoksok le rerenia, ta poi anai pato ka tubunia.” 11Ia te aikua Jesus, lepa kuanangan minca ka matada, “Si Latsarus suruakta, amaunengan nia, tapoi memei le aku kusuruake nia.”

12Kuarangan sipasiuluinia, “Tuhan, ke amaunengan nia, oto mamale nia.”

13Tapoi sikuat Jesus, ia te pagalaiat kauuneng kamamatei; ka bagada ka sia geti kauuneng sipeperem le sikuania nene. 14Lepa kuanangan ka matada simakolou Jesus, “Atataan si Latsarus. 15Tapoi maangka le bagaku ta anai aku sedda kalulut kam, bule imatonem bagamui. Oto sita kam taei ka sia.”

16Lepa kuanangan si Tomas sipuoni Tairua ka matada saaleinia sipasiului, “Sita kam taei ka sia, bule tamatei kam sambata!”

Jesus katusuruat samba purimanuaiat

17Kele aisege sedda Jesus aiailingan epat ngagogoi ujunia si Latsarus ka ratei. 18Betania geti malegere le nia ka Jerusalem, ai pa telu kilometer reunannia. 19Maigi sia tai Jahudi siooi masibalou si Marta samba si Maria masipusuibi bagada kalulut katatatat maniura.

20Kele aiarep kaooi Jesus si Marta, ei nia masiroroi nia; si Maria geti, ai le nia mukukuddu ka lalep. 21Kuanangan ka matat Jesus si Marta, “Ai bai ekeu se Tuhan, ta ilalango maniuku. 22Tapoi kuagai leu apa le nutiddou ka Taikamanua iaake kekeu Taikamanua.”

23Kuanangan ka matania Jesus, “Tususuru le minca maniunu.”

24Kuanangan ka matania si Marta, “Kuagai tususuru nia ka gogoi katusuruat ka gogoi sialu.”

25Kuanangan ka matania Jesus, “Aku te katusuruat samba purimanuaiat; kasei sikatonemi aku, muririmanua le nia kenanen matei; 26samba senen sipuririmanua samba sikatonemi aku, ta mamatei nia buru. Matonem leu bagam nenda?”

27Aleginangan nia si Marta, “Oo Tuhan, matonem bagaku ekeu le Kristus, Togat Taikamanua siooi ka polak.”

Jesus musou

28Lepa aikua nene ei nia isogai sarainania si Maria, kasatnakenangan ngangania masikua, “Aian si Guru sene; aisogai ekeu.” 29Arep aiarep nia si Maria, olaakenangan iei masitagetnake Jesus. 30Enan poi ta sesege Jesus ka laggai, ai pei le nia ka kudduat paailiatda si Marta. 31Sia tai Jahudi sipakudduake si Maria ka lalep masipusuibi bagania, kele araitco olat bagat Maria mutuitui, tutrangan nia, ka bagada poi mei nia ka ratei musou sedda.

32Kele aisege ka bebet Jesus si Maria samba aiitco nia, purapponangan ka matat Jesus, kuanangan, “Ai bai ekeu se Tuhan, ta ilalango maniuku.”

33Kele aiitco Jesus ipusou si Maria samba saaleinia tai Jahudi leu musou, magolunangan bagania pagalu sou baga. 34Kuanangan, “Kaipa anurateiake kam nia?”

Aleginangan nia, “Konan Tuhan nuitco nia.”

35Pusounangan leu Jesus. 36Kuarangan tai Jahudi, “Itco pei katet bagania ka tubunia.”

37Tapoi ai leu ka talagada sipasikukua, “Nia sibukaake matada simapeset, ta pa momoi igalai bui ilango sinene?”

Si Latsarus tusuru

38Magolunangan bagania minca Jesus, ei nia ka ratei. Ratei nene ia te sara ngaliu siputakke bukku.

39Kuanangan Jesus, “Akkatnake kam bukku!”

Kuanangan si Marta, maniu simamatei, “Tuhan, amabutean, aipoi epat ngagogoian.”

40Kuanangan ka matania Jesus, “Ta akukuangan ka matam: Ke matonem bagam, ta isosoppi nuitco pulatsanan Taikamanua?” 41Lepa akkatnakerangan bukku. Teilaakenangan matania ka pata Jesus, kuanangan, “Ukkui, kukua sura kekeu, kalulut anuarepi aku. 42Kuagai mariuriu le nuarepi aku, tapoi kalulut sirimanua simigi sipuririo se, kutiboi le nia, bule imatonem bagada, ekeu le aikoiniake aku.” 43Kele aikua nene, pusoganangan sabeu nganga, “Latsarus, belaake ekeu!” 44Bela aibela simamatei, rere samba kabeinia ai pei le tutatabut komang, matania aitatabbo komang poposat attinang. Kuanangan ka matada Jesus, “Buka kam tabut ka tubunia ipuenung.”

Pukerekat bagada masimateiake Jesus

(Mat. 26:1-5; Mrk. 14:1-2; Luk. 22:1-2)

45Maigi sia tai Jahudi siooi masibalou si Maria, kele araitco sigalai Jesus, Matonemnangan bagada ka tubunia. 46Tapoi ai piga pa sieei ka tai Parise masisegeake ka matada sigalai Jesus. 47Ia geti naraakerangan Rapat Sabeu tai imam sabeu samba tai Parise, kuarangan, “Kipangan le tagagalai, maigingan poi aigalai kerek sirimanua nene? 48Ke taoreake bai nia, ta isosoppi sangamberi sirimanua mutonem baga ka tubunia, oirangan leu tai Roma, rauraurangan Uman Taikamanua samba bangsata!”

49Ia geti panibonangan sara ka talagada sipuoni si Kayafas, imam sabeu ka rura nenda, kuanangan, “Ta neagai kam apa pa, 50samba ta nupaatu kam, maeru pei le ka sita matei sara sirimanua punu tubut simigi, bui sangalio bangsata masubu.” 51Tapoi kei ikukua nene ta sibara ka tubunia, kalulut imam sabeu le nia ka rura nene, poiliatnangan kamamatei Jesus punu tubut bangsa Jahudi. 52Samba ta sarat uktuk bangsa Jahudi, tapoi bule iruruake leu tatogat Taikamanua sipusasabu bailiu musara.

53Barania ka gogoi nenda pakerenangan bagada masimateiake Jesus. 54Kalulut nene taan amugejek Jesus ka simatoila ka Judea, ikaddiuake le, ei nia ka sara laggai simalegere ka simatangeu, sipuoni Epraim, sedda le ikuddu sambada sipasiuluinia.

55Ka teteret nenda malegerengan Punen Paskada tai Jahudi, maigi sia sibara ka laggai nenda mei ka Jerusalem musuru kei bara Paska. 56Ia geti gabarangan Jesus, ai sia muririo ka Uman Taikamanua, patiborangan pasasambada, “Kipa nupaatu kam? Ta pa momoi nia ka punen?” 57Tai imam sabeu samba tai Parise geti arakauan parenta, bule kasei siagai kaipa kudduatnia, buita ipoiliat nia, bule ralaba nia.

Currently Selected:

Joh. 11: MWV

Highlight

Copy