रोमि 2

भगवान राः न्याय

1हेनाते, हेंकू तीमिन बुरा होड़कू हवे मेनते पे कहनी यडा जहानू, लेकिन ए, एटाःकू थरे दोस लगो कू होड़कू, भले न अम कनय हवे, कनर बहाना एरोम बनो सको एना, जे टेबोः रे अम एटाःकुम दो-सा,#मत्ती 7:1; लूका 6:37 हें-ना टेबोः रे अनम दो-सुः तना, कहेकि अम एटाःकुम दो-सा, अवुर हेना अम खुदेम कामेआँ। 2अबू पपाड़िआ, न घयते कामेःकू, भगवान न्याय राः अनुसार ते सजाय ओवा कुआ, ने-ना ते पता चलोआ, कि हेंय सच्‍चा गिआयू। 3ए मनवाँ, अम दो न घयते कामेः कुम दो-सा, लेकिन खुद अम हेना काम मी कामा; अम अड़ींग तना किदो भगवान सजा एरोय ओवाडिञाँ मेनते? 4भगवान अम थरे अखीरिय दयाः तना, अवुर हेंय अमाः अखीरिय सहो यडा, अम मन मी मिड़ाआ मेनते हेंय आँमिय तँगी यडमिआँ, लेकिन अम नआँय दया वम तना, हेना कनर याःते मेनेम बुझो यडा किदो? हेंय अम मन मी मिड़ाः मेनतेय समझो यडमिआँ। तीमिनिय सहो यडा, हेनाते अम थरेय दयाः तना। 5लेकिन अमाः मन कठोर गिआ, अवुर अम एतनाम हठू गिआ, कि अम मन मेनेम बदलो यडा, हेनाते भगवान अनेज खीसुः हेनय प्रगट देवह अवुर हेंय राः सच्‍चा न्यायिय प्रगट देवह अम रोका दंड मी ओड़हो जोमताना। 6कहेकि हेना देवह हेंय सगोरकू अकू राः करम घयते बदलाय ओवा कुआ।#सिरिंग 62:12; नीति 24:12 7जे जे बढ़ियाँः काम रे थीर तेकू दोहो कोःते, भगवान ए-मेआँ सोभा, अवुर मान मरजाद, अवुर अमरता राः खोज रेकू दोहोना, हेनकू अनन्त जीवानिय ओवा कुआ। 8लेकिन जे जे अनाकू राः फयदा लगड पसींदेःकू, अवुर सत मेने मनोकू, अवुर झूठ मनोकू थरे भगवान राः खीस अवुर दंड मेजुआ। 9जे जे खराब काम कू कामा हेंकू सींड़कू थरे कलेस अवुर बिपेत मेजुआ। पहील तेदो एहूदिकू थरे फेर उनानिकू थरे। 10लेकिन जेतना बढ़ियाँ काम कू कामा, हेंकू भगवान अनेज राः सोभा, अवुर मान मरजाद अवुर सान्तिय ओवा कुआ। पहील तेदो एहूदिकू थरे फेर उनानिकू थरे। 11कहेकि भगवान मुँह चिन चिन ते कनय राः मेनेय न्यायेआ।#बेवस्था 10:17

12हेनाते जेतना होड़कू, धरम नियम बेगर पपाड़ी तेकू पाप केडा, हेंकू बेगर नियम तेकू बिलोआ। अवुर जेतना होड़कू धरम नियम पपाड़ी केनतेकू पाप केडा, हेंकू नियम राः अनुसार ते सजा कू ञाँमा। 13कहेकि भगवान राः नँजेर रे धरम नियम अँजोम कू मेने, लेकिन नियम मनोकू धरमिकू ठहरोआ। 14अनजातकू, हेंकू थरे धरम नियम कोवाः रेहो, हेंकू चाले बेवहार ते धरम नियम घयतेकू से-नेआँ, दो हेंकू थरे नियम कोवाः रेहो, हेंकू नआँ टेबोः कू देखारेआ कि अपन मन रे जयेज बेजज करा हवे हेना कू जेर गोत्तेआ। 15कहेकि हेंकू राः चाल बेहवार नआँ लाय यडा कि हेंकू राः कोठी कया रे नियम इदाना; अवुर हेंकू बेजय यडा कू किदो मेने, हेना हेंकू राः मन तकू लायेआ, अवुर हेंकू राः सोच बिचार तकू हो मियाँड घड़ी दोस कुआ, अवुर मियाँड घड़ी मेने दोस कुआ। 16एक दिन भगवान ईसु मसीह राः दोवारा ते होड़कू राः उकू केना टेबोईय न्यायेआ, इंञ होड़कू बढ़ियाँः खभेरिंञ लाय वकू तोलोग नअँञ लाय वकुआ।

एहूदिकू अवुर धरम नियम

17निहों, अपे एहूदिकू सुदा दमभरिंञ टेबोः मेनते। अम एहूदी हवे मेनतेम कहनिःतन रेदो, अवुर धरम नियम रेम भरोसायाडू, अवुर भगवान ईञाअय हवे मेनतेम सयँड़ तनू। 18अवुर अम भगवान राः इक्छाम पपाड़ी तनू, अवुर धरम नियम राः बारे ते, सिखो पड़हो केनते भला बुराम पपाड़ी तनू, 19इंञ अंद्हाकू रेनिय अघुवा, अवुर अंधरा ओत रे अडकेनकू रेनिय इंजोत हवे मेनते अपन उपर रेम भरोसायाडू, 20अवुर इंञ बेगर बुद्ही कू चेचेडय, अवुर चोंडिजकू घयते भगवान राः सत मेने पपाड़ी तनकू रेनिय गुरू हवे मेनतेम अड़ींग तनू, कहेकि अम धरम नियम रे इदाना गियान अवुर सत पूरा पूरांञ पपाड़िआ मेनतेम अड़ींग तना।

21ठिके इदाना, अम एटाःकुम चेडियाडा, अनम ची लगड मेनेम चेडूः तना? अम एटाःकू अलोपे चोचोरा मेनतेम चेडकुआ, अनम चोचोरआ। 22अम अलोपे लंद फँदुऊ मेनतेम कहनियाँ, अनम लंद फँदुः तना किदो ? अवुर अम मुरती कुम मेरंग वआ, अम मँडिल राः कहिन जहिन ची लगड मी लुसिया? 23अम धरम नियम मी सयाँड़ वआ, धरम नियम टोविज केते भगवान ची लगड मी बेजती यडिया? 24कहेकि धरमग्रंथ रे लिखल इदाना, “अमाः चलते ते अनजातकू थरे भगवान ञुमू राः निन्दा होयाआ।”#एसा 52:5

25सही मेते अम धरम नियम मी मनो यड रेदो, खतना केन राः फयदा इदाना, नहीं तदो अम धरम नियम मेनेम मनो यड रेदो, अम खतना केन हेना, बेगर खतनाअय घयतेम गिनोआ। 26बेगर खतनाअय होड़, अगर हेंय नियामिय मनो यड रेदो, खतना केनाय होड़ घयते भगवान एरोई गिनो तेडिया किदो? 27हेनाते अपे एहूदिकू धरम नियम राः हुकूम मेने पे मनो यड रेदो, अनजातकू अपे एरो कू दोस तेडपेआ किदो? कहेकि अपे खतना केन रेहो, अवुर अपे थरे धरम नियम लिखीत रूप ते इदाना, अवुर हेना राः अनुसार ते मेने पे से-ने; दो अनजातकू देंह रे बेगर कू खतना रेहो, धरम नियम राः अनुसार तेकू से-ने रेदो एरो कू दोस तेडपेआ किदो?

28कहेकि एहूदी इंग आप वरी जनम केनाय असली एहूदी न लगे, अवुर खतना राः रीति रिवाज पे मनो रेहो, अपे असली एहूदी मेने पे बनोआँ। 29लेकिन जे राः मन भगवान राः सत रे दोहोना, हें-नी असली एहूदी हवे। अवुर देंह कटियाः हेना असली खतनाः न लगे, लेकिन असलिआ खतना मन बदलोः हेना हवे, नआँ भगवान राः आत्मा राः काम हवे। नआँ घियाअय, होड़कू मेने कू बडेय वय रेहो, भगवान बडेय वया।

Currently Selected:

रोमि 2: ksz

Highlight

Copy