रोमि 3

1दो एहूदी होड़ ची टेबोः रेय बडे गिआ? अवुर खतना रीति रिवाज मनोअय एहूदी, मन बदलो लगड जरूरी इदाना, दो खतनाः राः ची फयदा इदाना? 2सगोर याःते फयदा इदाना, सींड़ वरी पहील तेदो, भगवान एहूदिकू अनेज राः बचानिय ओवड कुआ। 3अगर हेंकू मेंडे कुछ होड़कू मेने कू सरिगड रेहो, अवुर टेबोः मेने कू चेडगड दो ची यना? हेंकू ईमानदार मेने कू दोहो गना दो, भगवान ईमानदार कोवाया किदो? हेंय अनेज राः जबान एरोय पूरा तेडा किदो? 4जरूरिय पूराया! नआँ दुनिया रे सगोरकू जलिया कू बनो यन रेहो, भगवान सच्‍चा गिआयू, धरमग्रंथ रे नआँ याःते लिखल इदाना,

“अम होड़कू राः पाप राः बारे ते ची चीम कहनी केडा,

हेना टेबोः सही गिआ मेनते कू कहनिया, अवुर होड़कू अम कू दोस तोलोग जीतो अमू।”#सिरिंग 51:4

5लेकिन कुछ होड़कू कहनियाँ कि अले बुरा काम ले करो रेहो, भगवान तीमिन धरमी गिअय मेनते होड़कू डिटोह तेकू पपाड़ी जोमा,

फेर अबू निहों ची मेनते बू कहनियाँ? भगवान अबू थरेय खीसुः हेना अवुर दांडिय ओवा बुआ हेना सही कोवाआ किदो? नआँ दो इंञ मनवाँकू राः रीति तेंञ कहनी यडा। 6न याःते अलोपे कहनियू! भगवान सही कोवय रेदो, दुनिया राः काःतेय न्यायेआ? 7लेकिन अवुर कनय न याःतेय कहनी सकोआ कि इंञ जलिया तेंञ टेबोः रेदो, भगवान राः मान मरजाद ञँमुआँ, कहेकि भगवान सत गिआ हेना इंञ जलियाः हेना राः चलते ते ञेंलुआ, दो फेर ची लगड भगवान पाप केडम मेनते सजा ञँम लायीकिय ठहरो यडिञाँ? 8नआँ दो चिली करा न घयते कहनिय घयगिआ कि “अबू, जेतना बगरा बू पापेआ, भगवान लगड ओतनेच बढ़ियाँ गिआ” नआँ घयते कहनिय कू सजा ञँम लायिक गिआकू, लेकिन कुछ होड़कू न घयते ले चेडयड कुआ मेनते अले राः बारे ते अलत गलत तेकू कहनी यडा।

कनय होड़ धरमी कोवाया

9अच्छा ठिके इदाना, अबू एहूदिकू, एटाःकू वरी बढ़ियाँ गिआबू किदो? मेने! अबू निहों बू कहनी यडा घयते एहूदिकू हो अवुर उनानिकू हो सगोरकू पाप राः बंधनू रे कुआ। 10धरमग्रंथ रे लिखल इदाना,

“कनय धरमी कोवा कुआ, मियाँहोड़ हो कोवा कुआ।

11कनय समझदार कोवा कुआ,

कनय भगवान छपाकू कोवा कुआ।

12सगोरकू अडियाना कू, सींड़ेकू बे-कमा यनाकू;

कनय भलाई करे वालाकू कोवा कुआ,

मियाँहोड़ हो कोवा कुआ।

13उघड़ाआ मरघटी वरी जेयसे मँहक उडूंगुआ,

हेन घयते हेंकू टोठेत कू वरी छल कपट टेबोः उडूंगुआ।

अवुर हेंकू अलंग तुकू तेकू छछारोवा, अवुर हेंकू अहा उनुर रे बींञकू बीखा इदाना।

14हेंकू अहा सराप अवुर कड़वाहट ते भरो केना।#सिरिंग 10:7

15हेंकू कटा लोहू बोहो लगड ओसताज केना,

16हेंकू राः होर रे नास अवुर कलेस इदाना।

17हेंकू बढ़ियाँः होर मेने कू जेर गडा।#एसा 59:7,8

18हेंकू थरे भगवान राः डर कोनोनोवाआ।”#सिरिंग 36:1

19अबू पपाड़िआ कि धरम नियम जो कुछ कहनियाँ, हेना जे जे धरम नियम राः अधीन रेकू दोहोना, हेनकू कहनी वआ, हेनाते कहनियाँ कि सगोरकू अहत कू वरी बहाना टेबोः बन्द लगड, अवुर गोटा चँवदीस एहूदिकू सुदा भगवान राः दंड ञँम लायिक कू ठहरोऊ। 20कहेकि धरम नियम राः काम ते कनय होड़ भगवान राः मड़ंग रे धरमी एरोय बनो सको एना, कारन ए हवे कि धरम नियम राः दोवारा ते पाप ची हवे हेना बू जेर सकोआ।#सिरिंग 143:2; गला 2:16

बिसवासेआ ते होड़कू धरमिकू बनोआँ

21लेकिन अब धरम नियम मनो केते भगवान राः दया ञँम लगड कोसीस इदाना, अब हेना बिगर ते भगवान राः नजेर रे धरमी बनोः लगड भगवान राः होर प्रगट यना, नआँ राः गोवाही धरम नियम अवुर भविस्यवक्‍ताकू होकू एमियाडा। 22मतलोब भगवान राः नजेर रे धरमी बनोः हेना, ईसु मसीह थरे बिसवासे रे ञँमुआँ, मसीहा थरे बिसवासेःकू सगोरकू नेन याःतेय बनो कुआ, कहेकि कनर भेदभाव कोवाआ। 23कहेकि सींड़कू कू पाप केडा, अवुर भगवान राः महिमा वरी कू दूर यना। 24लेकिन भगवान अनेज राः किरपा ते बिसवासेःकू सेथिया ते धरमिय ठहरो कुआ, हेंय मसीह ईसु राः दोवारा ते नआँ घयतेय करो वेआ, हेंय हेंकू राः पाप वरिय छडो कुआ। 25कहेकि भगवान मसीह ईसु होड़कू राः पाप राः दंड अनेज उपर रे रीमे लगाडिय कुलतेडिया, अवुर नेन याःते अनेज रेनकू होड़कू राः पाप राः बिरोध रे, अनेज राः खीस लड़ेज लगाडिय कुलतेडिया। अवुर ईसु मसीह अबू लगड अनानेजिय बलिदान तेडा मेनते, अवुर अनेज राः लोहू अबू लगाडिय बोहो तेडा मेनते कू बिसवासे रे होड़कू धरमिकू ठहरोआ। भगवान अनानेज इंञ धरमी हवे मेनते कहनिय लगड, न घयतेय करो तेडा। भगवान धरमी अवुर सत गिआयू, हेंय हेना तोलोग पहीलाःकू होड़कू राः सहो केते हेंकू राः पाप राः सजा मेनेय एमगड कुआ। 26कहेकि अब नआँ समय रे अनानेज धरमी गिअंञ मेनते लाये लगड, ईसु अबू सगोरकू राः पाप राः दंड रिम लगाडिय एमतेडिया। हेंय नेन लगाडिय करो तेडा कि हेंय सही सही तेय न्याये लगड अवुर पाप राः दंड एम लगड, अवुर कनय हो ईसु थरे कू बिसवासेआ हेंकू धरमी ठहरोकू लगड न घयतेय करो तेडा।

27अब फुलायवा लगड दो जघे कोवाआ, कहेकि अबू धरम नियम मनो ते अबू भगवान मड़ंग रे धरमी होड़कू मेने बू बनोआँ, लेकिन ईसु थरे बू बिसवासे रे धरमी बू ठहरोआ। 28हेनाते अबू धरम नियम मनो केते मेने, मसीहा थरे बिसवास केते धरमी बू ठहरोआ। 29भगवान एहूदिकू रेनिय भर न लगे; अनजातकू रेनिय हो हवे। 30कहेकि भगवान मिनियेंटंग गिआयू, खतना रीति रिवाज मनो कुहो चहे मेने मनोवेःकू हो, हेनेन बिसवास ते धरमी होड़कुय ठहरो कुआ।#बेवस्था 6:4; गला 3:20 31हेंडे दो अबू बिसवास केडा ते धरम नियम फलतू गिआ मेनते बू ठहरो यडा किदो? मेने, अबू थरे बिसवास इदान रेदो, धरम नियम सही मेते तीमिन खास गिआ मेनाअबू लाय यडा।

Currently Selected:

रोमि 3: ksz

Highlight

Copy