रोमि 1

पवलुस राः जोहार

1इंञ पवलुस ईसु मसीह रेनिय सेवेखिया; अपे रोम सहर रे दोहोन हेंकू, भगवान परेम कुआ हेंकू अपे सींड़कू मतलोब पवितर होड़कू घयते दोहोन लगड बुलाहट ञँम केन हेंकू सींड़कू लगड नआँ चिट्ठिंञ लिखो यडा। 2अबू रेनिय भगवान अपा हनवरी अवुर परभु ईसु मसीह हनवरी अपे सींड़कू किरपा अवुर सान्ति ञँमुः महल रे दोहोनू। 3भगवान इंञ मसीह ईसु रेनिय परेरित बनोः लगाडिय राःकेडिञाँ, अवुर हेंय राः बढ़ियाँः खभेर परचार लगाडिय चुनो केडिञाँ। 4भगवान अनेज होपोन राः बारे तेय लायेआ नआँ बढ़ियाँ खभेर, पनाहिल ते अनेज रेनकू सेवेखियाकू मतलोब भविस्यवक्‍ताकू राः दोवारा ते धरमग्रंथ रेय जबान तडा। 5नेय हें-नी होपोन, अबू रेनिय परभु ईसु मसीह हवे। नेय मनवाँकू राः हिसाब ते दाऊद राजा राः खुटी खनदान रेय जनम एना।

6लेकिन भगवान राः पवितर स्वाभाव राः हिसाब ते नेय भनगवान होपोन हवे, भगवान नेय गोजकेनकू मेंडे जियो केडिय ते, नेय अखीर सक्‍तिसाली गिअय मेनतेय तिःवड बुआ, अवुर ने-नी भगवान होपोन हवे मेनतेय तिबकेडिया। 7अवुर मसीहा राः बडेः काम राः चलते ते रोम रे अले भगवान रेनकू परेरित बनोः लगाडिय किरपा केना, ताकि सगोर जात रेनकू हेंय थरे कू बिसवास केते हेंय राः टेबोः कू अँजोमू, अवुर अले नआँ काम हें-नी लगड ले करो यडा, अवुर नेन घियाःकू राः बीच वरी अपे हो ईसु मसीह रेनकू होड़कू घयते दोहोन लगड भगवान राः बुलाहट ञँमकेना।

पवलुस रोम रेनकू बिसवासिकू ञेंल गिसानियाँ

8पहील ते, अपे सींड़कू लगड इंञ भगवान धन्यावादिंञ ओवाय तना, ईसु मसीह अबू लगड जो कुछिय करो केडा, हेना राः चलते ते इंञ भगवान धन्यावाद ओवय राः मोका ञँमकेना, कहेकि गोटा दुनिया रे होड़कू अपे राः बिसवास राः बारे तेकू चरचा यडा। 9इंञ बिनतीः तोलोग लगातार भगवान मड़ंग रेंञ उहयर पेआ, कनर न कनर याःते भगवान राः इक्छा राः अनुसार ते, अब अपे थरे मेजुः राः मोका ञँमुः मेनते, इंञ हमेसांञ बिनतीआ। 10अनेज कोड़ा होपोन राः बारे ते बढ़ियाँ खभेर परचार केते हरग दिल तेंञ सेवाया हेंय भगवान राः गोवाही हवे।

11कहेकि इंञ अपे सुदा अखीर जुमो गिसन यडिञाँ कि इंञ अपे कनारा आत्मिक बरदानिंञ हटींग वपे, ताकि अपे राः आत्मिक जीवन मजबूतुऊ। 12ईञाः कहेक मतलोब ए हवे कि इंञ अपे सुदा दोहो कोःते, अपे राः बिसवास बड़हो लगाडिंञ चहोः तना, लेकिन अपे राः बिसवास राः दोवारा ते इंञ हो हिमत ञँमुः मेनतेंञ चहोः तना, नेन घयते अबू आपस रे आसीस राः कारन बू बनोऊ। 13#परेरित 19:21एगा भाईकू, अपे नआँ टेबोःपे पपाड़ी लगाडिंञ चहोः तना कि इंञ अपे थरे सेनुः लगड अखीरिंञ पसींद तडा, लेकिन अब मेनते कनारा ना कनारा रोको तडिञाँ, जेयसे इंञ अनजातकू थरे ईसु मसीह लगड, ईसु मसीह थरे बिसवासे लगाडिंञ जीतो केडकुआ, हेन घयते रोमिकू राः बीच वरी हो जीतो कू लगाडिंञ चहोः तना। 14इंञ उनानिकू चहे एटाःकू अवुर बुधमानकू अवुर बेगर बुद्हिकू चहे कनय हो बढ़ियाँः खभेर लाय वकू लगड जीविंञ तरसोः तना, नआँ इंञ थरे करजा इदाना घयतेंञ बुझो यडा। 15अवुर अपे रोम रे दोहोन तनकू लगड हो बढ़ियाँः खभेर लाय लगड तयार इदानिञाँ।

बढ़ियाँ खभेर राः सक्‍ति

16नआँ बढ़ियाँः खभेर रे बिसवासेःकू सगोरकू पहील तेदो एहूदिकू, फेर उनानिकू उबर कू लगड, भगवान राः सक्‍ति इदाना, हेनाते इंञ बढ़ियाँः खभेर लाय लगड मेनेंञ गेवुआ।#मरकुस 8:38 17कहेकि भगवान अबू काःते धरमी होड़कुय बनो बुआ अवुरिय बंचो बुआ, हेन राः बारे ते बढ़ियाँः खभेर लाय यडा; नेन घयते धरमी होड़कू हवे मेनते, भगवान लेखा बू लगड सुरू वरी अखरी अँगम मसीहा थरे बिसवासे रे होयाआ, धरमग्रंथ रे लिखो केना नआँ टेबोः पक्‍काया कि, “धरमी होड़ बिसवास ते जीवातिय दोहोना#हब 2:4।”

मनवाँकू राः पाप रे भगवान राः खीस

18होड़कू करो वेआ सगोर पाप अवुर बुरा काम रे भगवान अनेज राः खीस#1:18 बढ़ियाँ खभेर ची लगड ईसु मसीह थरे बीनिसवासेरे भगवान राः इक्छा राः अनुसार ते धरमी होड़ बनोः मेनते लाय यडा? न सवाल राः जबाब 1:18-3:1-20 रे ञँमुआँ। सरग वरिय परगाटेआ, हेंकू भगवान राः बारे ते जेतेक जनेक चही उतना सत राः जानकारी रे भरोसा अलो रखोवे मेनते अपन आप कू रोकोआ। 19अवुर हेंकू भगवान राः बारे तेकू पपाड़िआ, कहेकि भगवान अनेज राः बारे ते गियान हेंकू थरेय परगट केडा। 20भगवान दुनियाय बनो तेड वरी होड़कू अगस अवुर धरती अवुर भगवान बनो केडा सगोर चीज कू ञेंलियाडा, हेंकू अनेज राः बेगर ञेंल हेना गुँड़ मतलोब हेंय राः अनन्त सक्‍ति, अवुर हेंकू भगवान राः स्वाभाव कू पना पड़ी दरवारुः तना, इतना तक कि अले भगवान मेने ले पपाड़िआ मेनते एरो कू कहनी सको एना। 21सही मेते हेंकू भगवान कू पपाड़िआ हेंडे रेहो, हेंकू भगवान हवे मेनते मेने कू बडेय गडिया, अवुर धन्यावाद हो मेने कू एमगाडिया। हेना राः बदला ते हेंकू भगवान करेःतेय दोहोना मेनते, फलतू फलतू तेकू पसींद लिंबड़ तेडा, एतना कि हेंकू राः निर्बुद्धि मन अंधरा यनु।#इफि 4:17,18 22हेंकू कहनिया, अले बुद्धमान गिआले मेनते, लेकिन हेंकू दो बिलकुल बे-अकील कू बनो यना। 23महिमा रे दोहोनाय अवुर जुग जुग मेनते दोहोनाय जीवातय भगवान ममानो बगी वते, नासुःकू मनवाँकू, अवुर तितीजकू राः, अवुर जनवरकू राः, अवुर लजतुकू राः बल ते से-नेःकू जीव जन्तुकू राः मूरती बनो केते हेंकुकू मनो तेडा।#बेवस्था 4:16-18

24हेनाते भगवान हेंकू अकू राः बुरा इक्छा राः अनुसार ते असुध काम लगाडिय इकम गोडवडकू, हेनाते हेंकू आपस रे अकू राः देंह ते बुरा अवुर गेव्वाः घियाः काम कू करो तेडा। 25भगवान राः बारे ते करा सही गिआ, हेना रे भरोसा रखोय मेनाँः दो झूठ रे भरोसा कू रखो तेडा, हेनाते हेंकू भगवान बनो केडा हेना चीज कू मान दान तेडा, अवुर कू सेवा तेडा, लेकिन बबानोवय दो मेने कू सेवा गडिया, हेंय हमेसा बडेय वय लायिक गिआयू। आमेन।

26हेनाते भगवान होड़कू बुरा काम राः इक्छा राः कब्जा रेय इकम गोडवडकू, एतना तक कि हेंकू रेनकू कोड़िकू हो कोड़ाकू छोड़ ते, कोड़ी संग कोड़िकू जुमो एना। 27अवुर नेन घयते कोड़ाकू, कोड़िकू छोड़ ते, कोड़ा संग कोड़ा जुमोः लगड अखीर कू चड वडा, अवुर कोड़ा संग कोड़ा गेव्वाआ काम कू करो तेडा, ने-ना राः चलते ते हेंकू बुरा काम राः भगवान ठीक सजाय ओवड कुआ। कहेकि हेंकू अले राः काम राः सजा भगवान एरोई ओवड लेआ मेनते गलत कू सोचो तेडा।

28अवुर हेंकू फेर सेते भगवान पपाड़ी लगड मेने कू चहो गना, हेनाते भगवान हो हेंकू राः बुरा बिचार ते भरो केना इक्छा राः कब्जा रेय इकम गोडवडकू, ताकि हेंकू कभी मेने करो वेआ काम कू करोवू। 29नआँ घियाःकू होड़कू जे-निरीत पाप अवुर बुरा काम ते अवुर लालच ते बयेर भाव तेकू भरो यनु। अवुर एठेड, ञेंड गोज ओड़ेंग, अवुर कलाहुःऊ, अवुर ठको ओड़ेंग, अवुर हिसका ओड़ेंग, न घियाः तेकू भरो यनु। 30अवुर हेंकू चुचुगलिकू, अवुर बदी ओड़ेंग, अवुर भगवान रेनकू दुस्मनकू, अवुर एटाःकू बेजतिकू, अवुर फुलयकू, अवुर अपन बारे ते बडे बडे ते टेबोः कू, अवुर बुरा बुरा टेबोः बनो कू, अवुर इंग आपकू राः टेबोः मेने चेडकू, 31अवुर निरबुद्हिकू, अवुर बिसवास टोविजकू, अवुर मेने मया ओड़ेंगकू, अवुर मेन दयाः कुकू बनो यनु। 32नआँ घियाः काम कू भगवान राः नियम राः अनुसार ते मिरतू दंड ञँम लायिक गिआकू मेनते पपाड़ी रेहो नेकू नआँ घयतेकू करो यडा। बल्कि न घयते कामेःकू होकू बेस वकुआ।

Currently Selected:

रोमि 1: ksz

Highlight

Copy