परेरित 28

माल्टा टापू रे पवलुस

1अवुर अले बंचो उडूंग एना, तहाँ ले पपाड़ी एना कि नआँ माल्टा टापू मेनते कू कहनी वआँ। 2अवुर हेना रेनकू अले थरे अखीर कू किरपा एना। कहेकि दाः उयुगे दोहो एनु, अवुर लेयेड़ राः मार ते सेंगेल कू सलगो केते, अले सींड़ कुकू मान मरजाद तेड लेआ। 3पवलुस रिट काट रपोट केते सेंगेल रेय कुडा तेडा, तहाँ मियाँटंग बींञ सेंगेल आँच तेय उडूंग एना, अवुर पवलुस ती रे लपटो केनतेय हबतेडिया। 4हेना वरी हेना रेनकू हेंय ती रे बींञ लपटो तनाय कू ञेंलवाडा, तहाँ अनाकू अनाकू कहनी ओड़ेंग एना, “सही मेते नेय जनमरवा होड़ हवे। नेय समुन्धर वरी दोय बंचो उडूंग एना, हेंडे रेहो नेय राः न्यायेअय मेनेय एनेम जियो गडिया।” 5हेना वरी पवलुस हेंय बींञ सेंगेल रेय झटकर तेडिया, अवुर पवलुस कनर मेनेय ची गना। 6लेकिन होड़कू अड़ींग एना कि नेय राः देंह फुलोआ चहे दो अचाकते लोजोर कोःतेय गोजुआ मेनते। लेकिन हेंकू अखीर देरी मेनते कू ञेंनेल हँड़ी वयतानू, तहाँ कनर मेनेय ची गनू, दो हेंकू एनेटाः घयते पसींद केतेकू कहनी तेडा, “नेय दो कनय देवता हवे।”

7हेना आस पास रे हेना टापू रेनिय अधिकारी राः जमीन दोहो एना। हेंय अधिकारी ञुमू पुबलियुस मेनते दोहो एना। हेंय अले अनेज ओड़ाः रेय गोःतेड लेआ, अवुर तीन दिन मेनते अपन गतिकू घयतेय मान मरजाद तेड लेआ। 8पुबलियुस अपत जार तनायू, अवुर लजतू उजड़ तना, तहाँ पवलुस भीतर रे सेनकेनते हेंय लगाडिय बिनती एना, अवुर हेंय तीत तेय छुवों केडिय तेय चिकन तेडिया। 9हेना घयते होया एना, तहाँ हेना टापू रेनकू बंचो तनकू रोगियाकू होकू मेजेना, अवुर हेंकू होय चिकन तेडकुआ। 10अवुर हेंकू अले अखीर कू मान मरजाद तेड लेआ, अवुर अले जहाज हनते रकब लगड ले चलो एना, तहाँ जो कुछ अले लगड जरूरत दोहो एना, हेना जहाज रेकू अग अटु वडलेआ।

रोम देस रे पवलुस राः आगमन

11अले तीन महिना राः बाद रे सिकन्दरिया राः जहाज रे रकब केनते ले उडूंग एना, अवुर हे-ना टापू रे हेना जहाज लेयेड़ भर दोहो एना, अवुर हेना जहाज राः मड़ंग हँडे जवाकींञ राः छाप दोहो एना। 12सूरकूसा रे अले लंगर डलो केते, तीन दिन मेनते ले दोहो एना। 13हेना जघा वरी अले घुमो केडते रेगियुम रेले सेनेना। अवुर एक दिन बितो केन रे, देखीन हनवरी होय चलो एना, हेना ञींदा वतू पुतियुली रेले मेजेना। 14हेना रे बिसवासिकू जुमो एना, अवुर हेंकू राः कहेक अनुसार ते अले हेंकू थरे सात दिन अँगम मेनते ले दोहो एना। हेना वरी तयोम ते रोम सहर ले सेनेना। 15रोम रेनकू बिसवासिकू अले मेजुः तना मेनाअकू अँजोम तेडा, तहाँ हेंकू अले सुदा जुमोः मेनते अपियुस राः चवुक अवुर तीन सराय अँगम कू मेजेना। अवुर पवलुस हेंकू बिसवासिकू ञेंलते भगवान धन्यावादिय ओवाडिया, अवुर हिम्मत तय बढ़ो एना।

16हेना वरी रोम सहर ले तयाः तेडा, तहाँ पवलुस मियाँहोड़ ते दोहोन लगड हुकूम ञँमेना, लेकिन हेंय सुदा मियाँहोड़ सिपाही पपाहराअय दोहो एना।

रोम रे पवलुस परचार तेडा

17तीन दिन राः बाद रे पवलुस एहूदिकू रेनकू बड बडे होड़कुय एर राःतेडा, अवुर कू जवर एना, तहाँय कहनी वडकू, “एगा भाईकू, इंञ अपन होड़कू राः चहे दादी पुरखाकू राः रीति रिवाज राः बिरोध रे कनर बेगारिंञ करोआ। हेंडे रेहो इंञ बंधुवा बनो केडिंञ ते, एरुसलेम वरी रोमि होड़कू थरे कू जिमा गोत्तेडिञाँ। 18हेंकू इंञ जाँच केडिंञ तेकू बगी सोवाडिञाँ, कहेकि इंञ थरे मिरतू दंड ञँमुः घियाआ कनर दोस मेने दोहो गना। 19#परेरित 25:11लेकिन एहूदिकू नआँ बिरोध रेकू कहनी तेडा, तहाँ इंञ कयसर राजा थरेंञ अरजी एना, अवुर नआँ घयते कनर कोवाआ कि इंञ अपन होड़कू थरे दोसिंञ लगो। 20हेनाते इंञ अपे सुदा जुमो लगड अवुर टेबोः लगाडिंञ एर राःकेड पेआ; कहेकि इसराएलिकू जे असरा इदाना, हें-नराः चलते तेकू तोलकेडिञाँ।” 21हेना वरी हेंकू कहनी तेडा, “अले अमाः बिसेय ते एहूदिकू वरी चिट्ठी हो बेगर ले ञाँमा, अवुर न भाईकू मेंडे कनय मेजकेन ते, अमाः बिसेय तेकू लाय केडा, अवुर न अलत गलत टेबोः कू लाय केडा। 22लेकिन अमाः बिचार ची हवे? हे-ना अम वरी अँजोम गिसन यडलेआ। कहेकि अले पपाड़िआ, सींड़ जघा तेनकू न होर राः बिरोध ते होड़कू टेबोः तनाकू।”

23तहाँ हेंकू पवलुस लगड दिन कू तोल तेडा, अवुर हेना देवह अखीर होड़कू पवलुस थरे कू मेजेना। अवुर भगवान राः राज राः बारे ते गोवाहिय लाय वडकू। अवुर मूसा राः नियम अवुर भविस्यवक्‍ताकू राः कागद वरी, ईसु राः बारे ते ञींदात वरी सिंगड़ मेनतेय सनमझो कू दोहो एनु। 24तहाँ कुछ होड़कू हेना टेबोः कू मनो तेडा, अवुर कुछ होड़कू मेने कू सरी गडा। 25हेंकू मेने कू एक गूट गना, तहाँ पवलुस नआँ टेबोईय कहनी तेड सी कू चलो यनु, “पवितर आत्मा एसायाह भविस्यवक्‍ता राः दोवारा ते अपे रेनकू दादी पुरखाकू थरे ठिकेय कहनी तेडा, सेनकोःते नेकू होड़कू थरेम कहनियू,

26‘अपे अँजोमेआँ पे,

लेकिन एरो पे समझो एना,

अवुर ञेंल तुदो पे ञें-लेआ,

लेकिन एरो पे चिन्हों तेडा।

27कहेकि नेकू राः मन कठोर यना,

अवुर लुतूर तुकू हो मोट यना,

अवुर हेंकू मेडतू कुकू जपिड केडा।

नहींता हेंकू अपन मेड तेकू ञेंलतेड मेनू,

अवुर कू अँजोम तेड मेनू,

अवुर अपन मन रेकू समझो एन मेनू,

अवुर हेंकू इंञ हनतेकू मिड़ाः एन मेनू,

अवुर इंञ हेंकुंञ चिकन तेडकू मेनू।’”#एसा 6:9-10

28हेना वरी पवलुस कहनी तेडा, “अपे पपाड़ी कोःपे, भगवान राः नआँ उऊबरा खभेर मतलोब पाप वरी माफी ञँमुः राः टेबोः अनजातकू थरेय कुल गोत्तेडा, अवुर हेंकू अँजोमे अकू।” 29पवलुस न याःतेय कहनी तेडा, तहाँ एहूदिकू आपस रे अखीर कू अड़ा चवकीऊ, अवुर हेना जघा वरी कू चलो यनु।

30पवलुस दूय बरिस किराया ओड़ाः रेय दोहो एना, 31अवुर जे जे हेंय थरे कू मेजुः दोहो एनु, हेंकू सींड़कू सुदाय जुमोः दोहो एनु, हेंय निडर ते अवुर बिना रोक टोक ते, भगवान राः राज राः बारे तेय परचारे दोहो एनु, अवुर परभु ईसु मसीह राः टेबोईय चेडकू दोहो एनु।

Currently Selected:

परेरित 28: ksz

Highlight

Copy