मरकुस 9

1ईसु हेंकू थरेय कहनी तेडा, “इंञ अपे थरे सही मेतेंञ कहनी यडा, नआँ रे चड़ाँ केनकू मेंडे कुछ होड़कू, एयसा इदान कुआ, भगवान राः राज सक्‍ति राः साथ ते अनायिन कू ञें-ले मेन दिन मिरतू राः सवाद एरो कू चिखो तेडा।”

ईसु राः रूप बदलो एना

(मत्ती 17:1-13; लूका 9:28-36)

2 # 2 पतरस 1:17,18 छो दिन राः बाद रे ईसु पतरस अवुर एकूब अवुर एहुन्‍ना, नेकू मियाँटंग उसुला बुरू हनतेय गोःतेड कुआ। हेंकू मड़ंग रे ईसु राः रूप बदलो एना। 3अवुर हेंय राः कपड़ा पुंडी केनते चमकोः दोहो एनु, एयसा चमकोः दोहो एनु कि संसार रे हेना घयते कनय धोबी एरो कू पुंडी सको एना। 4अवुर हेना रे हेंकू मूसा सुदा एलियाह कू ञेंलवाडा, अवुर हेंकींञ ईसु सुदा कींञ टेबोः दोहो एनु। 5तहाँ पतरस ईसु थरेय कहनी तेडा, “ओ गुरू, अबू नआँ रे दोहोन लगड बढ़ियाँ गिआ। हेनाते अले पेयटंग तम्बू ले बनोआ; मियाँटंग अम लगड, मियाँटंग मूसा लगड, अवुर मियाँटंग एलियाह लगाडू।” 6ची मेनतेय कहनी मिड़ाः वया, हेना पतरस मेनेय पपाड़ी दोहो एनु, कहेकि हेंकू अखीर कू बोरोयन दोहो एनु। 7#मत्ती 3:17; मरकुस 1:11; लूका 3:22तहाँ हेंकू लिंबीर उकू गोत्तेड कू, अवुर हेना लिंबीर वरी नआँ याःते आवाज उडूंग एना, “नेय इंञाअय दुलारय कोड़ा होपोनिंञ हवे, नेय राः टेबोःपे अँजोमू।” 8हेंकू तुरेत्ते चारियो गतर हन कू ञेंलतेड दो, अकू सुदा ईसु छोड़ अवुर कनय मेने कू ञेंल ञँमगाडा।

9हेना वरी बुरू वरी कू अगड़ू तोलोग ईसु हेंकू नआँ याःतेय हुकूम वडकू दोहो एनु, “इंञ होड़ होपोन गोजकोः वरी अनायीनिंञ जियो रिमुः मेन दिन, जो कुछ पे ञेंलकेडा, हेना कनय थरे अलोपे लाय बेड़ायू।” 10हेंकू नआँ टेबोः अपन मन रेकू जोगो तडा; अवुर अनाकू अनाकू होंबोर ओड़ेगू, “गोजकोः वरी जियो रिमुः राः ची मतलोब हवे?” 11#मत्ती 11:14अवुर हेंकू ईसु कू होंबोर तेडा, “एहूदी नियम चेचेडकू ची लगड कू कहनियाँ किदो मड़ंग ते एलियाह जरूरिय मेजुआ मेनते?” 12हेना वरी ईसु जबाब तेडा, “एलियाह सही मेते मड़ंग ते मेजकोःते सींड़िय सुधरो वेआ। लेकिन इंञ होड़ होपोन राः बारे ते अखीर ते दूखिय रीमा, अवुर मेरंग वया कू, मेनते ची लगड लिखल इदाना? 13लेकिन इंञ अपे थरेंञ कहनी यडा, एलियाह दोय मेज चुको केना, अवुर जे घयते हेंय लगड लिखल इदाना, हेंकू जो कुछ कू चहो एना हेन घयते हेंय सुदा कू करो तेडा।”

भूत लगो तनय चोंडीजिय चिकन तेडा

(मत्ती 17:14-20; लूका 9:37-43)

14जब हेंकू चेलाकू थरे कू मेजेना, तहाँ कू ञेंलतेड कुदो हेंकू सुदा भीड़ लगो तना, अवुर एहूदी नियम चेचेडकू हेंकू सुदा कू होड़बादुः दोहो एनु। 15तहाँ हेंय कू ञेंलतेडिय सी अखीर होड़कू अहचरज यनु, अवुर हेंय कू जोहार वय लगड कू हुंको सेनेना। 16हेना वरी ईसु हेंकुय होंबोर तेडा, “अपे नेकू सुदा ची पे कहनी ओड़ेंग वताना?” 17तहाँ भीड़ वरी मियाँहोड़ जबाब तेडा, “ओ गुरू, इंञ कोड़ा होपोन थरे गूँगा भूत लगो केना, हेंय अम थरेंञ अगतेडिया। 18जहाँ रे भूत चपो विया, तहाँ हेंडे पटको गोत्तेया, अवुर अहात ते गजा उडूंगुआ, अवुर तिरींग तुय लुकड़ूमा, अवुरिय लोहोड़ चलोः तना। इंञ अमाःकू चेलाकू थरे भूत पे उडूंग मेनतेंञ कहनी तेडा, लेकिन हेंकू मेने कू उडूंग सको गना।” 19नआँ टेबोः अँजोम केते ईसु जबाब तेडा, “ए अन बिसवास होड़कू, इंञ अपे सुदा तिमीन दीनिंञ दोहोना? तिमीन दिन अपे रअंञ सहोआ? मेय चोंडिज इंञ थरे पे अगेयू।” 20हेना वरी हेंय थरे कू इदी तेडिया, तहाँ भूत, ईसुय ञेंलतेड दो, हेंय चोंडिज भूत मुरकुटो तेडिया, अवुर ओतेत रेय लोजोर यनु, तहाँ अहत वरी गजा उडूंगुऊ अवुरिय लेंड फेंडो बेड़ाऊ। 21हेना वरी ईसु अपातिय होंबोर तेडा, “नेय तीमिन दिन वरी न घयतेया?” तहाँ हेंय कहनी तेडा, “चोंनोडीज वरीमा। 22नेय चोंडिज गोज लगड नेय भूत सेंगेल ते अवुर दाः तेय लोजोर तेडिया; अगर अम कनाराम करो सकोः रेदो, अले थरे दया कोःतेम सहेता वले।” 23हेना वरी ईसु हेंय थरेय कहनी तेडा, “अगर अम कनाराम करो सकोः मेनाआँ ची टेबोः हवे? अम मेनेम पपाड़ीः तना कनय होकू बिसवासेआ हेंकू लगड सींड़ होया सकोआ।” 24हेना वरी चोंडिज अपत तुरेत्तेय कहनी तेडा, “ओ परभु, इंञ बिसवास यडाञूँ, इंञ बिसवास रे बढ़ोः लगड सहेतावंञ मी।” 25हेना वरी ईसु ञेंलतेड कुआ कि अवुर कू हुंको मेजकोः तेकू भीड़ुः तना, तहाँ ईसु भूत दबेट केतेय कहनी वडू, “ए गूँगी अवुर भेयरी भूत, इंञ आँमिंञ कहनी वम तना, नेय वरिम उडूंगुऊ, अवुर अनालोम बो-लू।” 26हेना वरी हेंय भूत अहीज केनते अवुर अखीर मुरकुटो केडिय ते, हेंय वरिय उडूंग यनु, अवुर चोंडिज गोजयन घय्यानियू, अवुर अखीर होड़कू गोजयनायू मेनते कू कहनिय दोहो एनु। 27तहाँ ईसु तीत रे सबकेड तेय रिमतेडिया, अवुर हेंय चोंडिज चड़ाँ यनु। 28हेना वरी ईसु ओड़ाः रेय मेजेना, तहाँ मियाँहोड़ तेय दोहोएन तोलोग चेला कुतय होंबोर तेडिया, “अले मेय ची लगड मेने ले उडूंग सको गना?” 29हेना वरी हेंय कहनी तेडा, “नआँ घियाःकू भूतकू बेगर बिनती#9:29 कुछ किताब रे बिनती अवुर उपास मेनतेआ ते अवुर कनर उपाय ते एरो कू उडूंग एना।”

ईसु अनेज राः मिरतू राः बारे ते फे-रिय भविस्यवाड़ी तेडा

(मत्ती 17:22-23; लूका 9:43-45)

30फेर हेंकू हेना वरी कू उडूंग एना, अवुर गलील जिला खँडा केतेकू चलोः दोहो एनु। अवुर ईसु मेनेय चहोः दोहो एनु कि कनय अनेज राः बारे तेकू पपाड़ी।

31कहेकि हेंय अनेज रेनकू चेला कुय चेडकू दोहो एनु, अवुर हेंकू थरेय कहनिय दोहो एनु, “इंञ होड़ होपोन, होड़कू रेकू एर सबेञाँ, अवुर हेंकू ञेंड गोजेञाँ कू; अवुर गोजकोः राः बाद रे तीन दिन रे फेरिंञ जियो रिमुआँ।” 32लेकिन चेलाकू नआँ टेबोः मेने कू जेर गडा, अवुर हेंकू हेंय होंबोरिय लगड कू बोर दोहो एनु।

भगवान राः राज रे सींड़कू वरी बडेअय ईया हवे?

(मत्ती 18:1-5; लूका 9:46-48)

33हेना वरी हेंकू कफरनहूम सहर कू तयाः तेडा, अवुर ओड़ाः रे सेनकेनते ईसु चेला कुतायिय होंबोर तेडा, “होर होर ते अपे ची पे बरताः दोहो एनु?” 34#लूका 22:24लेकिन हेंकू जपनो बगी यनकू, कहेकि होर ते से-ने तोलोग हेंकू अबू वरी ईया बडे गिआ मेनते अकू अकू बरताः दोहो एनु। 35#मत्ती 20:26,27; 23:11; मरकुस 10:43,44; लूका 22:26तहाँ ईसु दुड़ूब एनायू, अवुर बारहो झन चेलाकू राःकेड कुतेय कहनी वडकू, “अगर अपे मेंडे कनय बडेअय बनोईय चहोः तन रेदो, सींड़कू वरी होडीञायिय बनोऊ, अवुर सींड़कू रेनिय सेवेखयाय बनोऊ।” 36हेना वरी मियाँहोड़ चोंडिज हेंकू मँझर रेय चड़ाँ तेडिया, अवुरिय हँबुड केडिय ते चेलाकू थरेय कहनी तेडा, 37#मत्ती 10:40; लूका 10:16; एहुन्‍ना 13:20“कनय हो इंञ ञुमू ते नेकू घियाः चोंडिजकू मेंडे मियाँहोड़ मेनकू अपनोआँ, हेंय ईञिय अपनोआँ; अवुर कनय हो ईञिय अपनोआँ, हेंय इंञ मेने ईञिय कुलकेडा, हेंयिय अपनोआँ।”

मेनेय बिरोध हेनी अबू गतर रेया

(लूका 9:49-50)

38एहुन्‍ना ईसुय कहनी वडू, “ओ गुरू, अले मियाँहोड़ अम ञुमू ते भूतकुय उडूंग तोलोग ले ञेंलवाडिया, अवुर अले ईसका सोवाडिया, कहेकि हेंय अले मधे मेनेय दोहो गना।” 39तहाँ ईसु कहनी तेडा, “हेंय घियाअय अलोपे ईसका वयू; कहेकि जे इंञ ञुमू ते अहचरज कामिय कामा, हेंय तुरेत्ते ईञाः निन्दा एरोई उडूंग सको एना। 40#मत्ती 12:30; लूका 11:23कहेकि अबू राः बिरोध रे कोवाया, हेंय अबू गतर रेया। 41#मत्ती 10:42कनय हो मसीह रेनकू चेलाकू हवे मेनते इंञ ञुमू ते मियाँ डुबहा दाईय पियो पे रेदो, इंञ अपे थरे सही मेतेंञ कहनी यडा, हेंय कनर घयते अनेज राः फल एरोय गँवों तेडा।”

पाप रे फफसोकू

(मत्ती 18:6-9; लूका 17:1-2)

42“नेकू होड होडिंञकू मेंडे रे इंञ थरे कू बिसवासेआ, कनय एर पाप कुरे दो, हेंय होड़ लगड न बढ़ियाँ गिआ कि होटोः तुरे जनता चकी तोलकेते, समुन्धर रे अटड़ गोत्तेयू। 43#मत्ती 5:30अगर तीम एर पाप मी रेदो, हेना ती बोंगेर केतेम घिर गोत्ते। बनार ती रह ते कबोह मेने इड़ीजुआ नरक राः सेंगेल रेम एर डलोः सेथा दो, ठुठा कोःते जीवन मी ञँम हेना बढ़ियाँ गिआ। 44[हेनारे हेंकू रेनकू तीजकू मेने कू गोजुआ, अवुर सेंगेल मेने इड़ीजुआ।] 45अगर कटाम एर पाप मी रेदो, बोंगेर केतेम घिर गोत्ते। बाटंग कटा रह ते नरक रेम एर डलोः सेथा दो, लंगड़ा कोःते जीवन मी ञँम हेना बढ़ियाँ गिआ। 46(हेनारे हेंकू रेनकू तीजकू मेने कू गोजुआ अवुर सेंगेल हो मेने इड़ीजुआ।) 47#मत्ती 5:29अगर मेड मी एर पाप मी रेदो, हेना उडूंग केतेम घिर गोत्ते। बाटंग मेड रह ते नरक रेम एर डलोः सेथा दो, कनवाँ कोःते भगवान राः राज रेम सेनुः हेना बढ़ियाँ गिआ। 48हेनारे हेंकू रेनकू तीजकू मेने कू गोजुआ, अवुर सेंगेल मेने इड़ीजुआ। 49भगवान हर एक होड़कू सेंगेल तेय नोनछीर कुआ।#9:49 एहूदिकू बलिदान बूलुंग तेकू सूधेआ, हेन घयते भगवान सगोर होड़कू सेंगेल तेय सुद्ध कुआ 50#मत्ती 5:13; लूका 14:34,35बूलुंग दो बढ़ियाँ गिआ, लेकिन मान ले बूलुंग राः सवाद हनीः रेदो, ची तेपे चहाटेआ? अपे जीवन रे बूलुंग भिनो केना घयतेपे दोहोनू, अवुर आपस रे मिल जुल तेपे दोहोनू।”

Currently Selected:

मरकुस 9: ksz

Highlight

Copy