मरकुस 10

पंचनमा राः बारे तेय चेडतेड कुआ

(मत्ती 19:1-12)

1हेना वरी ईसु अहूदिया राः सिवन रे अवुर जरदन जोड़ वरी मेना परोम रेय सेनेना। तहाँ फेर होड़कू हेंय थरे कू जवर एना, अवुर ईसु फेर अनाकू राः रीति राः अनुसार ते सिक्छाय चेडकू दोहो एनु। 2हेना वरी फरीसिकू हेंय थरे मेजकेन ते अजमोय लगड कू होंबोर तेडिया, “कनय कोड़ाहोन अनेज कन्याँतिय बगी वआ, हेना जयेज गिआ किदो कोवानू?” 3तहाँ ईसु हेंकुय जबाब वडा, “मूसा अपे ची मेनतेय हुकूम वडपेआ?” 4#मत्ती 5:31हेना वरी हेंकू कहनी तेडा, “अनेज कन्याँय बगिवय रेदो, पंचनमा कागद बनो केते बगिवय लगड मूसा अनुमातिय एमकेडा।” 5तहाँ ईसु हेंकू थरेय कहनी तेडा, “अपे राः मन कठोर गिआ, हेनाते अपे लगड मूसा नआँ घयते हुकूमिय लिखो केडा। 6लेकिन नआँ संसार राः बोंहड़ित रे भगवान कोड़ाहोन अवुर कोड़ीहोन मेनते कहनी केडकींञ तेय बनो तेडकिञाँ। 7हेनाते कोड़ाहोन अपन इंग आप बगी वते अनेज कोड़ीहोन तू सुदाय दोहोना, 8अवुर हेंकींञ बना होड़ मियाँ देंह जोमा किञूँ। हेनाते हेंकींञ अब बा होड़ मेने, लेकिन मियाँ देंह जोमा किञूँ। 9हेनाते भगवान जुमो केडकींञाँ, हेंकींञ होड़कू अलोकू अलग किञूँ।”

10हेना वरी ओड़ाः रे नआँ राः बारे ते चेलाकू फेर ईसु कू होंबोर तेडा। 11#मत्ती 5:32; 1 कुरि 7:10,11हेना वरी हेंय कहनी तेडा, “कनय हो अपन कोड़ीहोन बगी वते, एटागी कोड़ीहोनिय असुल रेदो, हेंय होड़ पहीलाअय कोड़ीहोन राः बिरोध रेय लंद फाँदुः तना। 12अवुर कोड़ीहोन अनेज कोड़ाहोन बगी वते एटागी कोड़ाहोन सुदाय दोहोन रेदो हेंय लंद फाँदुः तनायू।”

चोंडिजकू आसीर्वादिय ओवडकू

(मत्ती 19:13-15; लूका 18:15-17)

13एक दिन राः दिन रे कुछ होड़कू चोंडिजकू ईसु थरे तीत तेय छुवों केकू ते आसीर्वादिय ओवाकू लगड कू अगकू दोहो एनु, तहाँ चेलाकू हेंकुकू दबेट तेडा। 14ईसु नआँ ञेंलकेते खीस केनते हेंकुय कहनी वडा, “चोंडिजकू इंञ थरे पे इकम मेजवा कू अलोपे मँदा कू, कहेकि भगवान राः राज नेन घियाःकू राः हवे। 15#मत्ती 18:3इंञ अपे थरे सही मेतेंञ कहनी यडा, कनय हो भगवान राः राज चोंडिजकू घयते मेनेय अपनोवे रेदो, हेंय हेना रे कभी एरोय सेन सको एना।” 16अवुर ईसु चोंडिज कुय हँबुड तेडकुआ, अवुर हेंकू थरे तीत ते छुवों केकू ते आसीर्वादिय ओवड कुआ।

धनमान ढिंगवा अवुर अनन्त जीवन

(मत्ती 19:16-30; लूका 18:18-30)

17ईसु हेना वरी उडूंग केनतेय चलोः दोहो एनु, तहाँ मियाँहोड़ हेंय थरेय हुंको मेजेना, अवुर हेंय मड़ंग रेय उकड़ुम केनते हेंयिय होंबोर तेडा, “ओ बढ़ियाँअय गुरू, अनन्त जीवन ञँम लगड इंञ चिंञ बनोआँ?” 18हेना वरी ईसु हेंय थरेय कहनी तेडा, “अम ची लगड बढ़ियाँअय मेनतेम कहनी वंञ तना? सीरिफ भगवान भर बढ़ियाँ गिआ, अवुर कनय बढ़ियाँ कोवाआ। 19अम हुकूम दोम पपाड़िआ, ‘कनय अलोम ञेंड गो-जू, अलोम लंद फाँदुऊ, अलोम चोचोरा, एटाःकू थरे जलिया ते गोवाही अलोम ए-मे, अवुर अलोम ठको कू, अपन इंग आप राः सिमाम रखो’।” 20हेना वरी हेंय होड़ कहनी तेडा, “ए गुरू, नआँ दो सींड़ इंञ चोंनोडिज वरिंञ मनो अगियाडा।” 21ईसु ञेंलकेडिय तेय परेम तेडिया, अवुर हेंय थरेय कहनी तेडा, “अम थरे मियाँटंग टेबोः राः कमी इदाना, जू, जे-ना अमाआँ इदाना, हेना केजा केते गरीब कुम ओवा, अवुर अम लगड सरग रे धन ञँमुआ, अवुर मेजकोःते इंञ तयोम तेम से-ने।” 22नआँ टेबोः अँजोम केतेय मन उदास यनु, अवुर हेंय कुचरो केनतेय चलो यनु, कहेकि हेंय अखीर धनमानिय दोहो एना। 23ईसु चारियो गतर ञेंलकेते अनेज रेनकू चेलाकू थरेय कहनी तेडा, “धनमान होड़कू भगवान राः राज रे बोल लगड तिमीन किलिस गिआ!” 24चेला कुतय हेंय राः टेबोः अँजोम केतेकू अहचरज यनु। हेना वरी ईसु फे-रिय कहनी तेडा, “ए चोंडिजकू, जे जे धन रे भरोसा कू रखो तआ, हेंकू भगवान राः राज रे बोलू तीमिन किलिस गिआ! 25भगवान राः राज रे धनी होड़ बोल सेथा दो, ऊँट सुजी बुचाः ते खँडाः हेना सहज गिआ।” 26चेलाकू अवुर कू अहचरज यनते अनाकू अनाकू कहनी ओड़ेंग दोहो एनु, “हेंडे दो ईया उबारुआ?” 27हेना वरी ईसु हेंकू हन ञेंलके तेय कहनी तेडा, “नआँ होड़कू सयते दो एरो होया एना, लेकिन भगवान सयते होया सकोआ, कहेकि भगवान सयते सींड़ होया सकोआ।” 28हेना वरी पतरस कहनी तेडा, “अँजोम मी, अले दो सींड़ चीज बगी वते अम तयोम तेले सेनियाडा।” 29हेना वरी ईसु कहनी तेडा, “इंञ अपे थरे सही मेतेंञ कहनी यडा, नआँ घयते कनय कोवाआ, जे इंञ अवुर बढ़ियाँः खभेर लगड ओड़ाः, चहे भाई बेहिनकू, चहे इंग आप, अवुर होन होपोनकू चहे जमीनिय बगी वडा, 30हेंय न जबाना रे नआँ चीज सव गुनाय ञाँमेआ, अवुर ओड़ाः अवुर भाई बेहिन इंगा अवुर होन होपोनकू अवुर जमीन, लेकिन सँगे साथ ते सताहटिय ञाँमा अवुर मेजुः तना जुग रे अनन्त जीवानिय ञाँमा। 31#मत्ती 20:16; लूका 13:30लेकिन अखीर होड़कू मड़ाँगाःकू, तयोमुआँकू; अवुर तयोमाःकू, मड़ाँगुआकू।”

ईसु अनेज कू ञेंड गो-जा हेना राः बारे ते तीसरा बारिय भविस्यवाड़ी तेडा

(मत्ती 20:17-19; लूका 18:31-34)

32हेंकू एरुसलेम सहर हनतेकू चलोः दोहो एनु, हेना तोलोग ईसु मड़ंग मड़ंग तेय से-ने दोहो एनु। चेला कुतय अहचरज यनकू, अवुर हेंय तयोम तेकू से-ने दोहो एनु, हेंकू बोरो यनकू। हेना वरी ईसु बारहो झन चेलाकू हिगरो केडकू ते अनेज सुदा ची ची होयाः हेनाय लाय वडकू। 33हेना वरी हेंय कहनी तेडा, “अँजोम पे, अबू निहों एरुसलेम हनतेबू चलोः तना, हेना रे इंञ होड़ होपोन बड बडे आजककू, अवुर एहूदी नियम चेचेडकू ती रेकू एर सबेञाँ, अवुर कू एर ञेंड गोजेंञ लगड कू जिमाञाँ, अवुर अनजातकू थरे कू जिमाञाँ। 34हेंकू ईञाः मजाक कू उड़ोआ, अवुर इंञ थरे कू बे-जेआ, इंञ कोड़ा तेकू ञेंडेञाँ, अवुर कू ञेंड गोजेञाँ, अवुर इंञ तीसरा दिन रेंञ जियो रिमुआ।”

एकूब अवुर एहुन्‍ना बिनती एना

(मत्ती 20:20-28)

35तहाँ जबदी होपोन एकूब अवुर एहुन्‍ना हेंय थरे मेजकेन तेकींञ कहनी तेडा, “ओ गुरू, अलिंञ चहोः तना कि जो कुछ अम थरे लिंञ असिया, हेना अम अलिंञ लगड मी करोवे।” 36हेना वरी ईसु कहनी तेडा, “अबा चीबा ञँम बेड़ा यडा, इंञ अबा लगड चिंञ बनोआँ?” 37तहाँ हेंकींञ कहनी तेडा, “अमाः महिमा होयाऊ, तहाँ मियाँहोड़ अम वरी जोम गतर रे, अवुर मियाँहोड़ कोंञ गतर रे लिंञ दुड़ूब लगड दयाः मी।” 38#लूका 12:50हेना वरी ईसु कहनी तेडा, “अबा, चीबा असी यडा, हेना मेने बा पपाड़ी तना? इंञ अखीर ते दुख ञँमुआँ डुबहा वरिंञ ञुँय मेनते, हेना अबा ञूँ सकोआ किदो? अवुर जो इंञ दुख भराल बतिस्मांञ तिलाआ, हेना अबा तिला सकोआ किदो?” 39हेना वरी हेंकींञ कहनी तेडा, “अलिंञ तिला सकोआ जहानू।” ईसु कहनी तेडा, “जे डुबहा राः इंञ ञूँया, हेना अपे ञूँया, अवुर जे दुख भराल बतिस्मांञ तिलाआ हेना अपे तिलाया? 40लेकिन ईञाः जोम चहे कोंञ गतर रे दुड़ूब कुआ हेना ईञाः काम न लगे। न जघा हेंकू लगड हवे, जे लगाडिय तयार केडा।”

41नआँ अँजोम केते दस झन चेलाकू, एकूब अवुर एहुन्‍ना कू धको वडा। 42#लूका 22:25,26हेना वरी ईसु बँदेत रे राःकेड कुतेय कहनी वडकू, “अपे पपाड़िआ कि जो अनजातकू रेनकू अधिकारिकू इदान कुआ, हेंकू एटाःकू थरे कू राजेआ, अवुर हेंकू थरे हो बड बडे अधिकारिकू राजेआ। 43#मत्ती 23:11; मरकुस 9:35; लूका 22:26लेकिन अपे सुदा न घयते अलो होयाऊ। अगर अपे मेंडे कनय हो बडेअय बनोईय चहोः तन रेदो, अपे रेनिय नोकारिय बनोऊ, 44अवुर अपे मेंडे कनय अघुवा बनोईय चहोः तन रेदो, हेंय सींड़कू रेनिय नोकारिय बनोऊ। 45कहेकि इंञ होड़ होपोन एर सेवाः लगड बेगारिंञ मे-जा, लेकिन इंञ सेसेवा लगड अवुर अखीर होड़कू छडो कू लगड ईञाः जीव ए-मिंञ मेजकेना।”

बरतिमाई चिकन तेडा

(मत्ती 20:29-34; लूका 18:35-43)

46हेना वरी ईसु अवुर चेला कुतय एरीहो सहर रेकू मेजेना, अवुर हेंकू बडे भीड़ सुदा एरीहो कू उडूंग बंचोः दोहो एनु, तहाँ तिमाई होपोन बरतिमाई मेनते कू ञुमू तडिया, हेनी मियाँहोड़ अंद्हा सँड़क अड़ी रे असी जोमुः लगाडिय दुड़ूब तना। 47हेंय नआँ अँजोम केते कि नसरेत रेनिय ईसु हवे, तहाँ हाक हाक तेय कहनी तेडा, “ओ दाऊद खनदान रेनिय ईसु, इंञ थरेम दयाऊ!” 48अवुर अखीर होड़कू जपनोः कोःमी मेनते कू दबेट सोताडिया, तहाँ हेंय अनावुरिय हाकू “ओ दाऊद खनदान रेनिय ईसु, इंञ थरेम दयाऊ!” 49तहाँ ईसु चड़ाँ केनतेय कहनी तेडा, “मेय न रेपे अगेयू।” अवुर होड़कू अंद्हाकू कहनी वा, “खुसीम मनो, अवुर रिमुःमी, मेय आँमिय राःयड मिआँ।” 50हेंय अनेज राः कपड़ा घिर केते तुरेत्तेय चड़ाँ यनु, अवुर ईसु थरेय मेजेना। 51हेना वरी ईसु हेंयिय होंबोर तेडा, “अम चीम ञँम बेड़ा यडा? इंञ अम लगड चिंञ बनोआँ?” हेना वरी हेंय अंद्हा कहनी तेडा, “ओ गुरू, इंञ ञेंल गिसन यडिञाँ।” 52हेना वरी ईसु कहनी तेडा, “जू, अम बिसवास केडा तेम चिकन यना।” अवुर हेंय तुरेत्तेय ञेंञेंलू अवुर होर ते ईसु तयोम तेय सेनतेडा।

Currently Selected:

मरकुस 10: ksz

Highlight

Copy