MATEU 13

1Ha tangwa lize liene Yesu watuhukile mu zuwo, Watwamine ku sesa lia Chitende. 2Mbunga jinene akungulukile kuli iye, chocho wanjilile mu ulungu; watwamine, ni mbunga yeswe amanyine ha ngenge. 3Wahanjikile kuli ayo yuma yinji ni yishima ngwenyi, Ivwenu, chikuwa watuhukile mukukuwa; 4shimbu akuwile, yimwe yaholokelele ku sesa lia jila, ni tujila ejile, ayitakishile: 5yikwo yaholokelele ha mawe, haze kuhapwile mavu anji, mba haze hene yasokele, mumu kuyapwile ni ndama ya mavu. 6Muze tangwa liavumbukile yapapiwile; mba se kuyapwile ni miji, yomine. 7Yikwo yaholokelele ha mingonga; ni mingonga yatatukile, yayikeketesele. 8Ni yikwo yaholokelele ha mavu apema, yemine mbuto, yimwe kulakaji, yikwo makumi asambano, yikwo makumi atatu. 9Yoze uli ni matwi a kwivwa, evwe.

10Tumbaji ejile nikwamba kuli iye ngwo, Kuchi te unahanjika kuli ayo ni yishima? 11Iye waakumbulwile, ngwenyi, Yenu hananwehecho kunyingika yijimbikilo ya wanangana wa malilu, alioze o kaahelecho. 12Mumu mweswawo ukwete, kumakamwaha, kumakapwa nayo ya kulumbama: alioze mweswawo keshi nacho, kumakamuchiza chipwe chize ali nacho. 13Kashika nakuhanjika kuli ayo ni yishima; mumu nikutala keshi kumona, mba nikupanjika keshi kwivwa, chipwe keshi kunyingika. 14Ni kuli ayo unamanunuka uprofeto wa Izaia, uze unambe ngwo,

Kwivwa kumunwivwa, alioze kunuchi kunyingika nichimwe;

mba kutala kumunutala, alioze kunuchi kumona nichimwe:

15Mumu mbunge ja atu ano hijinapapala,

matwi jo kakufulamana ha kwivwa,

hanafuku meso jo;

kuchina hanji mamona ni meso jo,

hanji mevwa ni matwi jo,

hanji manyingika ni mbunge jo,

hanji malumuka, ngwahindwise.

16Alioze kawaha meso jenu, mumu kanamono, ni matwi jenu mumu kanevu. 17Mumu pundu ngunambe kuli yenu ngwami, aprofeta anji ni akwa ululi evwile usona wa kumona yuma yize yenu nwakumona, alioze kayimweneko; evwile usona wa kwivwa yuma yize yenu nwakwivwa, alioze kayivwileko.

18Kashika ivwenu chishima cha chikuwa. 19Muze umwe mevwa liji lia wanangana, alioze kuliamulumbunukine, hohene mwe mupi meza, machanga chize te hakuwa mu mbunge yenyi. Yino yize ayikuwile ku sesa lia jila. 20Alioze yize mavikuwa ha mawe, iye yoze mevwa liji, mba haze hene malitambula ni uwahililo. 21Alioze keshi muji muli iye mwene, manyongonona ha shimbu likepe; muze luyinda hanji yihungumiona muyiza mumu ha liji, haze hene matalinga. 22Ni yize mavikuwa hakachi ka mingonga, iye yoze mevwa liji, ni yipikalo ya mwono uno, ni kwonga cha upite muyikeketesa liji, mba muliseka. 23Yize mayikuwa ha mavu apema, iye yoze mevwa liji, malinyingika, mema mbuto, umwe kulakaji, ni mukwo makumi asambano, ni mukwo makumi atatu.

24Waatelele chishima chikwo ngwenyi, Wanangana wa malilu walifwa ngwe mutu yoze wakuwile mbuto yipema mu munda wenyi: 25alioze shimbu atu apwile mu tulo, mukwa kole yenyi wejile nikukuwa mwambu wamokomoko hakachi ka tiliku, mba wayile kwenyi. 26Alioze muze mafwo asokele, emine mbuto, hohene mwambu wamokomoko wasolokele nawa. 27Ndungo ja mwenya zuwo ejile kuli iye ngwo, Mwene, kwakuwile mbuto yipema mu munda we, nyi? Mba kulihi unakatuka mwambu wamokomoko? 28Iye wambile kuli ayo ngwenyi, Mukwa kole hanalingi chino. Ndungo ambile kuli iye ngwo, Unazange tuye, tukaukungike, nyi? 29Alioze wambile ngwenyi, Ka, kuchina hanji muze munukungika mwambu wamokomoko munutukula tiliku kumuwika. 30Echenu yeswe yiali yitatuke hamuwika ndo ku kucha: ha mwaka wa kucha mungukamba kuli akwa kucha ngwami, Kungikenu hatangu mwambu wamokomoko, nukaukase yichita mukuyocha; alioze nukakungile tiliku mu machila jami.

31Waatelele chishima chikwo ngwenyi, Wanangana wa malilu walifwa ngwe limona wa mosetate, yoze anjile mutu, akuwile mu munda wenyi. 32Mwenawo chamwenemwene mukepe Wahiana mbuto yeswe; alioze muze hatatuka, hapwa munene Wahiana yiputa yeswe, mapwa mutondo chocho tujila a mwilu meza akatwame ku mitango yawo.

33Waatelele chishima chikwo ngwenyi, Wanangana wa malilu kuunapu ngwe futunwiso, yize anjile pwo, aswekele mu njongo jitatu ja wunga, ndo wafutunukine weswe lukombo.

34Yino yuma Yesu wayihanjikile ku mbunga ni yishima; kahanjikile kuli ayo shina ni chishima: 35hanga chikamanunuke chize ahanjikile ku kanwa lia profeta ngwo,

Kumungukapakula kanwa liami ni yishima:

Mungukanduka yuma ya kuhengama

chize ku kusela cha fundamentu ya hashi.

36Mba Yesu washikile ni mbunga, wanjilile mu zuwo: ni tumbaji twenyi ejile kuli iye ngwo, Tulumbunwine chishima cha mwambu wamokomoko wa mu munda. 37Iye wakumbulwile, ngwenyi, Yoze wakukuwa mbuto yipema iye mwe Mwana Mutu; 38munda he hano hashi; mbuto yipema yino, ana a wanangana; mwambu wamokomoko ana a mwe mupi. 39Mukwa kole yoze waukuwile iye Ndiapu: kucha che kumanunuka cha mwaka; ni akwa kucha e angelo. 40Kashika ngwe makungika mwambu wamokomoko akawoche ni kahia; chocho kumuchikapwa ha kumanunuka cha mwaka. 41Mwe Mwana Mutu kumakatuma angelo jenyi, kumakakunga yitalingiso yeswe ni waze akulinga uhulia, makaachiza mu wanangana wenyi. 42Makayimbila mu lutengo wa kahia: kumukukapwa malilo ni kulikopola ku mazo. 43Hohene akwa ululi kumakatemuka ngwe tangwa mu wanangana wa Tato. Yoze uli ni matwi a kwivwa, evwe.

44Cheka nawa, wanangana wa maliluwalifwa ngwe upite wa kuhengeka mu munda; uze awanyine mutu, auswekele; ni ha kuwaha chenyi maya, malanjisa chize cheswe ali nacho, malanda munda uze.

45Cheka nawa, wanangana wa malilu walifwa ngwe mukwa chitanda kanafupu kakanga mupema. 46Neye ha kuwana kakanga umuwika mulemu chikolo, wayile walanjishile cheswe apwile nacho, wamulanjile.

47Cheka nawa, wanangana wa malilu walifwa ngwe wanda, uze atelele mu Chitende, wakungile yishi a ku milali yeswe: 48muze te hiwazala tò, aukokele ku ngenge; atwamine, akakungile apema mu yikwachilo, alioze api aambilile. 49Chocho kumuchikapwa ha kumanunuka cha mwaka; angelo kumakatuhuka akahandunune yingulungulu hakachi ka akwa ululi. 50O kumakaambila mu lutengo wa kahia: kumukukapwa malilo ni kulikopola ku mazo.

51Yesu yamba kuli ayo ngwenyi, Hinwasela chinyingi yino yuma yeswe, nyi? O yamba kuli iye ngwo, Ewa, Mwene. 52Wambile kuli ayo ngwenyi, Kashika mukwa kusonyeka mweswe wakufumbiwa ku wanangana wa malilu, kanapu ngwe mwenya zuwo, yoze masolola ku upite wenyi yuma yaha ni yuma yikulu.

53Muze te Yesu hamanununa yishima yino, wakatukileko. 54Ha kuheta ku chijima chenyi mwene, walongesele mu sunangonga yo, chocho alishimwokene, ngwo, Kulihi yono hanatambula mana ano ni yipupu yino? 55Yono hi mwana wa karpinteru ko, nyi? Naye hi Maria ko, nyi? Ni ana-akwo ngwo, Tiangu, ni José, ni Semone, ni Yunda, nyi? 56Ni mapangienyi eswe keshi hamwe ni yetu, nyi? Kulihi kevwe yono hanatambula yino yuma yeswe? 57Wapwile chitalingiso kuli ayo. Alioze Yesu wambile kuli ayo ngwenyi, Profeta keshi kuhona ulemu, shina mu chijima chenyi mwene, ni mu zuwo lienyi mwene. 58Kashika kalingileko yipupu yinji, mumu o kafulieleleko.

Currently Selected:

MATEU 13: Csa

Highlight

Copy