MATEU 14

1Ha mwaka uze nguvulu Heronde wevwile lufuma wa Yesu, 2wambile kuli akweze jenyi ngwenyi, Yono Yoano Chipapachisa; hahinduka mukachi ka afu; kashika yipupu kuyakulinga muli iye. 3Mumu te Heronde wakwachile Yoano kulu, wamukashile, wamusele mu zuwo lia ususu, mumu hali Herondeya, pwo lia mwanakwo Fwilipe. 4Mumu Yoano wambile kuli iye ngwenyi, Kuchalitele ni shimbi kupwa nenyi. 5Muze azangile kumushiha, wevwile woma wa mbunga, mumu amumwene profeta. 6Alioze muze tangwa lia kusemuka cha Heronde liahetele, mwana Herondeya wa pwo, wahanganyine mukachi ko, neye wapemenene kuli Heronde. 7Hohene walakenyene ni shingo kumwaha cheswacho meta. 8Se hamulongesa kuli naye, yamba ngwenyi, Ngwehe kuno ha panda mutwe wa Yoano Chipapachisa. 9Mwanangana wevwile chinyengo, alioze mumu ha shingo lienyi, ni hali waze atwamine ku mesa hamwe nenyi, wambile auhane. 10Kashika watumine akatape Yoano mu zuwo lia ususu. 11Anehene mutwe wenyi ha panda, auhanyine kuli mwana-pwo, neye waunehene kuli naye. 12Mba tumbaji twenyi yeza, yazundula mujimba, yaufunda; mba yaya, yambulwila Yesu.

13Achi, muze Yesu achivwile, wakatukile kuze akaye mu ulungu ku puya kwa ukawenyi. Muze mbunga achivwile, akatukile ku membo, amukawile hashi. 14Yesu ha kutuhuka wamwene mbunga yinene, yaavwila keke, yawuka mieji jo. 15Muze hapwile chingoloshi, tumbaji twenyi ejile kuli iye, ngwo, Chifuchi chino chapwa cha puya, ni tangwa kuliendala kulu; shikenu ni mbunga, hanga aye ku yihunda, ukalilanjile kulia. 16Alioze Yesu wambile kuli ayo ngwenyi, Kuchaatambile kuya; ahenu kulia. 17Yamba kuli iye ngwo, Tuli najo kuno mbolo jitano ni yishi aali wika. 18Iye wambile ngwenyi, Jinehenu kuno kuli yami. 19Wambile mbunga atwame ha mwambu, wanjile mbolo jitano ni yishi aali, nikuhetula meso jenyi kwilu, wawahishile mbolo, wajipalwile, wajihanyine kuli tumbaji, mba tumbaji ajihanyine ku mbunga. 20Eswe alile nikukuta; mba anjile yipalupalu yize yasambukile, kumi lia yipakili ni yipakili yiali. 21Waze alile, apwile ngwe tununu atano a malunga kuweza mapwo ni ana.

22Haze hene washinjikile tumbaji twenyi anjile mu ulungu, amutetekele mu sali, ndo mashika ni mbunga. 23Muze hashika ni mbunga, wakandukile ha mulundu ukawenyi mukulemba, mba muze hapwile chingoloshi, wapwile ukawenyi. 24Alioze ulungu wapwile kulu mukachi ka Chitende nikupinda ni mikanya; mumu fuji yalimikine no. 25Muze himukucha, Yesu wakundamine kuli ayo nikwenda ha Chitende. 26Muze tumbaji amumwene nikwenda ha Chitende, alipikalile, ngwo, Mujimu! Atetele ni woma. 27Alioze haze hene Yesu wahanjikile no ngwenyi, Hamukenu; yami mwene; kanda nwivwa woma.

28Petulu wamukumbulwile ngwenyi, Mwene, kachi yena, ngwambe ngwize kuli yena ha meya. 29Aye wambile ngwenyi, Tweya. Petulu wasunukine mu ulungu, wendele ha meya mukuya kuli Yesu. 30Alioze muze amwene fuji ya ngolo, wevwile woma; nikuputuka kushimbama, watetele ngwenyi, Mwene, ngulamwine! 31Haze hene Yesu wolwele kwoko lienyi, wamukwachile, yamba kuli iye ngwenyi, Yena mukwa Ufulielo ukepe, kuchi te wayambashana? 32Muze te hanjila mu ulungu, fuji yahola. 33Ni waze apwile mu ulungu amuwayilile ngwo, Chamwenemwene yena uli mwe Mwana Zambi.

34Muze te hazauka, ejile ku chifuchi cha Ngenezare. 35Muze malunga a kuma kuze amunyingikine, atumine ku chifuchi chize cheswe cha kujingilika, anehene kuli iye waze eswe ayijile. 36Aliumbile kuli iye, hanga ase wika minwe ku lupula wa hina lienyi: ni waze eswe asele minwe aapwishile angunu.

Currently Selected:

MATEU 14: Csa

Highlight

Copy