MATEU 15

1Henaho akwa kusonyeka ni A-Fwariseu a ku Yerusaleme ejile kuli Yesu, ngwo, 2Kuchi te tumbaji twe akutangula ndongo ja makulwana? Mumu keshi kusana ku moko muze malia. 3Waakumbulwile ngwenyi, Kuchi te ni yenu nawa, nwakutangula liji lia Zambi mumu ha ndongo jenu? 4Mumu Zambi wahanyine shimbi ngwenyi, Lemesa tatenu ni noko: chikwo nawa, yoze mahanjika yipi hali tato hanji naye, akafwe. 5Alioze yenu nwakwamba ngwenu, Mweswawo mamba kuli tato hanji kuli naye ngwenyi, Chize wahashile kufumbuka nacho kuli yami hingunachihana kuli Zambi. 6Mba kuchamutambile kulemesa nichimwe tato hanji naye. Hinunalelesa liji lia Zambi mumu ha ndongo jenu. 7Enu yilembese, Izaia waprofetezele kanawa hali yenu ngwenyi,

8Wano atu kakungulemesa ni mivumbo yo;

Alioze mbunge jo jili kusuku ni yami.

9Alioze hamokomoko kakunguwayila,

Nikutenga ndongo ja atu shimbi.

10Watambikile mbunga kuli iye, wambile kuli ayo ngwenyi, Ivwenu, nuse chinyingi: 11Hi chize ko muchinjila mu kanwa muchipihisa mutu; alioze chize muchituhuka mu kanwa, chino muchipihisa mutu. 12Hohene tumbaji twenyi ejile, ambile kuli iye ngwo, Unanyingika, nyi? A-Fwariseu muze evwanga liji lino, evwanga wuli. 13Alioze waakumbulwile ngwenyi, Mitondo yize yeswe Tata wa mwilu kayitumbile kumakayitukula. 14Ahichikenu: tupuputa kanafupu kusongwela tupuputa, nyi kachi kapuputa masongwela kapuputa, eswe aali kumakalimbukila mu wina. 15Petulu wamukumbulwile ngwenyi, Tulumbunwine chishima chino. 16Neye wambile ngwenyi, Ni yenu nawa hindu kunushi malinjekela, nyi? 17Kunushi kunyingika, kumanyi, cheswacho muchinjila mu kanwa muchipalika ku jimo, machimbila mu musenge? 18Alioze yuma yize muyituhuka mu kanwa muyituhuka mu mbunge; neyo kuyakupihisa mutu. 19Mumu mu mbunge mwakutuhuka manyonga api, ni ungalwe, ni utanji, ni upangala, ni wiji, ni Shindakenyo ya mahuza, ni kushililika. 20Yino yuma yakupihisa mutu, alioze kulia ni moko keshi kusana kuchishi kupihisa mutu.

21Yesu wakatukile kuze, wayile kweka ku yihanda ya ku Teru ni Sendone. 22Kumanyi, pwo wa ku Kanana, wakatukile mu manjiza aze, wakololokele ngwenyi, Mwene, yena Mwana David, nguvwile kama keke, mwanami wa pwo kakupinda chikolo ni ndemoniu. 23Alioze kamukumbulwile liji nilimwe, ni tumbaji twenyi ejile kuli iye, aliumbile kuli iye ngwo, Muhume; mumu kanakololoka kunyima yetu. 24Iye wakumbulwile ngwenyi, Chatumiwine shina kuli mapanga a kutoka a ku zuwo lia Izalele. 25Alioze wejile nikumuwayila ngwenyi, Mwene ngukwase kama. 26Aye wakumbulwile ngwenyi, Kuchawahile kuchiza mbolo ya ana ni kuyimbila kuli tuwa. 27Aye ngwenyi, Chocho Mwene: mumu chipwe tuwa kakulia yifwenyufwenyu yize yakuholoka ku mesa ya akako. 28Hohene Yesu wamukumbulwile ngwenyi, Yena pwo, Ufulielo we unene, chikapwe kuli yena chizechene ngwe unazange. Mwanenyi wa pwo wahindukile chize ku ola yize.

29Yesu wakatukile kuze, wahetele ku sesa lia Chitende cha Ngalileya; neye wakandukile ha mulundu, nikutwamaho. 30Mbunga jinene ejile kuli iye, anehene yilema, ni tupuputa, ni tumama, ni yitonji, ni akwo anji, alipupwishile kwatumbika ku yiliato ya Yesu; neye waawukile; 31chocho mbunga akomokene muze amwene tumama kanahanjika, yitonji angunu, yilema kanende, tupuputa kanalaula ku meso: no achichimiekene Zambi ya Izalele.

32Yesu watambikile tumbaji twenyi kuli iye, ngwenyi, Mbunga ya atu keke ngunaavwila, mumu kanashimbula hamwe ni yami matangwa atatu kulu, keshi nichimwe cha kulia: mba chazangile kushika no ni zala, kuchina hanji malezumuka mu jila. 33Tumbaji* twenyi ambile kuli iye ngwo, Muno mu puya kulihi mutuwana mbolo jipwa haha ja kukuchisa mbunga yipwa haha? 34Yesu wambile kuli ayo ngwenyi, Mbolo jingahi nuli najo? O ambile ngwo Shimbiali ni yishi amwe akehe. 35Aye wambile mbunga atwame hashi; 36wanjile mbolo shimbiali ni e yishi; wasakwilile, wajipalwile, wajihanyine kuli tumbaji twenyi, ni tumbaji twenyi ajihanyine ku mbunga. 37Eswe alile, akuchile: mba anjile yipalupalu y ze ya kusambuka, yiseke shimbiali ya tò. 38Waze alile apwile tununu awana a malunga kuweza mapwo ni ana. 39Yesu washikile ni mbunga, wanjilile mu ulungu, mba wahetele ku manjiza ja Mandala.

Currently Selected:

MATEU 15: Csa

Highlight

Copy