MATEU 16

1A-Fwariseu ni A-Satuseu ejile kuli iye, nikumweseka, amwichile kwalweza chilayi cha mwilu. 2Alioze waakumbulwile ngwenyi, Muze mukupwa chingoloshi, munwamba ngwenu, Hamene tangwa lipema, mumu lihi linachili. 3Ha chimenemene ngwenu, Musono kangonga, mumu lilu linachili, Unavunduka. Yilembese, nunanyingika ngwe chize kusa chinyingi ku yuma ya malilu alioze kunwanyingikine kusa chinyingi ku yilayi ya miaka. 4Chisemuko cha ungulungulu kanda cha utanji muchifupa chilayi: ni chilayi kechi kaahacho, shina chilayi cha profeta Yona, mba waahichikile, wakatukileko.

5Tumbaji twenyi ahetele mu sali, alioze avulamine kumbata mbolo. 6Yesu wambile kuli ayo ngwenyi, Talenu, keyelenu futunwiso ya A-Fwariseu ni A-Satuseu. 7Aliambile hakachi ko ngwo, Mumu te kutwambachile mbolo. 8Yesu ha kuchinyingika, wambile ngwenyi, Yenu akwa Ufulielo ukepe, kuchi te nunaliambe hakachi kenu, mumu kunushi mbolo? 9Kanda chinulumbunuka, nyi? Chipwe kanda nuchiwuluka mbolo jitano ja tununu atano ni yize yipakili nwanjile, nyi? 10Chipwe mbolo shimbiali ja tununu awana ni yize yiseke nwanjile, nyi? 11Kuchi te kuchanulumbunukine? Chahanjikile kuli yenu ha kutwala ku mbolo. Alioze keyelenu futunwiso ya A-Fwariseu ni A-Satuseu. 12Mba chaalumbunukine ngwe waambile kukeyela hi futunwiso ya mbolo ko, alioze longeso lia A-Fwariseu ni A-Satuseu.

13Muze Yesu ahetele ku yihanda ya Sesarea-Fwilipu, wahulile tumbaji twenyi ngwenyi, Kuchi atu akunguvuluka yami mwe Mwana Mutu? 14Ambile ngwo, Amwe ngwo, Yoano Chipapachisa; akwo ngwo, Eliya; ni akwo ngwo, Jeremia, hanji umwe wa kuli aprofeta. 15Iye yamba kuli ayo ngwenyi, Alioze yenu, kuchi nwakunguvuluka? 16Semone Petulu wamukumbulwile ngwenyi, Yena uli mwe Kristu, mwe Mwana wa Zambi ya mwono. 17Yesu wamukumbulwile, ngwenyi, Kuwawaha yena, Semone, mwana Yona, musunya ni manyinga kayisolwele kuli yena, alioze Tata yoze uli mu malilu. 18Ni yami nawa ngunambe kuli yena ngwami, Yena uli Petulu, ni ha liwe lino mungutunga chikungulwila chami, ni yajilo ya Heteze kuyichi kakumbaho. 19Kumungukakwaha sapi ja wanangana wa malilu; ni cheswacho mukasa hano hashi kumuchikakashiwa mu malilu: ni cheswacho mukasulula hano hashi kumuchikakasuluka mu malilu. 20Mba wakanjishile tumbaji twenyi kanda amba kuli niumwe ngwo, iye mwe Kristu.

21Chize ku mwaka uze Yesu waputukile kulweza kuli tumbaji twenyi, ngwe chamutamba kuya ku Yerusaleme, nikwivwa lamba linji kuli makulwana ni asasendote akwa lutwe ni akwa kusonyeka, akamushihe, ni ha tangwa liamuchitatu akamuhindwise. 22Petulu wamutwalile ku tenga, waputukile kumwambila ngwenyi, Zambi akuvwile keke, Mwene: chino kuchichi kapwa kuli yena, nichimwe. 23Alioze watewulukilile kuli Petulu ngwenyi, Sosolokako kunyima yami, Satana: uli chitalingiso kuli yami: mumu kushi kunyonga yuma ya Zambi alioze yuma ya atu.

24Hohene Yesu wambile kuli tumbaji twenyi ngwenyi, Kachi umwe mazanga kwiza kunyima yami, akalikale iye mwene, akazundule kulusu yenyi, angukaule. 25Mumu mweswawo mazanga kulamwina mwono wenyi kumakautokesa: alioze mweswawo matokesa mwono wenyi mumu hali yami, kumakauwana. 26Mumu kuchi mutu mafumbuka kachi malipichisa hashi heswe, alioze matokesa mwono wenyi? Hanji kuchi mutu mahana cha kusumbakenya mwono wenyi? 27Mumu mwe Mwana Mutu kumakeza mu uhenya wa Tato hamwe ni angelo jenyi, hohene kumakahana kuli mweswe nikulita ni yilinga yenyi. 28Pundu ngunambe kuli yenu ngwami, Kwali amwe a kuli waze anamana kuno, kechi kumona kufwa nichimwe ndo mamona mwe Mwana Mutu kaneza mu wanangana wenyi.

Currently Selected:

MATEU 16: Csa

Highlight

Copy