MATEU 17

1Kulutwe lia matangwa asambano, Yesu yatwala hamwe nenyi Petulu, ni Tiangu, ni mwanakwo Yoano, yaakandwisa ha mulundu usuku ukawo. 2Walumukine kumeso jo: ku meso jenyi kwapangukile ngwe tangwa ni mahina jenyi apwile atoma ngwe pangu. 3Kumanyi, kwasolokele kuli ayo, Mose ni Eliya, kanahanjika nenyi. 4Petulu wakumbulwile kuli Yesu ngwenyi, Mwene, chinawaha hali yetu kupwa kuno: kachi unazange, tutungenu kuno yisakila yitatu; chimwe hali yena, chikwo hali Mose, ni chikwo hali Eliya. 5Shimbu te machihanjika, lelwa lia kutemuka liaazulaminyine Chizulie, ni liji liatuhukile mu lelwa ngwo, Yono mwe Mwanami, ngunamuzange chikolo, muli iye ngunawahilila; mwivwenu. 6Muze tumbaji achivwile, afulamanyine hashi, evwile chikolo woma. 7Yesu wakundamine, waasele minwe ngwenyi, Katukenu, kanda nwivwa woma. 8Ha kuhetula meso jo, kamwene niumwe, shina Yesu wika.

9Shimbu apalumukine ku mulundu, Yesu waahele shimbi ngwenyi, Kanda nukambulwilae niumwe usolwelo uno ndo mwe Mwana Mutu hahinduka mukachi ka afu. 10Tumbaji twenyi amuhulile ngwo, Kuchi te kevwe akwa kusonyeka akwamba ngwo, Chatamba Eliya kulianga kwiza? 11Aye waakumbulwile ngwenyi, Eliya chamwenemwene mahanga kwiza, neye makalulika yuma yeswe: 12alioze ngunambe kuli yenu ngwami, Eliya haneza kulu, alioze kamunyingikine. Alingile kuli iye cheswacho azangile, chocho nawa mwe Mwana Mutu makevwa lamba kuli ayo. 13Hohene tumbaji anyingikine wahanjikile kuli ayo ha kutwala kuli Yoano Chipapachisa.

14Muze ahetele ku mbunga, mutu wejile kuli iye, nikuliondela kuli iye ngwenyi, 15Mwene, ivwa kama keke hali mwanami wa lunga: mumu musongo wa ngulu kali nawo, kakwivwa lamba chikolo; mumu kanji kakulimbwokela mu kahia, ni kanji mu meya. 16Namuneha kuli tumbaji twe, kahashile kumuwuka. 17Yesu waakumbulwile ngwenyi, Enu chisemuko kuchishi Ufulielo, nwapiya, ndo mwiji muka mungukapwa hamwe ni yenu? Ndo mwiji muka mungukalihumikiza ni yenu? Munehenu kuno kuli yami. 18Yesu wamwambilile; mba ndemoniu watuhukile muli iye; mwe mwana-lunga wahindukile chize ku ola yize. 19Hohene tumbaji ejile kuli Yesu ukawo, nikwamba ngwo, Kuchi te yetu kutwahashile kumutuhwisa? 20Aye yamba kuli ayo ngwenyi, Mumu ha Ufulielo wenu ukepe: mumu pundu ngunambe kuli yenu ngwami, Kachi munupwa ni Ufulielo ngwe lunona wa mosetate, munukamba ku mulundu uno ngwenu, Tutuluka kuno, uye kuze; newo kumuukatutuluka: kunuchi kachisa kenu nichimwe. 21Alioze mulali uno kuushi kutuhuka shina ha kulemba ni ha kulitwamina kulia.

22Shimbu atwamine mu Ngalileya, Yesu wambile kuli ayo ngwenyi, Kumakakunjika mwe Mwana Mutu ku moko ja atu; 23kumakamushiha, mba ha tangwa liamuchitatu kumakahinduka. Evwile chikolo chinyengo.

24Muze haheta ku Kafwanaume, waze atambwile mbongo ja tembele ejile kuli Petulu, ngwo, Longeshi yenu kakufweta mbongo ja tembele, nyi? 25Iye yamba ngwenyi, Ewa. Mba muze anjilile mu zuwo, Yesu wamupatwijile kulutwe ngwenyi, Kuchi unashinginyeka, Semone? Mianangana ja hashi kuli aya akutambula mbongo, hanji lijimu? Shina kuli ana jo, nyi? Shina kuli yilambala? 26Muze ambile ngwenyi, Kuli yilambala, Yesu wambile ngwenyi, Kashika ana kanatusuka. 27Alioze hanga kutuchi kaatalingisa, yako ku Chitende, ukambile kazambu, ukoze yishi yoze mutangu matutuka; mba muze hiwapakula kanwa lienyi, kumukawana lumbongo: ukamumbate, ukamuhane kuli ayo hali yami ni yena.

Currently Selected:

MATEU 17: Csa

Highlight

Copy