MATEU 12

1Ha mwaka uze Yesu wapalikile ha tangwa lia Sambata mu minda; ni tumbaji twenyi evwile zala kashika aputukile kuhulula mitwe ya tiliku akalie. 2Alioze A-Fwariseu muze achimwene, ambile kuli iye ngwo, Tala, tumbaji twe kanalingi chize kuchalitele ni shimbi kulinga ha tangwa lia Sambata. 3Alioze iye wambile kuli ayo ngwenyi, Kunwatangile chize alingile David, muze evwile zala, ni waze apwile hamwe nenyi, nyi? 4Ngwe chize anjilile mu zuwo lia Zambi, walile mbolo ja kutumbieka, jize shimbi kuyamutayijile kulia iye, chipwe waze apwile hamwe nenyi, alioze asasendote wika? 5Hanji kunwatangile mu shimbi ngwe ha masambata, asasendote mu tembele kakutangula Sambata hindu keshi chitela, nyi? 6Alioze ngunambe kuli yenu ngwami, umwe munene Wahiana tembele kuno kwali. 7Alioze kachi nwanyingikine chize muchilumbunuka ngwo, Ngunazange keke hi chitapo ko, kachi kunwahishile waze keshi chitela. 8Mumu mwe Mwana Mutu iye mwene wa Sambata.

9Wakatukile kuze, wanjilile mu sunangonga yo. 10Kumanyi, mwapwilemo mutu ni kwoko lia kusosewa, amuhulile ngwo, Muchilita ni shimbi kuwuka ha tangwa lia Sambata, nyi? Hanga akamusume mutonga. 11Iye wambile kuli ayo ngwenyi, Mutu muka hakachi kenu, yoze mapwa ni panga umuwika, kachi maholokela mu wina ha tangwa lia Sambata, kechi hamukwata ukamuchizemo? 12Mba mutu kahianyine chikolo panga, nyi? Chocho kevwe chinalite ni shimbi kulinga kanawa ha tangwa lia Sambata. 13Hohene yamba kuli mutu ngwenyi, Olola kwoko lie. Mba waliolwele; nelio liahindukile lingunu ngwe likwo. 14Alioze A-Fwariseu atuhukile, amutwamine punga chize mahasa kumwonwona.

15Alioze Yesu ha kuchinyingika wayile kweka, ni mbunga jinji amukawile; waawukile eswe. 16Alioze waakanjishile chikolo kanda akamusolola. 17Hanga chikamanunuke chize ahanjikile ku kanwa lia profeta Izaia ngwenyi,

18Kavumbi kami yoze hingunamutongola;

Ngunamuzange chikolo, yoze muli iye mbunge yami yinawaha:

Kumungukasa Spiritu yami hali iye,

mba kumakambujola upatwilo kuli akwa mavungu.

19Kechi kalitachika, chipwe kechi kakololoka;

mba niumwe kechi kevwa liji lienyi mu matapalo.

20Lumbungu wa kufwenya kechi kamumakuna,

ni #12.20 Muya wa ndeya uze Kuwatemukine Kanawa.wanda wa kuneha mwishi kechi kaujima,

ndo masolola upatwilo ukakumbe.

21Ku jina lienyi akwa mavungu kumakatalatala.

22Hohene anehene kuli iye umwe mukwa ndemoniu, kapuputa kanda kamama, wamuwukile, chocho kapuputa kanda kamama wahanjikile, wamwene. 23Ni mbunga jeswe alishikishilile, ambile ngwo, Yono mwe mwana David, nyi? 24Alioze muze A-Fwariseu achivwile, ambile ngwo, Yono keshi kutuhwisa andemoniu shina ni tachi ja mwata wa andemoniu. 25Alioze Yesu ha kunyingika manyonga jo, wambile kuli ayo ngwenyi, Wanangana weswe munuhandununa wene kumakaupwisa uhululu; limbo lieswe hanji zuwo lieswe mulihandununa liene kulichi kukola. 26Kachi Satana matuhwisa Satana, kachi malihandununa mwene; ngwe kuchi kevwe wanangana wenyi muukola? 27Kachi yami nakutuhwisa andemoniu ni tachi ja Mbelezepu, anenu a malunga ni tachi jaya akwatuhwisa? Kashika makapwa akwa kunupatwila. 28Alioze kachi yami ni tachi ja Spiritu ya Zambi nakutuhwisa andemoniu, kachi wanangana wa Zambi hiuneza hali yenu. 29Hanji ngwe kuchi umwe mahasa kunjila mu zuwo lia chitakame nikupunda yikwata yenyi shina hatangu makasa mwe chitakame? Mba mapunda liakulu zuwo lienyi. 30Yoze keshi hamwe ni yami, kanalimika ni yami; yoze keshi kukunga hamwe ni yami, kanamwanga. 31Kashika ngunambe kuli yenu ngwami, Mulonga weswawo ni kushililika cheswacho kumakaakonekenacho atu, alioze kushililika Spiritu Musandu kechi kaakonekenacho atu. 32Mweswawo mahanjika liji lia kulimika ni mwe Mwana Mutu, kumakamukonekenalio; alioze mweswawo mahanjika cha kulimika ni Spiritu Musandu, kechi kamukonekenacho, chipwe ha mwaka uno, chipwe ha uze muwizaho.

33Pemesenu mutondo, ni mihuko yawo muyipwa yipema; hanji pihisenu mutondo ni mihuko yawo muyipwa yipi: mumu mutondo kanaunyingika ku mihuko yawo. 34Enu, vungu lia yihili! ngwe kuchi munuhasa kuhanjika yipema se nuli yingulungulu? Mumu ku kulumbama cha mbunge kanwa mulihanjika. 35Mutu mupema ku upite upema wa mbunge masolola yuma yipema: ni chingulungulu ku upite wa ungulungulu wa mbunge masolola yuma ya ungulungulu. 36Alioze ngunambe kuli yenu ngwami, Liji lieswe liamokomoko lize atu mamba, kumakalilumbununa ha tangwa lia upatwilo. 37Mumu ku maliji je makakusambisa, ni ku maliji je makakuhisa.

38Hohene amwe a kuli akwa kusonyeka ni A-Fwariseu amukumbulwile ngwo, Longeshi, tunazange kumona chilayi kuli yena. 39Alioze waakumbulwile ngwenyi, Chisemuko cha ungulungulu kanda cha utanji muchifupa chilayi; ni chilayi kechi kaahacho shina chize cha profeta Yona: 40mumu chizechene ngwe Yona wapwile matangwa atatu ni ufuku utatu mu jimo lia yishi munene; chocho mwe Mwana Mutu kumakapwa mushi lia mavu matangwa atatu ni ufuku utatu. 41Ha upatwilo akwa Ninive kumakakatuka hamwe ni chisemuko chino, o makachihisa: mumu alikonyekene ha kwambujola cha Yona; mba, umwe Wahiana Yona kuno kwali. 42Ha upatwilo mwanangana wa pwo wa ku Sule kumakahinduka ni chisemuko chino, mba makachihisa: mumu iye wakatukile ku masongo a hashi mukwivwa mana ja Solomone; mba, umwe Wahiana Solomone kuno kwali. 43Alioze Spiritu ya luchisa muze te hatuhuka muli mutu maya ndusu muma mumu, nikufupa uhwimino, alioze keshi kuuwana. 44Hohene mamba ngwenyi, Munguhiluka ku zuwo liami muze natuhukile; mba muze te heza, maliwana liawashi, lia kukomba, lia kupemesa. 45Hohene maya, matwala hamwe nenyi maspiritu eka shimbiali a ungulungulu ahiana iye mwene, manjila, matwamamo, ni songo lia yoze mutu mulihiana kupiha. Chizechene kumuchikapwa nawa ku chisemuko chino cha ungulungulu.

46Shimbu te machihanjika ku mbunga, kumanyi, naye ni ana-akwo amanyine haze nikufupa kuhanjika nenyi. 47Mba umwe wambile kuli iye ngwenyi, Tala, noko ni ana-akwenu kanamana haze kanafupu kuhanjika ni yena. 48Alioze iye wakumbulwile yoze wahanjikile nenyi ngwenyi, Mama iya? Ana-akwetu aya? 49Wenyikine kuli tumbaji twenyi, ngwenyi, Talenu mama ni ana-akwetu. 50Mumu mweswawo malinga upale wa Tata yoze uli mu malilu, iye mapwa mwanakwetu ni pangiami ni mama.

Currently Selected:

MATEU 12: Csa

Highlight

Copy