Markus 14

Nongen le ngendian ad Jesu.

1Bing maruo muren su bo gous le ndurme le suslong. Su ndurhian, su ndremda bohernou be su ge behenou i Jesu, be su ga rii i. 2Su bode: Mbue de du ga ri i gir margous, debosan su lao adu su gob iil ndro du.

Heb gous ber Betanien.

3Jesu i da Betanien i da um ad Simon, mandrn momen ge. Su ian gan, hom bihin hedi ndran ngohodonreen i rebohoueni bobiri, ilgi ndran le mburbalen. 4Su holel ndrnesu i mah su boi: Desa su robieni ndran ngohodonreen molhe dagara? 5Hian su gilgi gle moni madilingad, su ghengen su gleri longu asu bui. Su bangondrngondr aden. 6Jesu i boi: Desa mu bangondrngondr aden, i girge. I bo memrad hian me ndro io. 7Su ndramed longu asu bui, so do da ge ndro mu sidesi, be mu gob memrad hian me ndro su, mu ghineni ge. Io or ndro mu heb eluen bui. 8I bo longu hian i vonei aden, i genouni io gle ngad. 9Ndangen io boi me ndro mu: Le gor masigane su bohernou Nongen Helian ri, su hanguruen i bihin, i bo memrad hian me ndro io. 10Boen Judas Isgariot i homo asu masongul e rumou la ndro su ndurhian, beg hevani Jesu le ndro su. 11Su hirong i, su mugmug be su ghengen i gle moni. Muren Judas i da bogulue Jesu beg ilgi gle ndro su.

Gous ad Jesu le ndurme e suslong.

12Bing le gous asu meher, su lao ad Jesu su ndemani i: Voamiso sa, du gain ndurme anu girn oho? 13I rendegien sor lao aden marmou i boi le asoro: Mor gal gor, mor gu sohal hom gamel i hedi lumiandran le hauen mor gorndrbon. 14I gle um hom mor gabui gle ad ndramed ber um, mor gabde: Ndorlaben i ndemani uo, um i da oho io gle bo gous leri ma su lao ordo. 15I bosilien um hom me ndro mor, longu masi i dari, boen mor sueri gous adu. 16Sor lao aden sor la, sor me gor, sor danoni longu dege Jesu gin boi; su dueni ndurme ge i roh.

17Ibia Jesu ma su masongul e rumou su me. 18Su im boan su ian gan, Jesu i boi me ndro su: Ndangen io boi me ndro mu: Homo ademu i ian gan ordo na gi hevani io. 19Ndrnesu irgu su ndemani i, homo i bode: Io ie? Homo i bode: Io ie? 20Jesu i vong le ndro su, i boi: Homo ademu i gilgi nemen le ndrugou le bor nemo. 21Ndurndramed na gmed dege su hondre dugian, i ndramed i hevani Ndurndramed gina momen! Hian mbue de gmeher ndrnen nanen. 22Su ian gan, Jesu hedi suslong le nemen i bo lodu leri, boen i iendri hengen su lao aden i bode: Mu ghedi mu gu ni, ogo mondro. 23I hedi lumiandrunvain i bo lodu leri, hengen su, su masi su ilmui. 24I boi: Ogo ndrai ordo le regunha Jehova su gharngeni me asu mabosanged. 25Ndangen io boi me ndro mu: Io de ilmui ndrunvain bui lie, muren io gu ilmui lie mahauen le gor ad Jehova.

Soling ad le Getsemane.

26Su bosoui Nongen Helian, boen su iao la bahali, ngarn Oliva. 27Jesu i boi me ndro su: Lobing mu masi ndrnemu i mah ordo, dege su hondre goru: Io gu rii hian asu, su masi su vob, su do da masumbue ge. 28Muren io gedne lie, io gle hanu le Galilea. 29Petrus i boi lie: A su masi ndrnesu i mah adem, io ge bugane. 30Jesu i bode: Ndangen, io boi me ndro uo: Lobing ogo goho ma de dang maberuo masou uo bieni io maberdolo, uo abde uo danem io bui. 31Petrus i boi le nongen ndoun: Gle su ga rii io, iour gamed bersi ge, io de bieni uo bui. Su masi su boi dagara.

32Su me beleng hasl, ngarn Getsemane. Jesu i boi le ndro su lao aden: Mu gim la boan, io gla hebe io gle vong le ndro Jehova. 33Hedi Petrus, Jakobus e Johanes su iao, i rerr i noh. 34I boi me ndro su: Meluo baghege na gmed, mu gorla mu gor belengeni io. 35I le heb lendi, i godurhu i ndemani Jehova, Jehova na gsobani i le longu momen. 36I bode: Aba, Domo, uo ndoa longu masi, e rumburdi io, gle uo mbuerem io gorge, i da ge ndro uo. 37I la ndro su su medir ge, i boi le ndro Petrus: Simon uo da medir? Uo danem bui or belengeni io heb mandehege? 38Hian mu gor mamed ge, mu gvong le ndro Jehova, debosan Satan i la silieni mu, meluamu hian, mandrmu heb ndoun bui. 39Jesu i la heb lendi lie, i vong me ndro Jehova lie le nongen dagara. 40Boen me ndro su lie, su medir ge, begmarsu i beb le ge mediriu, dansu nongen asu bui. 41I me maberdolo i boi le ndro su: Hisa na mu gmedir eruar? Mosen, su gin meher. Su gilgi Ndurndramed gle nemesu ndramed momen. 42Mu ge dne, du gao. Ndramed i beg i hevani io, gin mehere.

Su hosi Jesu.

43Malabo i da vong ndon, Judas i homo asu masongul e rumou i meher ma su lao mabosanged asu ndurhian, su ndremda bohernou, su labenen, mordo borla e gagao i da nemesu. 44Judas gin bai me ndro su, gin bode: Homo io bogarni i, aga Jesu, mu boro i, mu ghosi i ndoun. 45I me ndro Jesu, i boi: Ndorlaben, Ndorlaben, i bogarni i. 46Su daui nemesu le ndro Jesu su boro i. 47Homo asu su da baghege hedi mordo borla aden beg rii hom lao ad ndurhian, i sehi delengan ge. 48Jesu i vong me ndro su, i bodeie: Mu gmeher derbe le berlou le mordo borla, io hom daiandramed? 49Bing si rang si io da ge numo lodu ademu, io henunuen mu, mu de boro io bui. Dagara i vonei nongen ad Jehova. 50Su lao ad Jesu su bieni i, su vob. 51Hom ge irndrbon, salo hendre ge i da mandrn, be su beg boro i, 52i bieni salo aden i vob ge molhe. 53Su dulieni Jesu le ndro ndurhian asu, su labenen su ndremda bohernou masi su me ge goure. 54Petrus irndrbo su manan, i me le gor ad ndurhian i lugdo im born ndro su lao asu, su min mandrmoan. 55Ndurhian e su hian masi, su gahi nongen be su ga rii Jesu leri, su de danoni longu hendre bui. 56Su mabosanged su me bahilou ge le Jesu, nongen asu heb monen bui. 57Su holel su dne su bahilou, su bodeie: 58Iou da hirong i, Jesu i boi: Io gu ndumbue numo lodu ademu su huri le nemesu ndramed ge, bing madolo io ghurdi um hom mahouen su de hinen i de la nemesu bui. 59Nongen asu lie de monen bui. 60Ndurhian asu i dne i meher dogrosu i ndemani Jesu i bode: Uo de vong de la ndro su bui? 61Jesu i simge, i de vong de la ndro i bui. Malabo ndurhian i ndemani i lie, i bode: Uo derbe, uo Kristo Ndur Jehova du bamugueni? 62Jesu i boi: Io ie! Bersi mu gilndri Ndurndramed i lugdo le nemen sengen ad Jehova, i gmeher le ndoulang. 63Ndurhian i mbuserei salo i bodeie: Hisa io ndemani su le nongen ad Jesu lie. 64Du masi du gin hirong i, i boii Jehova. Mu bode sa? Su masi su da dieni, na i gmed. 65Su degen su rogumbunhi i, su smoi begmarn le salo, su daii i le budnemesu su boi: Al bohernou me ndro du. Su lao asu su da rii i.

66Petrus i da lobohonum, hom bihilou ad ndurhian i me. 67I ilndri Petrus i min moan, i lele le ndro i, i bode: Uo hom lao ad Jesu ber Nasaret. 68Petrus i boi loldi i boi: Io dono i bui, io dono nongen adem bui. I iao le marbohonum si, goho i reng. 69Hom bihilou ad ndurhian i ilndri, i boi le ndro su lie: Aga homo asu. 70Petrus i boi loldi lie. Heb mandehe muren su masi su boi le ndro Petrus; Ndangen, uo homo asu, uo hom Galilea, nongen adem i boharni. 71Petrus i berngai, hinen nongen bolhe i bodeie: Io dono i bui mu do da vong sa? 72Malabo goho i reng lie, Petrus hanguruen nongen ad Jesu: Goho ma de dang maberuo masou, uo gin bieni io maberdolo. Petrus hanguruen i, i reng manden.

Currently Selected:

Markus 14: LLENT

Highlight

Copy