Markus 15

Jesu i la ndro Pilatus.

1Mabing ge mandourang su ndurhian ma su labenen su ndremda bohernou su hian masi su vong le goure, su hosi Jesu su dulieni le ndro Pilatus. 2Pilatus i ndemani i: Uo ndorlaben asu Juda? Jesu i vong i bode: Uo abui. 3Su ndurhian su hur nanenongen. i de vong bui. 4Pilatus i ndemani i lie i bodeie: Uo de vong mul bui? Uo de hirong bui su hur nanenongen? 5Jesu i de vong mul bui, melua Pilatus i ieb leri le. 6Uru si uru si su hur gous asu manden. Pilatus i rumburdi homo ir kalabus dege voasuiso ad homo. 7Malabo homo ir kalabus ngarn Barabas i hangaini Kiap, i rii hom ndramed le il. 8Su ndramed la ndro Pilatus su ndemani i, a i grumburdi homo lie. 9Pilatus i bodeie: Desa, voamuiso ad Jesu i ndorlaben asu Juda? 10I danen le dieni asu ndurhian momen, su mamalo ad Jesu ge. 11Su ndurhian su ndouo le nongen le ndro su ndramed su bodeie: Du ge ndemani i le Barabas. 12Pilatus i vong mul lie i bodeie: Hisa, io gbo sa gle ndro Jesu, mu bode i ndorlaben asu Juda? 13Su lug bohosu manden su bodeie: Ar dehe gle beldigei. 14Pilatus i boi: Desa i hinen sa momen? Su lug bohosu manden ge lie, su boi: Ar dehe gle beldigei. 15Pilatus beg i hirong nongen asu, ilgi Barabas me ndro su, su polisman su daii Jesu le ndelgi, boen i dieni, su dadehe le beldigei. 16Su polisman su huri Jesu me lundieum, su loh su masigane. 17Su lug salo ramen le mandrn, su da dehien borndrui le balen, 18su godurhu me ndro i su bodeie: Hian uo ndorlaben asu Juda. 19Su mur balen le vusu su rogumbunhi i, su godurhu lie, su bo lodu me ndro i. 20Su hal i dagara, boen su hur salo ramen lendi su daui salo aden lie, su huri be su gal dadhe i gle gei.

Su dadhe Jesu le gei.

21Hom ndramed ngarn Simon ber Kirene damen Aleksander e Ruvus i sohal ndro su, su boro i su ndoun aden le sab gei ad Jesu. 22Su me bahali si, ngarn Golgata, i vonei logna bobalen le nongen adu. 23Be su ghedi ndrunvain me ndro i, Jesu i mbueren i gilmui. 24Su dadhe ir gei su hur salo aden su ha lug le asu, homo hedi hasl, homo hedi hasl. 25Mernal ma de me belengan i ma de masar. 26Su gin hondre longu aden se da gei mburbalen: OGO KING ASU JUDA! 27Su dadhe sor marmou la born ndro Jesu, sor daiandramed homo ir gei aden le nemen sengen, homo ir gei aden le nemen gameao. 28Dege hom lao ad Jehova gin hondre dugian: Su dou Jesu le born ndro su daiandramed. 29Su masi su dogi ri, su habai i Jesu su hal aden su bodeie: Nongen adem derbe, uo mbuserei numo lodu adu e mengseni houen bing ge madolo? 30Hian e sobani uo, am boan e bieni gei. 31Su ndurhian, su ndremda bohernou su hal aden dogoro su bode: Goru i sobani su mabosanged, malabo i danen le sobani i bui. 32Gle i Kristo, Ndorlaben adu Israel, hian i gme boan i bieni gei, io ge ilndri iou ga lao aden lie. Sor marmou, sor da gei sor boii i lie.

33I mesar gor i ndrogum sumburdi, i roh ibia. 34Ibia Jesu ilgi bohon manden i bodeie: Eli, Eli, Lama Sabagdani! I vonei: Ndorlaben ordo, Ndorlaben ordo, desa uo gin bieni io ie? 35Su da baghege su hirong i su bode: I loh Elias. 36Homo hilou hedi longu si, lumiandrunvain, hedi gle ndre bermenda ilgi me ndro Jesu, Jesu i iin. I ndramed i boi: Du ge ilndri la, Elias me boan e rumburdi i de bugane? 37Malabo Jesu ilgi bohon manden, i med. 38Salo mandromai le babi le um ad Jehova i mbuser le ge marndre ber belengan me boan. 39Polismaster asu i da gulue Jesu, i ilndri i med dagara, i bodeie: I ndramed ogoro, i Ndur Jehova ndangen! 40Su bihin degen su lele ber manan, homo asu Maria Magdalena, hom lie Maria nanen Jakobus sor Joses ma Salome, 41su da ndrbon le gor Galilea, su hengen i, su bihin mabosanged lie su do da ndrbon su la Jerusalem.

Su doni Jesu le ngad.

42Mernal beg le lol, bing manona, sabbath mo, 43Josev ber Arimatia hom labenen asu i hian, i belengen longu ad Jehova le, de noh bui, i le ndro Pilatus i ndemani i le numbuen Jesu. 44Pilatus i danen bui Jesu ginemad, i loh polismaster, i ndemani i, i med gehere. 45I gin hirong ndro polismaster ilgi numbuen Jesu le ndro Josev. 46Josev gin semani salo hian, hedi Jesu le boan i nhui le salo, ilgi le ngad si su da ro i le bad, su da durngi ngaibad le bad si. 47Maria Magdalena e Maria nanen Joses sor do lele su dou i derbe.

Currently Selected:

Markus 15: LLENT

Highlight

Copy