Markus 16

Jesu i dne le ngad aden.

1Sabbath asu bomud, Maria Magdalena, Maria hondonreen, be su gilgi le bor salo me ndro Jesu. 2Su me ngaibad mabing ge, mernal gobad. 3Su vong ie goure su bode: Sie girbei bad le marbongai? 4Su lele su ilndri, bad gineao, bad mandromai. 5Su la lundiengad su ilndri hom ulhou i dari, salo aden beren deluen, meluasu i ieb. 6I boi le asu: Mbue mu go noh! Mu gahi Jesu ber Nasaret su dadhe ir gei: I gin nde gineao. Ogo lognan su gin daui gin me ri. 7Mu gaiu mu gal bai gle ndro su lao aden e Petrus, Jesu le Galilea hanu, mu gal ndro i, gilndri, dege i boi me ndro mu goru. 8Su hilou lendi, su vob ngaibad noh asu soln su rerr. Su de bai de la ndro su bui su noh manden.

Jesu i mbsig le ndro Maria ma le ndro su lao aden.

9Jesu i gin dne mabing ge i me hanu ndro Maria Magdalena, goru i robuldi beld manondrdolo ir ndren. 10I bihin i iao i boi le ndro su lao aden su do da ndon su do da dang. 11Su hirong i Jesu i maren, gin me ndro i, su de hirong nongen aden bui, su bode i bahilou ge. 12Muren sor marmou asu sor la gor hoger, Jesu i meher me ndro sor le mandrn hendre lie. 13Sor la ndro su lie sor boharni me ndro su, su de hirong nongen asor ge bugane.

14Boen su masongul e homo su mi da gherong le gan ansu, Jesu i me ndro su i boii su, golsu ndoun, su de hirong nongen asu bui su boi su ilndri Jesu i gin dne. 15I boi le ndro su: Uomu gal gor masigane, mu ghenunuen su ndramed masi le Nongen Helian. 16Su hirong nongen ademu, mu gsurhi su le ndran, su do da hian gane; su de hirong nongen ademu bui su da dieni su, su momen gane. 17Jehova ilgi ndoui me ndro su, su hirong nongen aden, su robuldi beld le ngoro, su bohernou le nongen houen, 18ndrondrhun i vob ndro su, a su ge ilmui longu dungian su de so mad bui; su daui nemesu ie balsu ndramed iab e beld i rii su, su maren lie.

Jesu i gobad gor lundielang.

19Nongen ad Ndorlaben Jesu boen, i voh le lundielang, i lugdo le nemen sengen ad Jehova. 20Su lao ad Jesu su iao, su la bohernou le gor masigane, Ndorlaben i ndoa le asu, nongen asu ndoun ma gelman ber lang.

Currently Selected:

Markus 16: LLENT

Highlight

Copy