Lukas 18

Heb nongen le bihinou i da soling.

1Boen i vong le ndro su heb nongen dohongein lie, beg henunuen su, su da gob lodu ndro Jehova sidesi, mandrsu de berad gleri bui. 2I vong le ndro su, i bai: Hom ndremda gord i da le gor si, i de noh Jehova hebsa bui, i de hanguruen su ndramed heb monen bugane. 3Hom bihinou i da le gor ogo i la ndro ndremda gord ogo bersi, ma bersilie, i vong le ndro i, i bai: Osbani io, ndremda rah ordo beg bo momen ndro io. 4I mburen sobani i eluen, boen i gin hanguruen le bergoln: Io de noh Jehova hebsa bui, io de hanguruen su ndramed bugane. 5Mondro i berad, delengo i nendi le nongen ad bihinou ogo, io beg sobani i, debosan ndrnen i ma le ordo i grii io. 6Boen Ndorlaben i vong le ndro su, i bai: Ha hirong nongen ad ndremda gord momen ogo! 7Jehova de danen sobani su lao aden bugane, su da reng le ndro i lobing e lorang? Ndangen su ir belengeni Ndorlaben eluen. 8Io boi le ndro mu, i osbani su ndangen, i gmeher ndro su roud. Ar Ndurndramed i gmeher lie, su ber boan dansu boro ndoui aden ie?

Nongen dohongein le ad hom Pharisi ma hom ndramed momen.

9Boen i vong le ndro su holel, su da gin hanguruen le bergolsu su dogi monen sal lundielang, ma su hanguruen momen gle asu ndramed, su da baghege ndro su, i vong, i bai: 10Sor gamel marmou gina le um ad Jehova, beg lodu, homo asor i hom Pharisi, homo i hom ndremda moni, ndramed momen ge. 11Pharisi i la dagara, i lodu le ndro Jehova i bai: Jehova, io bamugueni uo, io dege su ndramed ber boan bui, io hom daiandramed bui, io hom ndremda bahilou bui, io hom ndramed behena bugane, io de bo sungsou bui, io dege ndramed i da le horo bugane. 12Io bandri maruo le bing manondrdolo si, io hengen le ndro Jehova heb le gan ono masigane, heb gle memrad ordo. 13Ndremda moni i da le horo, manan hebe, de danen dendrai le belengan bui, i rii mandrn, i vong, i boi: Jehova ibdi gahaloseli me ndro io, golmgisden io. 14Io vong le ndro mu: Ndramed ogo i mul le um aden bergoln i rosan ge, i monen gane. Pharisi dagara bui. Homo i lengi, i hanu le asu masi, Ndorlaben ir ndounen i; homo i da hanguruen molhe gle aden, Ndorlaben i hinen i gle labenen.

Jesu ma su mbunana.

15Su ndramed huri su mbunana mandehe le ndro i su leng i dori su, su lao aden, su sendraini su, su vong nongen ndoun le ndro su. 16Jesu i loh su mbunana, i vong, i boi: Su mbunana, su gme ndro io, mbue de sendraini su. 17Gor ad Jehova i asu, ndangen io boi le ndro mu: Ar homo de boro gor lundielang dege su mbunana ogo bui, de meher le gor lundielang bugane.

Jesu ma hom labenen.

18Boen hom labenen la ndro i, i ndemani i, i boi: Uo Ndorlaben hian ge, sehe longu io ghinen i, io la lundielang gleri. 19Jesu i bodeie: Desa uo vong, io hian ge, homo i de hian bui, Jehova ge, i hian. 20Uo danem nongen ad Jehova: Mbue sungsou, mbue rii homo, mbue behena, mbue aburei, or gulue dam, or gulue nanem. 21Boen i bode: Nongen ogo io gin hinen i boen sumburdi gle mbunana ge. 22Ar Jesu gin hirong i, i bodeie: Longu hendre masou: E sim memrad adem masi la hengen moni gle ndro su, heb memrad asu bui. Boen memrad adem i da gor lundielang. Gme ndro io, ir ndrbo. 23Be i gin hirong nongen ogo, ndrnen i gosusngo, memrad aden dsoln. 24Be Jesu gin ilndri i, i boi: I beruan manden le ndro su, memrad asu dsoln, le dogi le gor lundielang. 25Hom ndramed la ngaiduboi hanu, le ndramed memrad aden dsoln la gor lundielang. 26Su da gin hirong nongen aden, su vong le ndro i su boi: Sie i danen dogi le gor lundielang? 27Jesu i bodeie: Su ndramed de dansu i bui, Jehova i ndoa le sobani su gleri.

Heb nongen le surian mburer ad Jehova.

28Boen Petrus i vong: E lele, iou gin bieni 29Jesu i vong le ndro su, i boi: Ndangen io boi le longu adu masigane, iou la sal adem, iou ir ndrbom. ndro mu: Ar homo i bieni um aden, le nambulen, de ndern e bison, de damen e nanen, de ndurn gle mburer ad Jehova, 30Jehova i surien longu aden masi le gor ogo, ma i hengen le ndro su gor lundielang bersi muren.

31Boen Jesu i hedi su masongul e rumou glendi, su ge, i vong le ndro su, i boi: Iou gobad le gor Jerusalem malabo, longu masi na gmeher, dege su Provet ber goru gin hondre gle ad Ndurndramed. 32Su daui i le nemesu Haiden, su boii i, su grii i, su rogumbunhi i. 33Boen su rii i gle vosu, boen su daii i. Madolo muren i gedne lie le ngad aden. 34De dansu nongen ad Jesu bui, de dansu i bui, sehe longu Jesu i gin bosoui gle nongen aden.

Jesu regurdueni hom ndramed, begmarn bui.

35Su meher bage le gor Jerigo, hom ndramed, begmarn bui, i da mandrgos sal, i soling. 36Be i gin hirong i, su ndramed mabosanged la sal, i ndemani su, aga i vonei sa. 37Su vong le ndro i, Jesu ber Nasaret i me dala. 38I loholo, i boi, Jesu, Ndur David, golmgisden io. 39Su da dogi hanu, su sendraini i, i simge. I de hirong nongen asu bui, i loholo ndoun, i boi: Ndur David, golmgisden io. Malabo Jesu de dogi bui, 40i boi, su gdulieni i gle ndro i, be i gin meher baghege ndro i, Jesu i ndemani i, 41uo ha lengi sa ie? I bode: Ndorlaben, io beg lele hian lie. 42Jesu i bode: Begmarm greu, uo da gin boro ndoui ordo, i gin sobani uo. 43Malabo ndramed ogo i danen lele hian, i la born ndro Jesu le sal, i mugueni Jehova. Su ndramed masi su da gin ilndri gelman ogo, su bamugueni Jehova.

Currently Selected:

Lukas 18: LLENT

Highlight

Copy