Lukas 19

Jesu i da le um ad Sageus ber Jerigo.

1Boen Jesu i la gor Jerigo, beg bieni i lie. 2Hom ndramed i da le gor ngarn Sageus. Ndurhian asu ndremda moni, memrad aden mabosanged, 3i beg ilndri Jesu ge, su ndramed mabosanged su da le mandrgos sal su da besbas, i hom ndramed murai ge. 4Malabo i hilou heb sal i nges gei heie beg ilndri Jesu. Jesu beg meher le sal ogo. 5Be Jesu gin meher i lele, i ilndri, i vong le ndro i, i boi: Sageus, am boan roud, io la um adem eruar. 6I la boan roud, i somui ri, i mugmug ge. 7Su masi, su ilndri i, su bangondrngondr ndoun, su vong, su boi: I la um ad hom ndramed momen ge, beg medir ri. 8Sageus i la ndro Ndorlaben, i boi: E lele, Ndorlaben, sehendr ber memrad ordo masi io beg hengen le ndro su, memrad asu bui, be io gin behena, io beg surien i maberhahu. 9Jesu i vong le ndro i, i boi: Um ogo i horuan ge range. I ogo, i ndur Abraham lie. 10Ndurndramed gin meher, beg gahi su, beg rumburdi su, su da gina momen, su gina malold.

Heb nongen dohongein gle memrad ber boan.

11Jesu i vong le ndro su heb nongen dohongein, su da hirong nongen aden. I da baghege le gor Jerusalem, su hanguruen gor ad Jehova beg meher malabo. 12I vong, i boi: Hom labenen gin dogi le gor manan, su ber manan beg hinen i le ndurhian asu, boen i beg mul le gor aden lie. 13I loh su lao aden masongul, i hengen le ndro su pound masongul, boen i vong le ndro su, i boi: Ghedi moni ogo, gob mburer leri, io beg dogi le gor manan. 14Su ndramed ber gor, ndrnesu i mah aden, su rendegien nongen le ndro i, su vong, su boi: Iou mbuere ndramed ogo i ndurhian adu. 15Bersi muren, be su ber gor manan gin hinen i le ndurhian asu, i gin mul le gor aden. I loh su lao aden, i da gin daui moni le nemesu, beg ilndri, su da gin bo mburer hian le moni aden de bui. 16Homo gin meher ndro i, i vong le ndro i: Ndorlaben, pound adem io da gin bo mburer leri, i gina le pound masongul, adem ge. 17Ndorlaben i bodeie: Uo lao ordo hian monen ge, uo da gin bo mburer monen le heb memrad ordo molhege, io beg hinen uo le ndorlaben asu gor masongul. 18Boen homo i gin me, i boi: Ndorlaben, io gin bo mburer le pound adem i gina le pound malima, adem ge. 19Ndorlaben i bode: lo beg hinen uo gle ndorlaben asu gor malima. 20Homo gin meher lie i vong, i boi: Ndorlaben, pound adem si ge gorbo, io gin nhui le salo, io gin gorni i hian. 21Io noh adem, io dono, uo homo ndoun ndoun ge, uo beg hurdi, uo de gin daui mahanu bui, uo beg huri me goure, uo de gin daui heb sengen le boan bugane. 22-23Ndorlaben i bode: Io beg dieni uo gle nongen adem, uo lao momen ge, uo danem io homo ndoun ndoun ge, io da hur memrad asu me ordo? Io da huri me geherong gan le beleng asu io de gin dou leri bugane ie? Desa uo de gin hedi moni ordo, gin daui le um moni bugane, malabo io dono hedi i ma ndurmoni la born, ordo lie? 24Boen i vong le ndro su lao aden su da baghege: Hedi pound aden giao, ghengen i le ndro lao ordo, pound aden masongul. 25Su bode: Ndorlaben, pound aden masongul, aga dsoln aden ge. 26Io boi le ndro mu: Su ghengen le ndro i, memrad aden dsoln, homo memrad aden heb dsoln bui, su ghedi memrad aden hebe giao. 27Su ndremda rah ordo mbueresu io ndurhian asu, mu ghosi su, mu grui su, su gmeher ogo, mu gdaii su gle begmoro.

Jesu la gor Jerusalem.

28Nongen aden boen, Jesu i dogi le sal i gobad le gor Jerusalem. 29I da baghege le gor Bedvage e Betanien, i gin meher baghege le bahali Oliva. Malabo i rendegien sor lao aden marmou, 30i vong, i boi: Mor gal gor mandehe gorda, mor gal ri, mor gal danoni ndur donki, hom ndramed gin lug mi donki masou, rumburdi i, dulieni me ndro io. 31Ar homo ndemani mor, desa mor grumburdi donki? Mor bode: Ndorlaben ie lengi. 32Sor marmou gina, sor gin ilndri longu masi, dege Jesu gin bai. 33Su beg rumburdi ndur donki, ndramed donki ogo aden ge, i vong le ndro sor: Desa mor rumburdi donki la? 34Sor bode: Ndorlaben ie lengi. 35Boen su hur donki le ndro Jesu, su daui salo asu ndre donki, boen Jesu lugdo mi donki. 36Su da le sal, su ndramed daui salo asu le sal. 37Su gin me baghege le bahali Oliva, su ndramed masi su loholo ndoun, su mugmug manden, su mugueni Ndorlaben le gelman masi, su da gin ilndri. 38Su vong su bai: Iou bamugueni i, i da meher le ngarn ad Ndorlaben, i King manden ge! Hosianna ber belengan! 39Su holel asu Pharisi, su da dogrosu ndramed, su vong le ndro Jesu, su boi: Ndorlaben, sendraini su lao adem nongen dagara. 40I bode: Io vong le ndro mu: Be su de loholo bui, su bad su loholo ri.

41Boen i gin me baghege le gor, be i gin ilndri i, i reng. 42Boen i vong: Desa uo gin hanguruen rang adem hian bui, ar su beg lug beno. Malabo Ndorlaben i ndrodhi longu hian ber lang. 43Rang i gmeher ndro uo, su ndremda rah adem su gulmuni gor adem, su gob iil le ndro uo ndoun ndoun. 44Su la gor, su ndumbue i sumburdi, bad maruo de besbas bui, su ghedi su ndurm, su gbien i gle bad. Aga uo de gin hanguruen rang adem hian range le golnisden ad Jehova hebsa bugane.

Jesu robuldi su le um ad Jehova.

45Boen i la um ad Jehova, i robuldi su ndremda simsim su dari, 46i vong le ndro su, i boi: Nongen Helian i da le Buk, su gin hondre: Um ordo ber lodu ge, mu gin hinen i le logna daiandramed. 47Boen i henunuen su le um ad Jehova. Su ndurhian, su ndremda hernou, ma su labenen ber gor, su beg daii i. 48De dansu i bui, su ghinen i derbe. Su ndramed masi su la born ndro i, su hirong nongen aden ge.

Currently Selected:

Lukas 19: LLENT

Highlight

Copy