Lukas 17

Heb nongen le ndro su lao ad Jesu.

1Boen Jesu i vong le ndro su lao aden: Su ndramed ber gor boan su seslaini homo ma homo le longu momen; ndramed homo i gina momen ge, i da ghinen i dagara. 2I hian le ndro i, su hosi bad manden gle golen, su gbieni i le ndas manden, ar i seslaini homo asu ndramed molhege ogo. 3Gobgulue meluamu. Ar nderm gin bo longu momen le ndro uo bosoui le ndro i, ar i reng le longu aden momen, golm i ndud gleri. 4Be i gin bo momen le ndro uo maberndrdolo le bing si, i gmeher maberndrdolo le ndro uo, i vong i boi: Io gin hinen longu momen le ndro uo, golm i ndud longu aden momen giao.

5Su Apostel su ndemani Ndorlaben: Ghinen i, dandu boro longu ber lang ndoun ge. 6Ndorlaben i bodeie: Ar danmu boro ndoui ordo heb ge mandehe, boen mu vong le ndro gei heie ogo: Edne, alndi giao gle ndas, i delengan le nongen ademu. 7Sie ademu, lao dandendegei aden i da gin bo mburer le beleng, de gin bogulue bulmagou aden, be i gin mul le um ad laben, ndorlaben i vong le ndro i, am roud lugdo im logna adem, le mandrgosgeao ordo? 8Bugane, i vong le ndro i, i boi: Gob mburer le gan ono hanu, boen uo daui salo adem, daui gan gle geao ordo, io beg ien, io beg ilmui hanu, boen uo danem ien gan anem lie. 9I de mugueni lao aden bugane, be i da gin mburer aden dege ndorlaben gin bai. 10Mu dagara lie, ar mu gin hinen mburer ademu boen, dege ndorlaben gin bai, mu vong: Iou lao dandendegei molhege, iou gin hinen ge mburer adu.

Jesu regurdueni su masongul.

11Be Jesu gin dogi la gor asu Samaria e Galilea. 12i gin me le gor si, su gamel masongul su sohal sal le ndro i mandrsu momen, legen ge. Be su da manan hebe, su lug bohosu, su loholo, su vale, su bai: 13Jesu Ndorlaben golmgisden du. 14Be i gin ilndri su, i vong le ndro su, i boi: Gal ndro su ndremda dohor, gobsilieni le ndro su mandrmu. Be su da le sal mandrsu gin hivur, su rosan ge. 15Homo asu be i gin ilndri, mandrn gina rosan ge, i la mul, i mugueni Jehova le ngasen ndoun, 16i godurhu, i los le boan, baghege le ndegen ad Jesu. I bamugueni Jesu. I ogo i homo asu Samaria. 17Jesu i vong le ndro i, mandrsu masongul gin hivur boen, de bui? Su manondrsi su do oho? 18Homo asu de gin mul de bamugueni Ndorlaben Jehova bugane? I ge, homo asu Samaria ge? 19Boen i vong le ndro i, i bai: Edne, gal gor adem, uo da gin boro ndoui ordo, i ge i gin regurdueni uo.

Ar Ndurndramed na gmeher lie.

20Su Pharisi su ndemani Jesu, gehere gor ad Jehova na gmeher. I vong le ndro su i bodeie: Gor ad Jehova i da beg meher dandu ilndri gle begmardu bui. 21Homo de danen vong bui e lele, gor ad Jehova gorda, de gor ad Jehova gorbo. Gor ad Jehova i da le molengamu. 22Boen Jesu i vong le ndro su lao aden: Rang i gmeher bergolmu gunuen hi bui gle rang si ge ad Ndurndramed, de danmu ilndri heb leri bui. 23Boen su gvong le ndro mu: E lele gorbo, e lele gorda, mbue al ndro su, de delengamu le nongen ogoro bui. 24Dege ndremla i da hinganen i da le rai, i hilou le hai, dagara Ndurndramed le rang aden. 25Ngendian dsoln i gla ndro i hanu. Su ndramed ber range su gor bieni i. 26Rang ad Ndurndramed ar i gmeher lie, i dege rang ad Noah. 27Su gin bo gous, su gin ien gan, su gin ibdi bihin le nambulsu, mabenan le rang, Noah gina le lundiendol aden mandromai, boen ndran gin me, su masi su ginmad. 28Rang ad Jehova i dege rang ad Lot, su gin bo gous, su gin bo simsim, su gin bo mburer le beleng asu, su gin mengseni um asu. 29Le rang ge, Lot gin bieni Sodom, moan ber lang gin ndrud. I dilmui su masi sumburdi. 30Dagara rang ad Ndurndramed. 31Ar homo i da le um aden, mbue hanguruen memrad aden i da lundieum, beg hedi i hanu; homo i da le beleng aden, mbue de mul le gor aden. 32Ghanguruen nambulen ad Lot! 33Homo i da hanguruen mandrn ge sidesi na gmed, homo i da bieni ndoui aden gle nongen ad Jesu, i ogo i horuan ge. 34Io vong le ndro mu: Lobing ogo, ar Ndurndramed na gmeher, sor ndramed marmou sor da le berle asor, homo i gla ndro Ndurndramed, homo i roh. 35-36Sor bihin marmou sor bo mburer le gan ansor, Ndorlaben i rui homo gle ndro i, homo i roh. 37Su lao aden ndemani i: Ndorlaben oho? I bodeie: Su ndorgan su la goure, ar su lele numbuen i da borah.

Currently Selected:

Lukas 17: LLENT

Highlight

Copy