Lukas 14

Jesu ien gan le um ad hom Pharisi.

1Bersi muren Jesu la um ad hom labenen ad Pharisi homo, beg ien gan la. Aga sabbath, ma su masi su gulue i. 2E lele hom gamel i da med, i meher i la ndro Jesu. 3Malabo Jesu i ndemani su ndremda hernou ma su Pharisi: I hian de bui, be homo regurdueni su ndramed le sabbath? 4Su simge. Malabo i dori ndramed i regurdueni i, i rendegien i le um aden. 5Boen i vong le ndro su: Sie ademu, ar donki de bulmagou aden i glos le ndran, i de hilou roud, i sobani i le rang ogo le sabbath de bui? 6De dansu vong hebsa de la ndro i bui.

7Boen i vong le ndro su masi, su da le mandrgosgeao, heb nongen dohongein i gin ilndri su da gin gahi logna hian le mandrgosgeao, i vong le ndro su, i bai: 8Be homo i loh uo le gous aden, mbue lugdo im logna hian, debosan homo i gmehere i labenen ge. 9Boen ndremda gous i da gin loh uo, ma labenen ogo lie le gous aden, i gmehere ndro uo, i bai: Gbieni logna ogo, io beg hengen i le ndro labenen ogo. Boen bombulem i mesi gleri. 10Mbue hinen dagara. Be su loh uo le gous asu, al ndro i, hedi logna si gle adem, i de heb hian bui. Boen ndremda gous i gmeher ndro uo, i boi: Gous ordo, aga logna hian bui, ghedi logna ogo io gin hanguruen gle adem ge. Boen su masigane, su da le gous, su gabmugueni uo. 11Homo i da hanguruen hian ge gle aden, su boii i; ar homo i da hanguruen molhege gle aden, su gabmugueni i. 12Boen i vong le ndro ndremda gous, i da gin loh i le gan anen, i bai: Be uo da sueri gous si, mbue eloh su gous adem, ma su nderm, su loum, ma su labenen ber gor gle gous adem, heb eluen bui muren su eloh uo gle mandrgosgeao asu, beg surien gan anem le gous asu. 13Aga heb monen bui, ar uo sueri gous si, eloh su ndramed molhege, ndrun asu momen ge, de dansu dogi bui, begmarsu momen, de dansu lele hebsa bui, su gmeher le gous adem. 14Uo horuam gleri, su de dansu surien gan anem bui, Ndorlaben ge i gsurien i le rang aden, be su horuan gedne lie le ngad asu.

Nongen dohongein le gous manden.

15Homo asu su da le mandrgosgeao, be i gin hirong nongen ad Jesu, i vong le ndro i, i bai: Homo i horuan ge, be i da le mandrgosgeao le um ad Jehova. 16Jesu i vong le ndro i, i bai: Hom gamel gin sueri gous manden ge. I loh su ndramed dsoln le gous aden. 17Ar i gin dueni gan anen boen, i rendegien i lao aden le ndro su masi, i gin loh su. Su gmehere le gan anen, su da gin dueni boen. 18Su ge mbueresu, homo i gin bai: Vong le ndro Ndorlaben adem, io gin semani beleng hasel, malabo io beg dogi, beg ilndri i. Mbue ndrnem i irgu gle ordo. 19Homo i vong: Io gin semani bulmagou masongul, io gal beg ilndri su, mbue belengeni io. 20Homo lie gin bai: Io gin ibdi hom bihin gle nambulo, io de dono meher bui. 21Lao dandendegei ogo i gin mul, i bosoui nongen asu le ndro ndorlaben aden. Ndorlaben, ndrnen i mah le asu, boen i vong le ndro lao aden, i bai: Al roud gle sal ber gor ogo, eloh su ndramed molhege, mandrsu momen ge, ndrun asu bud, begmarsu bui, de dansu dogi bugane, su gmeher le gous ordo. 22Lao dandendegei aden i vong le ndro i muren: Ndorlaben, io gin hinen i boen, heb logna i da le um, i dandon molhege. 23Ndorlaben i vong le ndro lao aden: Gal sal gle horo ma le horo, ndemani su ndramed, su gmehere um ordo beb ge le asu ndramed, io ha lengi dagara. 24Io boi le ndro mu: Homo asu, io da gin loh su hanu le gous ordo, de dansu ien gle gan ono hebsa bui.

Heb nongen le ndrbon Jesu.

25Su ndramed mabosanged su la born ndro i, be i da dogi le sal. Malabo i belueni bormarn ndrbon, i vong le ndro su, i bai: 26Ar homo i gme ndro io, i de bieni damen e nanen, nambulen, e ndurn, ndern e bison dagara ndern aden bui, i hom lao ordo bugane. 27Be homo de hedi beldigei aden ie hauen ir ndrbo bugane, i lao dandendegei ordo bui. 28Sie ademu ar i beg mengseni um hom, i de lugdo hanu, i ha nemeni memrad aden, i da vonei le surien mburer asu de bui. 29Ar i gin mengseni hebe, boen de danen hinen i bui, memrad aden gina boen, su masi su lele i, su hal aden, 30su vong su bai: Ndramed ogo gin mengseni le um, de danen hinen i boen bui. 31Sehe ndurhian, be i leng bo bahun gle ndro ndurhian homo ber gor manan, i de lugdo hanu im logna aden, i loh su labenen ber gor aden, su vong la goure su ndoa le ndro gor mandromai i da manan de bui. 32Ar i heb ndoun bui, i grendegien su lao aden le ndro ndurhian ber gor manan, i ndemani i, i lug beno. 33Dagara homo ademu i hom lao ordo bui, ar i de bieni memrad aden bugane. 34Sol aga longu hendr hian ge, be i gina sagen heb ndoui i da ri bui, sie danen hinen i hian. 35I gina momen gane, su gbieni i le sal. Homo ma delegan, ha hirong nongen ordo.

Currently Selected:

Lukas 14: LLENT

Highlight

Copy