Lukas 15

Nongen dohongein le golnisden ad Jesu.

1Su ndremda moni, ma su ndramed momen mabosanged su la ndro Jesu, beg hirong nongen aden. 2Su Pharisi, ma su ndremda hernou su bangondrngondr leri ndoun, su vong su bai: I ogo ha somui su ndramed momen ge, i ien gan ansu. 3Malabo Jesu i vong heb nongen dohongein le ndro su ogoro: 4Sie ademu, meh aden masanged, homo gin los gina manan, i de bieni su meh manondrsungul e ondrsi, su gsou le um aden, i hilou ge, i gahi meh aden homo i da gina malold. 5Ar i gin danoni i, i mugmug manden, i hedi meh aden ie hauen. 6Be i gin me le um aden, i loh su gous aden ma su ndramed ber gor, i vong le ndro su i bai: Gu mugmug la born ndro io, io gin danoni meh ordo i da gina malold. 7Io boi le ndro mu: Su ber gor lundielang su mugmug dagara lie le ad hom ndramed momen, i da gin belueni bern aden, su mugmug ge hanu le asu manondrsungul e ondrsi, su da dogi monen ge.

8Sie bihin homo, moni aden masongul i da le nemen, ar moni si gin los i de hesul lamp bui, i abseri um aden, i gahi moni aden i da gin los, beg danoni i. 9Be i gin danoni i, i loh su gous aden ma su bihin ber gor su le goure, i vong le ndro su, i bai: Gu mugmug ge la born ndro io, io gin danoni moni ordo i da gin los. 10Io boi le ndro mu, su Angelo ad Jehova su mugmug dagara lie ar hom ndramed momen gin belueni bern aden.

11Boen Jesu i bai: Hom gamel ndursor marmou, su da le um aden. 12Ndurgamel muren i vong le ndro damen: Bo domo, ghengen memrad ad nano me ndro io. Damen i gin hinen i dagara, i hengen i dege i gin bai. 13Bing holel muren ndurgamel ogo i hedi memrad aden masi, i dogi le gor manan, i da bo gous dsoln, i bo longu momen mabosanged. 14Memrad aden gina boen, song manden i hilou le gor, gan anen bui, ie mundrul ge. 15I la ndro homo ber gor i soling le ndro i, beg heb gan. Ndramed ogo gin rendegien i le lonhou, i gobgulue su bu aden. 16I hangurou beg ien heb gan ansu bu ge, homo de gin hengen i bugane. 17Malabo i hanguruen le bergoln, i bai: Su lao dandendegei ad bo domo masehe? Gan ansu bulhege, io ge, io na gmed le heb gan. 18Io gedne, io dogi le ndro bo domo, io vong le ndro i, io boi: Bo domo, io gin bo longu momen le ndro Jehova, ma le ndro uo. 19Io de vonei bui uo absou io ndurm, ghinen io le hom asu lao adem ge. 20I dne, i dogi le ndro damen. I da sal manan ge, damen gin ilndri i bergoln i ibdi gahaloseli, i hilou ge, i sohal sal le ndro i, i bogarni i, i da hunghung. 21Malabo ndurn i vong le ndro i: Bo domo, io gin bo longu momen le ndro Jehova, ma le ndro uo, io de vonei bui, uo absou io ndurm. 22Damen ge, i vong le ndro su lao aden: Ghilou ge, al hur salo hian ge, daui gle mandrn, daui ring gle gobnemen, sumianegen, gle aden. 23Boen dueni ndurbulmagou gle gan anu, iou beg bo gous, beg mugmug ge. 24Nduro ogo ginmad, i mamaren malabo lie. I gina los, gina momen ge, io gin danoni i lie. Su bo gous le gan ansu, su mugmug ge. 25Ndurn hanu i da le beleng ad damen, be i gin mul le um aden, i hirong demi e ndan. 26I loh homo asu lao aden, i ndemani i, su mugmug le sa? 27I bode: Nderm gin mul, damem gin dueni ndurbulmagou, i mugmug ge, i da le um aden lie. 28Ndrnen ad ndern i mah i mburen la lundieum. Damen gina le ndro i, i ndemani i, i gmeher, i glele ndern. 29I vong le ndro damen, e lele, uru dsoln io bo mburer adem ge da delengo le nongen adem sidesi, uo de gin bo gous me ndro io, le ndro su gous ordo bersi bui. 30Ndurm ogo gin mul, i da gin bieni memrad adem gle momen ge, gle ndro su bihin momen, uo gin dueni ndurbulmagou le ndro i. 31Damen i bode: Nduro, sidesi uo da ndro io, longu masi ordo adem ge. 32Nderm ogo mahanu i ginmad, i mamaren lie, i gina momen, gina malold, io gin danoni i lie, le longu ogo io mugmug ge.

Currently Selected:

Lukas 15: LLENT

Highlight

Copy