Lukas 13

Heb nongen dohongein le gei heie.

1Le rang ogo su ndramed holel su la ndro i, su bosoui le ndro i longu le su ndramed ber Galilea, Pilatus gin daii su, be su gin dirhor le ndro Jehova. 2Jesu i vong le ndro su, i bodeie: Ar mu hanguruen su ndramed ber Galilea ogo su momen hanu le asu Galilea masi, su da gin los gina momen dagara, mu hanguruen momen leri. 3Io boi le ndro mu, ar mu de belueni bern ademu gle houen bui, mu gina momen dege su lie. 4Mu hanguruen sa, su masongul e ndrumou, um mandromai i da baghege le ndran Siloa i gin bud gina le ndro su, gin daii su, su momen hanu le asu ndramed masi ber Jerusalem? 5Bugane, io boi le ndro mu: Ar mu de garbelueni bern ademu gle houen bui, mu gina momen, mu na glos dege su. 6Boen i vong le ndro su heb nongen dohongein i bai: Gei heie ber vovei i da le beleng ad hom ndramed. I gin me, i gahi sengen, de danoni heb sengen bui. 7Malabo i vong le ndro ndremda beleng: E lele, io da meher le uru madolo io gahi heb sengen le gei ogo, heb sengen bui, e sindrdi giao, desa i da le logna aden molhege? 8I vong le ndro ndorlaben, i bodeie: Ndorlaben i dandon le uru ogo, io beg bo mburer le ndro i bersilie. 9Sengen na gmeher de bui. Ar bugane, e sindrdi i giao.

Jesu regurdueni homo le sabbath.

10Bersi muren Jesu henunuen su le numo hernou asu, le sabbath asu Juda. 11Hom bihin gorda, iab i da ndro i masongul e ndruo. Ndrun aden i godoh, heb monen bui. 12Ar Jesu ilndri i, i loh i, i vong le ndro i, i boi: Bihin, ndrun adem gmonen, horuam ge. 13Boen i dori i, bihin i dne, ndrun aden monen gane, i bamugueni Jehova. 14Ndremda bogulue um, ndrnen i irgu, be i da gin ilndri Jesu gin regurdueni i le sabbath. I vong le ndro su ndramed: Bing manono gorda, bing le mburer, mu gmeher su gregurdueni mu le bing manono, le sabbath bui, helian ge. 15Ndorlaben i vong le ndro i i bodeie: Mu ndramed bahilou ge, homo ma homo i dari donki de bulmagou le sabbath, i hengen ndran ma gan le ndro i, de bui? 16Bihin ogo, hom ndurbihin ad Abraham, Satan i gin hosi le uru masongul ndruo, i de vonei bui io grumburdi i le vas ad Satan le sabbath adu ie? 17Bombulsu ndremda rah aden i mesi, be su gin hirong nongen aden. Su ndramed masi, su ge, su mugmug ge le gelman ogo masi, Jesu gin hinen i.

Nongen dohongein le gor lundielang.

18Boen i vong le ndro su: Gor ad Jehova i hi derbe? 19I dege gorn mandagabui ge, hom gamel hedi i, i daui i le beleng aden, i reg gina manden, i gei heie, su ndorgan ber lang gin me su mengseni numen le ndrandran. 20Boen i vong: Gor lundielang i hi derbe? 21I dege drib, hom bihin hedi i, i daui i le vlouer, heb eluen bui muren i gina le vlouer masi sumburdi.

22Jesu i dogi le gor hoger e hoger, le gor manden e mandehe, i henunuen su ndramed, be i da le sal, beg gobad Jerusalem. 23Homo ndemani i: Ndorlaben Jehova i rumburdi su holel ge, de derbe? I bodeie: 24Gob mburer ndoun ndoun, la gor lundielang gle babi mandehege. Io vong le ndro mu, su mabosanged su ha lengi dogi le gor lundielang, de meher ri bui. 25Ar Ndorlaben gin ndne, gin vadi babi ber um aden, muren mu gmeher mu da lobohonum, mu reregdi babi, mu bai: Ndorlaben, audi babi ber um adem, muren Ndorlaben i vong le ndro mu, i bai: Io de dono mu bui, mu gin meher oho? 26Boen mu vong mu bai: Iou da le mandrgosgeao adem, gin ien gan anem, gin ilmui, uo gin henunuen du le sal. 27Ndorlaben na gbodeie: Io vong le ndro mu: Io de dono mu bui, alndi, mu ndramed momen ge! 28Su undri lehesu, su dang be su ilndri Abraham, Isaak, Jakob, ma su Provet masi su da le gor lundielang, mu ge mu da le gor ndrogmoan ge. 29Muren su gmehere, su ber rai, su ber hai, su ber ndolou, e su ber gub, su la mandrgosgeao ad Jehova le gor lundielang. 30Ghanguruen longu hendre ogo: Su la muren, su me hanu, su la hanu, su muren.

31Malabo su Pharisi holel su la ndro i, su bai: Al vob gle manan, Herodes beg daii uo. 32Jesu i bodeie: Al ndro Herodes, gle ndro mui ogo, bai le ndro i: E lele, io robuldi su ngongong, io regurdueni su ndramed eruar ge, e moh, rubing mburer ordo boen. 33Eruar ge, moh, e rubing io gdogi sal ordo, aga i de monen bui, ar Provet homo i de gmad le gor Jerusalem bui. 34Jerusalem, Jerusalem, uo da daii su Provet, uo da daii su le bad Jehova gin rendegien su, mabersehe io gin loh su ndurm me geherong, dege goho nanen i da rui me geherong su ndurgoho aden, i gorni su le nemen, mu mburemu. 35Malabo rang momen i gmeher ndro mu, um ademu gina momen ge. Io boi le ndro mu: Mu de lele io bersilie bui mabenan le rang ar mu loholo io hengeni, io bamugueni i, i da meher le ngarn ad Ndorlaben.

Currently Selected:

Lukas 13: LLENT

Highlight

Copy