Lukas 12

Heb nongen le ndro su lao ad Jesu.

1Su ndramed mabosanged su la born ndro Jesu, su besbas le sal. Malabo Jesu i vong le ndro su lao aden, i bai: Gobgulue meluamu le longu asu Pharisi, gle bahilou asu. 2De hansu gorni longu asu bui, Jehova gobharni i. Dansu de nhui longu asu bugane, heb eluen bui muren su masi su dansu i. 3Nongen masi su da gin bosoui le ndrogum, gor masi hirong i le rang. Longu masi su da gin bahurhur le lundieum asu, su masi su bohernou leri ndre balndo. 4Io vong le ndro mu, mu gous ordo, mbue mu go noh su ndramed, dansu daii mandrmu ge, de dansu bo momen gle meluamu hebsa bui. 5Io beg bosilieni mu le ad homo, mu noh aden: Go noh homo ge i da ndoa le daii su, ma gbieni su le gor moan, io vong le ndro mu: Ha noh aden ge. 6Mu da semani ndorgan malima gle moni heb ge mandehe. Jehova goln de ndud le ad ndorgan si bugane. 7I gin nemeni lomon ademu masigane. Mbue mu go noh, mu hian hanu le su ndorgan mabosanged. 8Io vong le ndro mu lie: Homo i da boharni ngoro le ndro su ndramed, Ndurdramed i gobharni ngarn le ndro su Angelo ad Jehova. 9Ar mu hangaini io le bormarsu ndramed, io hangaini i le bormarsu Angelo ad Jehova lie. 10Homo ma homo i da boii Ndurndramed, Ndorlaben esbui longu aden giao. Homo ma homo i da boii Meluan Helian, Ndorlaben de esbui longu ogo momen bugane. 11Be su rui mu le numo hernou asu, gle gord asu, mbue hanguruen nongen ademu, mu da vong sa le ndro su le gord. 12Meluan Helian i ghengen le ndro mu nongen masigane mu absou le ndro su.

Su lao ad Jesu ma hanguruen asu le longu ber boan.

13Homo asu su da gin be goure i ndemani Jesu, i bai: Ndorlaben, hian bai le ndro ndere, i ghengen memrad ad nano me ndro io. 14Jesu i bode: Ndramed, sie i gin loh io le ndremda gord gle memrad ademu ber boan? 15Boen i vong le ndro su: Gobgulue meluamu, debosan meruamu dsoln. Ar homo memrad aden bulhege, i de horuan gle memrad aden bui, i da le um aden. 16Boen i vong le ndro su heb nongen dohongein, i vong, i bai: Hom ndramed, labenen ge, memrad aden dsoln. Beleng aden hian ge, gan hian mabosanged i dari. 17Malabo i da hanguruen le bergoln, i bai: Io gob sa malabo, um ordo i mandehe, i de vonei le gan ono bui. 18Boen i bai: Io beg hinen longu hendre, io beg mbuserei um ordo sagen, io beg mengseni um mandromai, io beg daui gan ono masi gle lundie. 19Boen io vong gle bergolo: Bergolo, e lele, gan anem mabosanged, gle uru dsoln, hian hengang ge, gien e gilmui, dege uo ha lengi. 20Jehova ge i vong le ndro i: Uo gouge, lobing ogo io geloh uo, uo na gmed, memrad adem mabosanged uo da gin huri me goure gle ndro sie muren? 21Dagara homo ma homo, i da huri me goure memrad ber boan, de hengen heb de la ndro Jehova bui, heb memrad aden ber lang bugane.

22Boen i vong le ndro su lao aden: Io boi le ndro mu: Mbue hanguruen mandrmu sidesi: mu gien sa, mu daui salo me oho? 23Mandrmu i hian hanu le gan anmu, ma gle salo ademu. 24E lele su ndorgan ber lang, su de daui hebsa le beleng bui, su de huri heb gan ansu le numesu bugane, Jehova i hengen le ndro su sidesi. Mu hian hanu le su ndorgan ber lang. 25-26Sie ademu i da horuan, mamaren bing si ge, be i da hangungerou sidegesi? Ar mu de heb ndoa bui le hinen longu mandehege monen ge, desa mu hanguruen sidesi longu ber boan. 27E lele su nonou ber lonhou, su de bo mburer le salo asu bui. Io boi le ndro mu: Salo ad Salomo i da hian ge, i dege salo asu nonou ber lonhou hian bugane. 28Ar Jehova i hanguruen lomondriu ber lonhou le salo asu lomondriu i longu molhege, i da horuan eruar ge, mo su gbieni i le moan, i hengen le ndro mu hanu gle salo ademu, de bui? De danmu boro heb ndoui ber lang bugane. 29Mbue noh, mbue hangungerou, mbue bai: Iou gien sa, iou gilmui sa. 30Su Haiden ge su hanguruen dagara. Damu ber lang i danen le longu ogo masi. 31Hanguruen hanu gle memrad ber lang, muren i ghengen le ndro mu memrad ber boan lie. 32Mbue mu go noh, mu holel ordo ge, Damu ha lengi, beg hengen le ndro mu gor aden. 33E gbieni memrad ademu, ghengeni le ndro su, memrad asu bui, mengseni ndob ber moni le ndro mu, i de mud bui, ndob gle memrad ber lang, homo de danen behena i bui, ul de ndumbue i bugane. 34Bergolmu i da sidesi, gle memrad ademu.

Heb nongen dohongein le lao hian e momen.

35Gogen gle salo ademu, sul gle nemu. 36Mu dege su ndramed su da belengeni ndorlaben asu, i da gina manan gle gous, i beg mehere, be i da reregdi le um aden, su audi babi roud. 37Su horuan ge, su monen ge, be ndorlaben asu i da gin mul, i ilndri su lao dandendegei aden, su mamed ge. Ndangen io boi le ndro mu: I hedi salo ber mburer, i daui i, boen i dulieni su lao dandendegei aden le mandrgosgeao aden, i sueri gous le ndro su. 38Ar ndorlaben de meher roud bui dogrobing ge, de madourang, i ilndri su lao aden, su mamed ge, su horuan ge. 39Danmu hanguruen hian ge: Ar labenen homo i danen i, gehere ndremda behena beg mbuser um aden, ir bogulue um aden, de medir bui, i mamed ge. 40Mu dagara lie, mu mamed, Ndurndramed na gmehere, de danmu rang aden bui.

41Malabo Petrus i ndemani Jesu i bai: Ndorlaben, nongen dohongein ogo le ndro du ge, de gle ndro su masi lie? 42Ndorlaben i bode: Sie ademu i lao dondendegei ad ndorlaben hian monen ge. Ndorlaben gin loh i le bogulue su lao aden masi, i ghengen le ndro su gan monen ge. 43Lao dandendegei ogoro i horuan ge, ar ndorlaben aden i gmul, i ilndri mburer aden i hian monen ge. 44Ndangen io boi le ndro mu: I hinen i le ndremda bogulue memrad aden masigane. 45Be lao aden i hanguruen le bergoln: Ndorlaben ordo de meher roud masou, boen i iao, i rii su lao ad ndorlaben, ma su bihilou aden, i sueri gous ge, ilmui sidesi de hinen mburer bui. 46Ndorlaben aden i gmeher bersi roud, i de belengeni i bui, i de danen rang ad ndorlaben bugane, i ogo, i gmeher, i hengen le ndro i surian le mburer aden momen, i rii i ndoun ndoun. 47Hom lao dandendegei, i da danen mburer ad ndorlaben aden, i de hinen i bui, ndorlaben i grii i ndoun ndoun. 48Homo i de danen mburer ad ndorlaben bui, i gin hinen i momen, ndorlaben de rii i ndoun ndoun dagara bugane. Homo ma homo, ndorlaben gin hengen le ndro i mabosanged, i ha lengi mabosanged, homo ma homo ndorlaben gin hengen le ndro i heb ge mandehe, i lengi ge mandehe gle aden. 49Io gin me le bieni moan gle boan, io ha lengi i da iad manden le belengan. 50Su beg surhi io gle ngendian, ndrno i gosusngo leri manden. 51Mu hanguruen sa, io gin me le lug benu le dogrosu? Io boi le ndro mu: Bugane, io daui bahun le ndro su. 52Malabo su malimou su da le um hom su bo iil ge: Su madilmou su bo iil le ndro su marmou, ma sor marmou gob bahun le ndro su madilmou. 53Damen i bo iil le ndro ndurn, ndurn i gob bahun le ndro damen, nanen i gob iil le ndro ndurbihin aden, ndurbihin i gob bahun le ndro nanen. Naloson i gob iil le ndro naborson, naborson i bo iil le ndro naloson.

54Boen i vong le ndro su masigane, ar mu ilndri ndoulang i da gobad le hai, mu vong, mu bai: Legen na gmehere, ma i gmeher ndangen. 55Ar gub i ngo, mu bai: Range mernal ge, ma i gmeher dagara lie. 56Mu ndramed momen ge bahilou ge, danmu gelman ber lang ma ber boan derbe, danmu gelman ber range heb hian bui? 57Desa danmu hanguruen heb monen le bergolmu bui? 58Ar ndremda rah adem beg bo gord le ndro uo, mor da le sal, ghinen longu adem gmonen, debosan i rui uo le ndro su ndurhian, so gob gord le ndro uo, su daui uo le kalabus. 59Ndangen io boi le ndro uo, uo da le kalabus, mabenan uo gin surien longu aden masi sumburdi.

Currently Selected:

Lukas 12: LLENT

Highlight

Copy