Johanes 6

Heb nongen le suslong ber lang.

1Boen Jesu i dogi le ndran Galilea le leng horo ber Tiberias. 2Su ndramed mabosanged su ndrbon sal aden, be su gin ilndri gelman i da gin hinen le ndro su, iab i da ndro su. 3Jesu i gobad ndre bahali, i lugdo im boan, ma su lao aden. 4Uru asu Juda le ndurmeh i da baghege. 5Be Jesu gin ilndri su ndramed mabosanged dagara, su da me dala, i ndemani Philipus: Iou semani gan oho, su masi ogo su gien? 6I ndemani i dagara, i beg seslaini Philipus. I danen hian ge, i beg hinen sa. 7Malabo Philipus i bodeie: Ar iou semani gan gle moni marunged, aga i de vonei de la ndro su masi hebsa bui. 8-9Homo asu lao aden, aga Andreas, ndern ad Simon Petrus, i vong le ndro i, i boi: Hom ndurgamel gorbo, suslong aden malima e ni marmou, aga sa le ndro su ndramed masi oro? 10Jesu i vong le ndro i: Bai le ndro su ndramed, su lugdo im boan, lomondriu dsoln i da le gor ogo. Su gamel lugdo im boan su malibou. 11Jesu hedi suslong, i bo lodu leri, boen i hengen le ndro su lao aden, su ghengen le ndro su, su da gin lugdo im boan. Boen i gin hengen le ndro su gle ni lie, homo ma homo dege i lengi. 12Su gin ien boen, mosesu, Jesu i boi le ndro su lao aden: Daui nogden me goure, debosan i gina momen ge. 13Su gin hurdi nogden le goure, su nhui le ndob mandobsungolerhed, i dandon. 14Su masi, be su gin ilndri gelman ogo i da gin hinen i, su vong: Aga Provet ndangen, i da beg meher le gor. 15Jesu, be i gin ilndri, su beg meher, su beg hedi, su beg hinen i le King asu, i vob, i la mul ndre bahali, i ge.

Jesu dogi ndre ndran.

16Ibia, su lao aden su la leng. 17Su la ndol, su beg iao le leng horo, le gor Kapernaum. Lobing gin me, gor i ndrogum, Jesu de gin mul masou. 18Hai manden i ngoh, ndran manden ge. 19Su da le ndran, su ilndri Jesu, i dogi ndre ndran, i la bage le ndol asu. Su noh manden. 20I vong le ndro su: 21Io ie, mbue mu go noh. Su beg hedi i le ndol asu, malabo su da le leng horo.

Jesu i suslong ndangen ber belengan.

22Si muren, su ndramed masi su da le ndran le horo, be su gin ilndri, ndol asu lao ad Jesu i gineao, su ge, su lao ad Jesu su la lundiendol, Jesu bui, su gahi i. 23Su ndol holel, su la ndran le leng horo, baghege le gor Tiberias, su gahi Jesu le logna, i da gin hengen le ndro su gan, i gin lodu le ndro Jehova leri. 24Su ilndri, Jesu i do da bui, su lao aden bugane su la lundiendol asu, su iao le gor Kapernaum, su beg gahi Jesu la. 25Be su gin ilndri i, su ndemani i: Ndorlaben, gehere uo gin me le gor ogo? 26Jesu i bode: Ndangen, ndangen io boi le ndro mu, mu de gahi io manua gelman ordo bui, mu gin ien gan, io da gin hengen i mosesu. 27Mbue hedi gan ge ber boan, ghanguruen gan ber belengan, i da hinen su ndramed mamaren. Ndurndramed beg hengen i le ndro mu. Jehova, Bo Domo gin rendegien i leri. 28Su vong le ndro i, su boi: Iou gob sa, beg hinen mburer ad Jehova hian ge. 29Jesu i vong le ndro su, i boi: Aga mburer ad Jehova, ar mu boro ndoui aden ge, Jehova gin rendegien i. 30Su ndemani i: Sehe gelman uo hinen i, dandu ilndri, dandu boro ndoui adem. Sehe longu uo gobsilieni me ndro du? 31Su damen adu ber goru, su gin ien suslong ber lang, aga Manna, le marboga dege su gin hondre: I gin hengen le ndro su gan ber lang.

32Jesu i vong le ndro su: Ndangen, ndangen io boi le ndro mu: Mose de gin hengen le ndro mu gan ber lang bui, Bo Domo, i ge, i hengen le ndro mu gan ber lang ndangen. 33Aga gan ad Jehova: I da gin bieni gor lundielang, i hengen le ndro su ber gor boan, su namaren ge. 34Su loh, su bai: Ndorlaben, ghengen me ndro du gan ogoro sidesi. 35Jesu i vong le ndro su: Io gan suslong ber lang, be homo i gme ndro io, i de mundrul bui, be homo i boro ndoui ordo, goln i de mar bugane. 36Io gin vong le ndro mu boen: Mu gin ilndri io, de danmu boro ndoui ordo hebsa bui. 37Longu masi Bo Domo i hengen me ndro io, aga i gmeher ndro io. Be homo i gmeher ndro io, io de robieni i bui. 38Io gin meher le lang, io da hinen mburer ordo bui, dege io lengi, io ghinen i dege i ge, i ha lengi, i da gin rendegien io. 39I ge, i da gin rendegien io, i ha lengi, longu masigane i da gin hengen me ndro io, i de glos bui, io ghingeni su le rang manden i da beg meher. 40Bo Domo i ha lengi i, homo ma homo i da ilndri Ndurn, i boro ndoui aden, i de somad bui, i da mamaren ge sidegesi, io ghingeni i le rang manden, i da beg meher.

41Su Juda, su bangondrngondr aden, be i gin bai: Io suslong ber lang, io gin meher le gor lundielang. 42Su bode: Aga Jesu, ndur Josev de bui, dandu damen e nanen? I da vong derbe malabo: Io gin me lang? 43Jesu i vong le ndro su, i bodeie: Mbue bangondrngondr le nongen ogoro. 44Homo de danen meher de la ndro io bui, ar Bo Domo, i da gin rendegien io, de rui i bui. Io beg hingeni i le rang manden, i da beg meher. 45Hom Provet gin hondre dugian: Jehova i ghenunuen su masigane, homo ma homo i da gin hirong i le ad Bo Domo, i danen i, i gmeher ndro io. 46Homo de gin ilndri Bo Domo bugane, i ge, i da ndro Jehova, i ilndri Damen. 47Ndangen, ndangen io boi le ndro mu, ar homo i boro ndoui le nongen ogo, i da mamaren ge sidegesi. 48Io suslong ber lang. 49Su damen ademu su gin ien Manna le marboga, ma su ginmad lie. 50I ogo, suslong ber lang, homo ma homo i da gien leri, i de somad bui. 51Io suslong i da hinen su mamaren ge i gin meher le lang. Homo i da gien le suslong ogo, i da mamaren sidegesi, suslong ogo io beg hengen le ndro i, aga mondro, io beg hengen i le ndro su gor masi, su mamaren leri. 52Malabo su Juda su vong me goure, su bo iil le nongen asu, su vong, su boi: I beg hengen le ndro du mandrn gle gan anu derbe? 53Jesu i vong le ndro su, i boi: Ndangen, ndangen io boi le ndro mu, ar mu de gien sengen ad Ndurndramed bui, ar mu de gilmui ndrai aden bugane, heb ndoui i da ndro mu bui, mu de mamaren bugane. 54Be homo i gien sengen ordo, i gilmui ndrai ordo, i da mamaren ge sidegesi. Io beg hingeni le ngad aden, le rang manden, i da gmeher muren. 55Sengen ordo, aga gan hian ndangen, ndrai ordo, aga ndran hian ndangen. 56Ar homo i gien sengen ordo, i gilmui ndrai ordo i da ndro io, io da ndro i. 57Bo Domo i da mamaren gane, i gin rendegien io, io do da le boan, beg hinen mburer aden ge, dagara homo ma homo be i gien gan ono, aga mondro e ndrai ordo, i mamaren ge le gob mburer ordo. 58Ogo gan i da gin meher le lang, i dege suslong bui, su damu ber goru gin ien i, su ginmad, ar homo i gien suslong ogo i de somad bui, i da horuan ge sidegesi.

59Jesu i gin bai nongen dagara le numohernou asu Kapernaum, beg henunuen su leri. 60Su mabosanged asu lao aden, su da gin hirong nongen aden, su boi: Aga nongen ndoun ndoun ge, sie i danen hirong i. 61Jesu i danen su lao aden su bangondrngondr le nongen aden, i vong le ndro su: Aga nongen ndoun ie? 62Mu derbe bersi muren, ar mu ilndri Ndurndramed i gobad i voh le belengan, le logna aden ber goru? 63Meluan ge, i da hinen su mamaren mandrn de danen hinen i bui, nongen, io da gin vong le ndro mu, aga Meluan ge, su mamaren. 64Su holel ademu de dansu boro i bui. Jesu i danen hian, su ge, su de gin boro ndoui le nongen aden hebsa bui. I danen homo lie, i da beg hevani i. 65Boen i vong: Io gin bai le ndro mu, homo de danen meher de la ndro io bui, ar Bo Domo de hengen ndoui de la ndro i bui. 66Le rang ogo su mabosanged asu lao aden su bieni Jesu, su da ndrbon le sal aden bui. 67Malabo Jesu i vong le ndro su masongul e rumou, mu lie, mu beg bieni io ie? 68Simon Petrus i bodeie: Ndorlaben, iou girgai le oho, nongen adem i hian, i mamaren ge sidegesi. 69Dandu i, iou gin boro i, uo Ndur Jehova Helian. 70Jesu i vong le ndro i, i bodeie: Io gin loh mu masongul e rumou de bui? Homo ademu i hom Satan. 71I gin hanguruen Judas, ndur Simon, ber Kariot leri. I hevani Jesu bersi muren, i homo asu masongul e rumou.

Currently Selected:

Johanes 6: LLENT

Highlight

Copy