Johanes 7

Jesu la gor Jerusalem.

1Boen Jesu i dogi le gor hoger e hoger ber Galilea. I de gin dogi le gor asu Juda bui, su ber gor Juda beg daii i. 2Malabo uru asu Juda le um ndran ndran i gin me baghege. 3Su ndern su vong le ndro i: Edne, naiu gal gor asu Judea. Boen su lao adem dansu lele mburer adem uo da hinen i lie. 4Homo i do da bui, i da gorni mburer aden be i beg, su masi gilndri. Be uo beg bo mburer dagara, gobsilieni le ndro su gor masi. 5Su ndern aden lie, de dansu boro ndoui aden bui. 6Jesu i vong le ndro su, i bodeie: Rang ordo i de gin meher masou, rang ademu aga sidesi. 7Gor masi de irgu le ademu bui, ndrnesu i mah ordo ge, io da gin boharni longu asu momen. 8Hian mu ge, mu gobad le gor Jerusalem, io mbuere. Rang ordo de gin me masou. 9Aga nongen aden le ndro su. Boen i dandon Galilea. 10Su ndern su gina le uru asu Juda, su gineao gane, Jesu i dogi lie. Su ndramed de dansu i bui, i gin gorni. 11Su Juda, su da le uru asu, su gahi Jesu, su ndemani i: Jesu i da oho? 12Ngarnongen mabosanged i da hilou le gor. Su holel su bai: I hom ndramed hian ge, su holel su bai, bugane, i momen ge, i seslaini su ndramed gle bahun ge. 13Su de vong ndoa le aden bui, su noh su Juda.

14Uru asu Juda baghege boen, Jesu i la um ad Jehova, i henunuen su. 15Meluasu Juda masi i ieb, su bai: Sie gin henunuen i longu ogo? I da gin le skul adu bugane? 16Jesu i vong le ndro su, i bodeie: Henunuen ordo, aga nongen ordo bui, aga nongen aden ge, i da gin rendegien io. 17Ar homo i beg hinen mburer aden, dege i ha lengi, i ogo i danen i, henunuen ordo, ad Jehova ge, de aga nongen ordo molhege. 18Homo i da bosoui nongen aden ge, i gahi mugueni aden molhege. Ar homo i beg bamugueni i ge, i da gin rendegien io, nongen aden i monen ge. Heb hanguruen momen i da le bergoln bui. 19Mose gin hengen le ndro mu nongen ad Jehova de bui? Desa mu de hinen i bui, desa mu beg daii io ie? 20Su masi su bodeie: Uo gouge, sie beg daii uo? 21Jesu i boi le ndro su: Longu hendre ge io da gin hinen le gor ogo, meluamu masi i ieb leri. 22Mose gin hengen le ndro mu gelman asu lao ad Jehova, gelman le sindrdi mandrsu ndramed. Mose de gin hengeni de la ndro su bui, su damen ber goru gin hengen i. Mu da bo gelman ogo le ndro hom ndramed le sabbath lie. 23Be hom ndramed mu da gin hinen gelman gle mandrn le sabbath, i de bo momen de la ndro nongen ad Mose hebsa bui, desa ndrnemu i da mah le ordo, be io gin regurdueni mandrn ad ndramed gane. 24Ghanguruen monen ge, mbue dieni homo longu hendre e hendre molhege.

25Su holel asu Jerusalem su vong, su boi: Ndramed ogo su gahi i, beg daii i de bui? 26-27E lele i i de noh su bui, i da vong le ndro su, i de gorni bui, homo i de vong de la ndro i hebsa bugane. Su labenen adu su gin danoni aga Mesias de derbe, dandu ndramed ogo, dandu gor aden, damen e nanen, be Mesias adu i gmeher, homo de danen i bui, i gin meher oho? 28Malabo Jesu i da loh le lundieum ad Jehova, logna aden i da gin henunuen su, i loholo ndoun, i boi: Ehe, danmu io, danmu, io gin meher oho, io de gin me molhe bui, homo i da i ge gin rendegien io, danmu le aden bui. 29Io dono i, io gin bieni gor aden, be i gin rendegien io. 30Su beg hosi Jesu, su de gin bo momen de la ndro i hebsa bui, rang aden i de gin me masou.

31Su da gin boro ndoui aden, su vong, su boi: Ar Mesias na gmehere i danen hinen gelman mabosanged hanu, dege i gin hinen i? 32Be su Pharisi gin hirong nongen asu ndramed dagara, su da gin gorni hanguruen asu sidesi. Malabo su ndurhian ma su Pharisi su rendegien su lao asu, su ghosi Jesu. 33Jesu i bai: Io da le dogromu heb murai ge, boen io dogi le ndro i, i da gin rendegien io. 34Boen mu gahi io, de danmu danoni io bui, de danmu meher le logna ordo bugane. 35Su Juda su vong le goure, su bai: I beg dogi oho, dandu danoni i bui? I beg dogi le gor manan, le ndro su Juda, su da le gor asu Grek, beg henunuen su ber gor Grek? 36Nongen aden hi derbe, i da bai: Mu gahi io, de dansu danoni io bui, ma nongen aden lie: De danmu meher le logna ordo bugane. Aga sehe nongen?

37Rang manden le uru asu Juda, Jesu i dne, i loh le ngasen ndoun, i bai: Ar homo, goln i mar gle ndran, i gmeher ndro io, i gilmui. 38Ar homo i boro ndoui ordo, ndran haga i da muh, ndran manden ge le mandrn aga ndran mamaren ge, Nongen Helian i vong dagara. 39I gin hanguruen Meluan Helian, i beg daui le ndro su, su da gin boro ndoui aden. Meluan Helian i da le bergolsu ndramed masou. Jesu de gina le gor lundielang le gor engerang aden masou.

40Su holel asu, su da gin hirong nongen ogo, su bai: Aga Provet ndangen. 41Su holel su bai: Aga Mesias, su holel su bai: Mesias i da meher le gor Galilea derbe? 42Su gin hondre le Buk Helian: Gor ad Mesias, aga Betlehem, i homo ber um ad David. 43Su holel su vong ogoro, su holel su vong ogoro. 44Su holel asu beg hosi Jesu, de gin boro i le nemesu bui.

45Su lao asu ndurhian, asu Pharisi, su la mul, su ndorlaben asu su vong le ndro su: Desa mu de gin hosi i bui ie? 46Su bode: Iou de gin hirong hom ndramed ber boan masou i da gin bosoui nongen dege ndramed ogo, hian ge. 47Su Pharisi su bodeie: I gin seslaini mu lie? 48Homo asu labenen, de homo asu Pharisi, i hom lao aden ie? 49Bugane, su ndramed molhege, de dansu Nongen Helian bugane, su ge, su hirong i, su gina momen gane. 50Nikodemus i da gina le ndro Jesu goru, i homo asu labenen. 51I vong, i boi: Mu beg dieni homo na gmed, mu de gin hirong heb nongen aden masou, de danmu bui, sehe longu momen i da gin hinen i. 52Su vong le ndro i, su boi: Uo homo asu Galilea ie? Gahi le Buk Helian, muren uo danem, hom Provet de danen meher le gor Galilea bui. 53Boen su iao le um asu.

Currently Selected:

Johanes 7: LLENT

Highlight

Copy