Johanes 20

Jesu i dne le ngad aden.

1Sabbath asu Juda boen, Maria Magdalena i dogi le ngaibad ad Jesu madourang, mernal i de gin gobad masou. Be i gin me baghege, i ilndri bad i da marbohon ngai gin lendi. 2I hilou roud le ndro Simon Petrus, ma le ndro lao ad Jesu, Jesu golnisden i manden, i vong le ndro sor: Su gin behena Ndorlaben le ngad aden, dandu i bui, su gin daui i oho? 3Petrus ma lao ad Jesu ogo lie, sor hilou, sor la ngad. 4Sor marmou sor hilou bersi, lao ad Jesu i la hanu, Petrus muren. 5Be i gin me le ngad i durhu, i ilndri salo masi, i da lendi, i la lundiengad bui. 6Malabo Simon Petrus gin meher lie, i la lundiengad. I ilndri salo su da le boan. 7Salo hendr ge su gin nhui borbalen Jesu, i da le salo masi bui, i da hebndi. 8Malabo lao ad Jesu, i da gin me hanu le ngad, i la lundie lie. I gin ilndri longu ogo, i gin boro i. 9Su lao ad Jesu de dansu Nongen Helian masou su gin hondre, i gedne lie le ngad aden. 10Boen sor lao marmou sor la mul la um asor.

11Maria, i la lobohon ngaibad, i dang. Ndurmarn i da le begmarn, i godurhu, i ilndri le lundiengad. 12Malabo i lele sor Angelo marmou, salo asor beren ge. Homo i da le horo, baghege le borbalen Jesu, homo i da le horo baghege le ndegen Jesu, le logna numbuen, be su gin doni i. 13Sor ndemani i: Bihin, desa uo reng? I bode: Su gin behena Ndorlaben ordo, io de dono i bui, su gin daui i oho? 14Nongen ogo boen, i belueni bormarn le ndrbon, i ilndri Jesu, i de danen i bui aga Jesu. 15Malabo Jesu i vong le ndro i: Bihin uo dang sa, uo gahi sie? Maria hanguruen, aga ndremda beleng, i vong le ndro i, i boi: Ndorlaben ar uo gin hedi i gineao, bai me ndro io, uo gin daui i oho, io beg hurdi i mul. 16Malabo Jesu i vong le ndro i, i boi: Maria! Maria i belueni bormarn le ndrbon, i vong le ndro i le nongen asu Juda: Rabuni, aga i vonei: Ndorlaben! 17Jesu i vong le ndro i, mbue boro io. Io de gin gobad de la ndro Bo Domo masou, al hilou le ndro su ndere ordo, bai le ndro su, io gobad le ndro Bo Domo, ma le ndro Damu, le ndro Jehova ordo, ma le ndro Jehova ademu. 18Boen Maria Magdalena i hilou le ndro su lao i bosoui le ndro su, i gin ilndri Ndorlaben, ma i gin bai nongen ogo le ndro su.

Jesu la ndro su lao aden.

19Lobing gin me, su lao ad Jesu su da le um asu, su gin vadi babi le um asu ndoun ndoun, su noh su Juda. Malabo Jesu i la molengasu, i vong le ndro su, i boi: Mandri ad Jehova na gme ndro mu. 20Boen i bosilieni le ndro su nemen e mandrn, su lao aden su mugmug, be su gin ilndri Ndorlaben. 21Muren i vong le ndro su bersilie: Mandri ad Jehova na gme ndro mu. Dege Bo Domo gin rendegien io, io dagara lie io rendegien mu. 22Boen i hori le ndro su, i vong, i boi: Ibdi Meluan Helian. 23Ar mu esbui longu asu momen giao, io esbui giao sumburdi. Ar mu somui longu asu momen giroh, io somui leri lie.

Jesu i mbsig le ndro Tomas.

24Tomas, homo asu masongul e rumou, ngarn aden ndurmarmou lie, i da le um bugane, be Jesu gin mbsig le ndro su lao aden. 25Su vong le ndro i, su boi: Iou gin ilndri Ndorlaben, i bodeie: Ar io de ilndri legen le nemen, ar io de daui gobnemo gle legen bui, nemo gle mandrn, io de dono boro i bui, aga Jesu. 26Manondruo muren, su lao ad Jesu su da le um, ma Tomas i la born ndro su. Su gin vadi babi ndoun, malabo Jesu i la molengasu, i vong le ndro su, i boi: Mandri ad Jehova na gmeher ndro mu. 27Boen i vong ndro Tomas: Gobnemem gme ndro io, daui i gle legen ordo. E lele nemo. Nemem gme ndro io, daui i gle mondro, e boro longu hendre ogo. 28-29Tomas i bodeie: Uo Ndorlaben ordo, uo Jehova ordo. Boen Jesu i vong le ndro i: Malabo uo gin ilndri io, uo danem boro io. Su horuan, su mamaren ge, su de dansu lele hebsa bui, ma su gboro i. 30Jesu i gin hinen gelman mabosanged le bormarsu lao aden, io de gin hondre le bug ogo bui. 31I ogo, io gin hondre, io ha lengi, mu gboro ndoui ad Jesu Kristo i Ndur Jehova. Ar mu boro ndoui le ngarn, mu horuan, mu mamaren gleri.

Currently Selected:

Johanes 20: LLENT

Highlight

Copy