Johanes 21

Jesu la ndro su lao aden le ndran Tiberias.

1Bersi muren, Jesu i la ndro su lao aden, le ndran Tiberias. Longu ogo gin me dagara. 2Simon Petrus, Tomas ngarn aden ndurmarmou, Natanael ber Kana i da Galilea, ndur sor marmou ad Sebedeus, ma sor lao aden marmou lie, su gin me goure. 3Simon Petrus i vong le ndro su, i boi: Io beg bor ni. Su bodeie: Iou la born ndro uo. Su iao le leng, su la lundiendol, su bor ni. Heb ni asu bui, su gin bo mburer lobing gane. 4-5Madourang, Jesu i da le leng, su lao aden de dansu i bui, heb ni ademu bui? Su bode: Bugane. Boen i aga Jesu. 6Malabo Jesu i ndemani su, mu nduro, vong le ndro su, i boi; Bieni gahu ademu gle nemen sengen le ndol ademu, boen mu hur ni. Su gin hinen i, ni mabosanged bulhe, baghege de dansu rui gahu bui. 7Malabo lao ad Jesu, Jesu i da golnisden i manden, i vong le ndro Petrus: Aga Ndorlaben. Be Simon Petrus gin hirong i, Ndorlaben gorbo, i hosi salo aden, i gohis le ndran. 8Su lao ad Jesu su ndrbon le ndol asu, su da manan bui, su da baghege le leng. Su rui gahu le leng. 9Su da le leng, su ilndri moan i da iad, ma ni holel ndre moan, dagara suslong i da baghege. 10Jesu i vong le ndro su, hedi ni holel la born heb le ni, mu da gin hurdi. 11Simon Petrus i la ndol, i rui gahu, ni masanged malimungul e dilmou ni manden ge, i da le gahu. I de gin mud bui. 12Boen Jesu i vong le ndro su: Am ogo, gien gan hanu. Homo asu lao aden i de ndemani i bui: Uo sie? Dansu i aga Ndorlaben. 13Jesu i la born ndro su, i hedi suslong, i hengeni le ndro su, dagara su ni. 14Maberdolo dagara Jesu la born ndro su lao aden, be i gin ndne lie le ngad aden.

15Su gin ien boen, Jesu i vong le ndro Simon Petrus: Simon, ndur Johanes, golmisden io hanu le asu masi gorbo? I bodeie: Ehe, Ndorlaben uo danem goloisden uo. Jesu i vong le ndro i: Or gulue su ndurmeh ordo. 16Boen Jesu i ndemani Petrus lie: Simon, ndur Johanes, golmisden io ie? I bode: Ehe, Ndorlaben uo danem goloisden uo. Jesu i vong le ndro i: Or gulue su ndurmeh ordo. 17Jesu i ndemani i bersilie: Simon, ndur Johanes, golmisden io ie? Bergoln ad Petrus i gosusngo, be Jesu gin ndemani i maberdolo, golmisden io ie. I vong le ndro i, i bodeie: Ndorlaben, uo danem longu masigane, uo danem lie goloisden uo. Jesu i vong le ndro i: Or gulue su meh ordo. 18Ndangen, ndangen io boi le ndro uo: Ar uo ulhou uo gin hosi salo adem, uo gina le sal adem ge dege uo ha leng dogi. Malabo uo barmanda, uo daui nemem gle homo, i ogo i ghosi salo adem, i gdulieni uo le sal, uo mburem dogi ri. 19I gin vong dagara, i beg Petrus i danen i, i na gmed derbe, beg mugueni Jehova gleri. Nongen ad Jesu, boen i vong le ndro Petrus: Or ndrbo.

20Malabo Petrus ilndri ndrbo, i lele hom lao ad Jesu i da golnisden i, i da ndrbon lie. Lao ad Jesu ogo i da bagbege le berlalen ad Jesu be i gin ndemani i: Ndorlaben, sie i beg hevani uo? 21Be Petrus gin ilndri i ndrbon, i ndemani Jesu: Ndorlaben, sehe longu na gmeher ndro i? 22Jesu i bodeie: Be io ha lengi, i do da le boan mabenan io gmul, aga mburer adem bui. Am ndrbo. 23Le longu ogo, ngarnongen i da hilou le dogrosu lao ad Jesu: Lao ogo i de somad bui. Jesu i de gin bai bui, i de somad bui, i gin bai: Be io ha lengi, i do da le boan, mabenan io gmeher lie, aga mburer adem bui.

24Lao ogo i gin boharni leri i gin hondre bug ogo. Dandu i, nongen aden i ndangen ge. 25Longu dsoln i do da, Jesu i gin hinen i, be su beg hondre longu hendre e hendre le longu aden masigane i da gin hinen i, io hanguruen bug masigane ber boan i de vonei bui, le daui longu ad Jesu masi gleri.

Currently Selected:

Johanes 21: LLENT

Highlight

Copy