Johanes 19

Pilatus dieni Jesu.

1Malabo Pilatus i vong le ndro su lao aden, su ghosi Jesu, su grii i. 2Su polisboi su mengseni salion ber borndrui, boen su daui i le balen, salo eluen ramen le mandrn. 3Boen su la baghege ndro i, su loh, su boi: Iou bamugueni uo King asu Juda. Boen su rii i le bormarn. 4Pilatus i la ndro su Juda lie, i vong le ndro su, i boi: E lele, io dulieni ndramed ogo le ndro mu, ha hirong i, io de dono danoni heb longu momen aden bugane. 5Malabo Jesu i gin me, salion ber borndrui i da le borbalen, salo eluen ramen i da le mandrn. Malabo Pilatus i vong le ndro su: E lele, sehe ndramed gorbo. 6Be su ndurhian, ma su lao asu su ilndri Jesu, su loholo ndoun ndoun su boi: Ar dadhe i le gei, e dadhe i le gei. Pilatus i bodeie: Ghedi i, e dadhe i, io de dono danoni heb longu hendre momen aden bugane. 7Su Juda vong le ndro i, su boi: Nongen i da le Buk Helian adu: I gamed gle nongen ogo, i gin boi, i ndur Jehova. 8Be Pilatus gin hirong nongen ogo, i noh manden. 9Boen i iao le lundieum lie le ndro Jesu, i ndemani i: Gor adem i da oho? Jesu de vong de la ndro i hebsa bui. 10Malabo Pilatus i vong le ndro i, i boi: Uo mburem vong me ndro io ie? Uo de danem bui io ndoa le dadhe uo, ma io ndoa le rumburdi uo? 11Jesu i vong le ndro i, i bodeie: Uo de heb ndoa de la ndro io bui, ndoui adem i gin meher ndro uo le belengan. I ge, i da gin daui io gle nemem, longu aden momen i manden hanu gle longu adem. 12Le longu ogo Pilatus beg rumburdi Jesu. Su Juda ge su loholo ndoun ndoun: Be uo rumburdi ndramed ogo, uo gous ad Sesar bui. Homo ma homo i da hinen i gle ndoui aden gle King asu, i gob iil le ndro Sesar. 13Be Pilatus gin hirong nongen ogo, i boi, su gdulieni Jesu le lundieum giao. Boen i lugdo im logna gord, su bosoui logna ogo Gabadar, i vonei logna bad. 14Malabo dogrorang, uru asu Juda le ndurmeh gin me baghege. Pilatus i vong le ndro su Juda: E lele, aga King ademu. 15Su loholo su boi: Hedi i glendi e dadhe i le gei. Pilatus i vong le ndro su, i boi: Io dadhe King ademu derbe? Su ndurhian su bodeie: King adu bugane, Sesar i ndorlaben adu. 16Boen i daui Jesu le nemesu, su dadhe i ir gei. Su hedi Jesu.

Jesu na gmed.

17Jesu i la sal aden, i sab beldigei gle hauen, su dulieni i le logna si, su bosoui Golgata le nongen asu. 18Boen su dadhe Jesu ma sor marmou la born ndro i, homo le nemen sengen aden, homo le nemen gameao, Jesu i da dogro sor. 19Pilatus gin hondre heb nongen le gei ndre balen Jesu. Nongen ogo ogoro: JESU BER NASARET, KING ASU JUDA. 20Su Juda mabosanged su gin ilndri nongen ogo, Golgata i da baghege le gor Jerusalem. Pilatus gin hondre heb nongen ogo le nongen asu Juda, le nongen asu Rom, ma le nongen asu Grek. 21Su ndurhian asu Juda, su vong le ndro Pilatus: Mbue hondre: King asu Juda. Ghondre: Ndramed ogo i gin bai, i King asu Juda. 22Pilatus i bodeie: Aga mburer ordo ge, io gin hondre dagara, i giroh.

23Be su polisboi gin dadhe Jesu boen, su hedi salo aden, su ghendeni i, homo i hedi hasel, homo i hedi hasel. Golos aden su mbueresu mbuserei. 24Su vong me goure, mbue de mbuserei golos ogo, beg ilndri le gelman adu, sie i ghedi i. Dege su gin hondre dugian: Su gin mbuserei salo ordo, homo gin hedi hasel, homo gin hedi hasel. Su gin daui gelman asu le golos ordo. Su polisboi su gin hinen i dagara.

25Nanen Jesu i da baghege le beldigei ma ndern, dagara Maria, nambulen Klopas, dagara Maria Magdalena. 26Be Jesu gin ilndri nanen, ma homo asu lao aden, i da golnisden i manden, i da baghege ndro nanen, i vong le ndro nanen: Bihin aga ndurm. 27Boen i vong le ndro lao aden: Aga nanem. Malabo lao ogo i hedi nanen Jesu le um aden, i bogulue i.

28Jesu, be i danen i gin hinen mburer aden boen, i vong, i boi, dege su gin hondre goru: Golo i mar. 29Vinegar i da le lumiandran, su daui heb vinegar gle bohon. 30Be Jesu gin ilmui leri, i loh, i boi: Io gin hinen i boen sumburdi. Boen borbalen i voiliu, meluan gin bieni i gane. 31Baghege sabbath asu Juda, su mbueresu numbue su ndramed i da gei le sabbath, ma sabbath ogo i sabbath manden ge, uru asu Juda. Su la ndro Pilatus, su ndemani i, su polisboi su gdaii su, su da le gei, gle mordo asu, boen su ghedi numbuesu giao. 32Su polisboi gin me, su daii homo i da le horo ma homo i da le horo le gei. 33Be su gin meher ndro Jesu, su gin ilndri Jesu i ginmad gane. Su de gin ndumbue ndrun aden bui. 34Homo asu polisboi redughi gagao aden gle mandrn ad Jesu, ndran e ndrai gin muh. 35Homo, begmarn gin ilndri longu ogo i gin bosoui leri, nongen ogo monen ge, i danen, i gin vong nongen ndangen ge, i ha lengi, mu gboro nongen ogo lie. 36Longu ogo masi gin me, dege su gin hondre dugian: Mbue dumbue ndrun aden. 37Ma homo i da gin hondre goru, begmarsu gelndri i, su da gin redughi i.

Su doni Jesu ngad.

38Josev ber Arimatia i hom lao ad Jesu, i gin gorni i, i noh su Juda. I ogo, i gin meher ndro Pilatus, i ndemani i, beg hedi numbuen Jesu le beldigei giao. Pilatus i somui ri, i la ndro Jesu, i hedi numbuen le gei. 39Dagara Nikodemus, i da gin meher mahanu le ndro Jesu lobing, i hedi longu ngohondonreen dsoln. 40Su hedi numbuen Jesu, su nhui i gle salo su daui longu ngohondonreen leri, aga bern asu Juda be su doni su ndramed le ngad. 41Beleng hasel i da baghege le logna ogo, ngaibad si houen ge, i da le beleng ogo. Su de gin doni homo le ngaibad ogo masou. 42Sabbath asu Juda i da baghege, su hedi numbuen Jesu, su doni i le ngaibad ogo, i de manan bui.

Currently Selected:

Johanes 19: LLENT

Highlight

Copy