Apostel 6
6
Su eloh su manondrdilmou le mburer.
1Be lodu ad Jesu Kristo gin menda, su lao aden mabosanged, su ber Grek su bangondrngondr le su ber Juda, su Juda de gin hanguruen bihinou asu Grek le memrad asu heb hian bui. 2Su masongul e rumou su gin loh su lao ad Jesu masi le geherong, su vong, su boi: Aga i de monen bui, iou da bo mburer le nongen ad Jehova, iou da bo mburer le gan ansu lie. 3Mu ndere, hian, mu gahi su manondrdilmou, su gamel, Meluan Helian i da le bergolsu, su da hanguruen monen ge le molengamu, su gorbo su gob mburer le gan. 4Iou ge, iou beg bo mburer ge gle lodu, beg bohernou nongen ad Jehova ge dege mahanu. 5Su masi su da gin me goure, su mugueni nongen ogo, su somui ri. Su loh Stevanus, homo i da gin boro ndoui ad Jesu Kristo hian ge, bergoln i beb le Meluan Helian, dagara Philipus e Progorus, Nikanor e Timon, Parmenas e Nikolaus, homo asu Haiden ber Antiogia, i da gin ibdi bern ad Jesu Kristo. 6Su gamel ogo gin meher ndro su Apostel, su daui memesu gle borbalsu, su bo lodu. 7Nongen ad Jehova gin hilou ge, su mabosanged su la born ndro su, dagara su ndremda dohor boro ndoui ad Jesu Kristo.
Nongen le Stevanus.
8Stevanus, hom gamel, golnisden ad Jesu i da ndro i, ma Meluan Helian i da le bergoln, i gin hinen gelman ndoun ma longu mabosanged le molengasu ndramed. 9Su ndremda hernou holel ber numolodu asu Liberia, asu Kirene, asu Aleksandrea, asu Silisia, ma ber Asia mandehe, su bo iil le ndro Stevanus le nongen asu. 10De dansu ndounen Stevanus bui, nongen aden i hian hanu le asu masi. 11Ndrnesu ndremda hernou ogo i mah le aden, su bo iil le ndro i, su gahi su ndramed holel, su da vong, su boi: Iou gin hirong ndramed ogo i da gin boii Jehova, i da gin boii Mose gle nongen aden momen. 12Su bo mburer momen dagara, su gogobaini Stevanus, su labenen ber gor ma su ndremda hernou su gin me, su gin hosi i, su daui i le ndro su ndremda gord. 13Su ndramed holel gin me le gord su boi: Ndramed ogo i da boii um ad Jehova Helian ogo, i da boii nongen ad Jehova sidesi le nongen aden momen. 14Iou gin hirong, i gin bai: Jesu ber Nasaret na gmeher i ndumbue um ad Jehova gorbo. I gbieni nongen ad Jehova, Mose gin hengen i me ndro du. 15Su labenen masi, su ilndri, su lele bormarn ad Stevanus, bormarn aden i dege bormarn ad hom Angelo.
Currently Selected:
Apostel 6: LLENT
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society 1956
