Apostel 5

Ananias sor Savira.

1Hom gamel, ngarn Ananias, nambulen Savira, sor semani beleng asor. 2Boen su hedi sehendr le moni asor, sor gorni i. Sehendr sor daui le nemesu Apostel. 3-4Petrus i vong le ndro i: Ananias, desa Satan gin meher le bergolm, gin hosi i, uo gin bahilou le ndro Meluan Helian, gin gorni sehendr le moni adem? Aga memrad adem masigane, be uo da gin semani i, moni adem ge. Desa uo gin hanguruen momen dagara? Uo de gin bahilou le ndro hom ndramed bui, uo gin bahilou le ndro Jehova. 5Be Ananias gin hirong nongen ogo, i gin los le boan, meluan gin bieni i, gineao. Su da gin hirong leri, meluasu masi i ieb, noh asu dsoln. 6Su ulhou holel gin ndne, su nhui numbuen le salo, su doni i le ngad. 7Heb eluen bui muren, nambulen Savira gin me, i de danen heb le longu ogo masou. 8Petrus i vong le ndro i, i boi: Bai me ndro io: Su gin hengen le ndro mor moni ogoro gle beleng admor? I bodeie: Ehe, aga moni gle beleng adoro. 9Malabo Petrus i vong le ndro i: Desa mor gin hinen dagara, beg seslaini Meluan ad Ndorlaben ber belengan? E lele, ndegesu, su da gin hilou, gin doni nambulem le ngad aden, su da baghege le um, su beg doni uo lie. 10Malabo bihin gin los baghege le ndegen ad Petrus, i ginmad. Meluan gin bieni i. Su ulhou gin me, su gin ilndri i, i da ginmad, su huri numbuen, su doni i le ngad baghege le ndro nambulen. 11Su ber lodu ad Jesu, dagara su gor masi, su da gin hirong leri, su noh manden. 12Nemesu Apostel gin hinen gelman mabosanged ma longu ndoun le dogro su ndramed, su lao ad Jesu, su da gin me goure, le um ad Salomo sidesi. 13Homo de bo momen de la ndro su bui, su ndramed masi mugueni su. 14Su mabosanged su gin boro ndoui ad Ndorlaben, su gamel ma su bihin dsoln. 15Su gin huri su sik, gin daui su le mandrgos sal le berle su, be Petrus gin me, su ha lengi sameluan aden le ndro su, su horuan gleri. 16Su ndramed ber gor hoger e hoger su gin me goure, su gin huri su sik, dagara su ndramed ngongong i da le ndrnesu le ndro su Apostel, su gin regurdueni su masi.

Su Apostel le gord asu labenen.

17Su ndurhian ber gor, su labenen ma su Sadusi, ndrnesu i ma le asu Apostel. 18Su hosi su, su daui su le kalabus. 19Hom Angelo ad Ndorlaben gin me lobing, gin audi babi ber kalabus, i rumburdi su, i vong le ndro su, i boi: 20Al um ad Jehova, gobharni le ndro su ndramed longu ad Jehova. 21Be su gin hirong i, su gina madourang le um ad Jehova, su gin bohernou, gin henunuen su ndramed. Su ndurhian, ma su labenen su gin me goure, beg bo gord le ndro su Apostel. Su rendegien su polisboi, su gdulieni su Apostel gle ndro su. 22Su lao asu gina le kalabus, su de gin danoni su bui, su gin mul, su boi le ndro su labenen: 23Iou da gin me le kalabus, iou gin ilndri babi ber kalabus su gin hosi i ndoun e su polisboi bogulue babi, hendr ge dandu danoni su Apostel le lundie kalabus bui. 24Be polismaster ber um ad Jehova, ma su ndurhian gin hirong nongen ogo, de dansu i bui nongen ogo derbe. 25Malabo homo gin me, i vong le ndro su, i boi: Su gamel, mu da gin daui su le kalabus, su do da le um ad Jehova, su da henunuen su ndramed. 26Polismaster i hedi su polisboi aden, i dulieni su gle ndro su labenen, i de hosi su bui, i noh su ndramed, debosan su daii su le bad.

27-28Su gin me le bormarsu labenen, le bormarsu ndurhian su gin bai le ndro su: Iou da gin sendraini mu, mbue mu ghenunuen su le ngarn ad Jesu. Mu de gin hirong nongen adu bui, mu gin henunuen su ndramed masi ber Jerusalem. Mu ha lengi, iou masi gina momen ge? 29Petrus ma su Apostel su bodeie: Delengadu le nongen ad Jehova ge hanu le nongen asu ndramed. 30Jehova Ndorlaben asu Damu gin hingeni Jesu le ngad aden, mu da gin dadhe i le gei gin dieni na gmed. 31Jehova gin rui i le belengan, i da le nemen sengen, gin hinen i le ndurhian ber lang. I ogo, beg rumburdi su Israel, beg sibui longu asu momen giao. 32Longu ogo dandu i, iou boharni leri, dagara Meluan Helian i boharni longu ogo, i da le bergolsu su da delengasu le nongen ad Jehova. 33Be su gin hirong nongen ogo, i gina le bergolsu, su ha leng dieni su na gmed.

34Homo asu Pharisi, ngarn Gamaliel, i homo asu ndremda hernou, su ndramed gin mugueni hernou aden, i gin boi, su dulieni su Apostel glendi, 35boen i vong le ndro su labenen masi: Mu gamel ber Israel, hanguruen hian ge, mu da gob sa le ndro su ndramed ogo. 36Mahanu Teudas gin me, i gin boi le ndro su, i homo manden ge, su gamel mahanged su la born ndro i, boen su gin daii i, su gin sumbue su lao aden masi, gin daii su. 37Boen homo gin meher lie, Judas ber Galilea, i da gin loh su ndramed, su da gin me goure beg daui ngarsu le bug ad Sesar, i seslaini su, su gob iil le ndro Sesar. Boen su gin daii i, su gin sumbue su lao aden sumburdi. 38Malabo io beg vong le ndro mu, mbue gob momen le ndro su ndramed ogo, su giroh; be mburer asu i ad hom ndramed ge, i na glos, 39be i ad Jehova, de danmu bo iil le ndro su bui. De danmu ndumbue mburer asu bugane. Ha hirong nongen ordo, debosan mu gob iil le ndro Jehova. Boen su hirong nongen aden. 40Su loh su Apostel le lundie, boen su rii su, su sendraini su, mbue su bohernou le ngarn ad Jesu, boen su gin rumburdi su. 41Su Apostel su gin bieni um, su mugmug manden le ngendian asu, su gin ibdi i le ngarn ad Jesu. 42Su de melmal hebsa bui le mburer ad Jesu, bing si e rang si su henunuen su ndramed le um ad Jehova, ma le um asu, su bohernou le ndro su nongen le Jesu Kristo.

Currently Selected:

Apostel 5: LLENT

Highlight

Copy