Apostel 7

1Ndurhian asu i ndemani i malabo, nongen asu i monen ndangen de bui? 2Stevanus i bodeie: Mu ndere, mu damen, ha hirong nongen ordo. Jehova i da gin mbsig le ndro Damdu Abraham le engerang aden, le gor aden i da Mesopotamien, i de gina le gor Haran masou. 3I vong le ndro i, i boi: E bieni gor adem, e bieni su loum, al dogi le gor manan io da beg bosilieni ndro uo. 4Abraham i bieni gor asu Kaldae, i dogi le gor Haran. Be damen ginmad, Jehova rendegien Abraham le gor adu, le gor ademu. 5Goru i aden masou, heb beleng aden bugane, i gin vong le ndro i, i beg hengen le ndro su ndurn gor ogo bersi muren, ndurn ad Abraham bui. 6Jehova i gin vong nongen ogo: Su ndurn ber muren su da le gor si, asu bui, su ndramed ber gor ir ndounen su, su ghinen su gle lao dandendegei asu, su gob momen ndro su le Kristmas mahanged. 7Io ge, io beg bo gord le ndro su ndramed ber gor, su da gin bo momen le ndro su Israel dagara, boen su gbieni gor, su gdogi le gor Kanaan. 8Boen Jehova i gin daui le ndro Abraham gelman ad Jehova le sengen asu. Boen Isaak gin me, ndurn ad Abraham. I gin daui gelman ad Jehova le ndro i gle sengen aden, bing manan druo muren. Isaak aga damen ad Jakob, Jakob i damen asu damdu masongul e rumou. 9Su damdu ber nandugian ndrnesu gin mah le ad Josev, su semani i le gor Egipten le hom lao asu. Ndorlaben Jehova i da baghege ndro i. 10I rumburdi Josev le ngendian aden, i golnisden i, i gin daui hanguruen hian monen ge le ndro i, le bormarn ad Pharao, King asu Egipten. I gin hinen Josev le ndorlaben manden ge ber gor Egipten asu labenen masi. 11Song manden gin meher gin hilou le gor asu Egipten, ma le gor asu Kanaan. Su damdu ber goru su mundrul manden, heb gan ansu bui. 12Be Jakob gin hirong i, gan ansu Egipten mabosanged, i rendegien su damdu ber goru le gor Egipten bersi. 13Be su gin me lie, i boharni le ndro su ndern, i Josev boen Pharao gin hirong i, Josev i sie. 14Josev rendegien su le ndro damen Jakob i gin meher le gor Egipten, ma su loun masi, su ndramed manondrdilingul e limou. 15Jokab i dogi le gor Egipten, boen i ginmad, dagara su damdu. 16Su ndurn gin daui numbuesu le gor Sigem su gin doni su le ngaibad ad Abraham, i da gin semani mahanu le su ndur Hemor ber Sigem.

17Rang i baghege, Jehova i da gin boharni le ndro Abraham, su Israel su gin menda, gina mabosanged. 18Hom King asu Egipten gin me, de danen heb le Josev bui. 19I bo momen le ndro su loun adu, i rii su damdu, gin bieni ndursu mamemei le ndran, i mburen su mamaren. 20Le rang ogo Mose gin me, hom mbunana mamali ge; i da le um ad nanen le vara madolo. 21Boen su gin daui i baghege le ndran. Ndurbihin ad Pharao gin rumburdi i le ndran, i le ndran, i da le um aden ge, i dege ndurn aden. 22Su gin henunuen Mose le longu asu masi ber Egipten, i homo ndoa ge le nongen aden, ma le mburer aden. 23Kristmas aden mahangul, bergoln gunuen hi bui le asu ndern, su ndur Israel. 24Be i gin lindri homo, su gin rii i, i sobani ndern, i surien longu asu momen, i daii homo asu Egipten. 25I gin hanguruen le bergoln: Su ber Israel su ilndri, Jehova beg rumburdi su le nemen aden. Su de gin hanguruen dagara bui. 26Bing si muren i gin me, i ilndri, sor marmou bo iil, homo le ndro homo, i beg hinen iil asor boen, beg lug beno ndro sor, i vong le ndro sor: Mor gamel, mor ndern, desa homo i bo iil le ndro homo dagara? 27Gamel ogo i da bo iil le ndro ndern, i bo momen le ndro i dagara, ndren i irgu le ad Mose, i vong le ndro i, i boi: Sie gin hinen uo le ndorlaben adu, le ndremda gord adu ie? 28Uo ha lengi rii io dege uo gin daii homo asu Egipten bihe? 29Be Mose gin hirong nongen ogo, i vob le gor manan, i do da le gor asu Midian, ndursor aden marmao.

30Kristmas mahangul muren, hom Angelo ad Ndorlaben gin mbsig le ndro i le moan i da le dogrogei borndrui be i do da le marboga baghege le bahali Sinai. 31Be Mose gin ilndri i, meluan gin ieb le gelman ogo. Be i gin meher baghege, beg ilndri longu ogo, ngasen ad Ndorlaben gin boi: 32Io Ndorlaben asu damen, io Ndorlaben ad Abraham, ad Isaak, ma ad Jakob. Malabo Mose i rerr, i mburen lele longu hendre ogo. 33Ndorlaben i vong le ndro i: E bieni sumianegem giao, logna gorbo, ndegem gina ri, aga boan helian ge. 34Eluen io da gin ilndri su lao ordo, su da le gor Egipten, su gina momen ge, o gin hirong ngundr asu, malabo io gin meher, beg rumburdi su, am ndro io, io beg rendegien uo le gor Egipten. 35Mose ogo su da gin hangaini mahanu, su da gin boi le ndro i goru: Sie i gin hinen uo le ndorlaben, le ndremda gord adu? Jehova i gin hinen i le Ndorlaben asu, gin rendegien i, i rumburdi su le nongen ad Angelo i da gin mbsig le ndro i le gei borndrui. 36Mose ogo i gin dulieni su, be su gin bieni gor asu Egipten, i gin hinen gelman ma longu ndoun le ndro su Egipten le ndas ramen ma le marboga lie le Kristmas mahangul. 37Mose ogo i da gin vong le ndro su ndur Israel, i gin bai: Jehova i beg rendegien le ndro mu hom Provet dege io. 38I ogo i gina le ndro su, dege Angelo ad Ndorlaben gin vong le ndro i baghege le bahali Sinai. I gina le ndro su, gin boharni le ndro su damdu nongen ber lang, i da mamaren ge gin boharni me ndro du. 39Su damdu de delengasu le nongen aden bui, su gin bieni i, bergolsu hanguruen gor Egipten, beg mul le ndro su lie. 40Su vong le ndro Aron, su boi: E mengseni me ndro du gelman le su beld, su da dogi hanu le sal adu. Dandu bui, sehe longu gin meher ndro Mose, i da gin dulieni du le marboga. 41Su gin mengseni sameluan bulmagou. Su dirhor le ndro i gan ansu, su mugueni memrad asu, su da gin mengseni. 42Jehova ndrnen i mah le asu, i hangaini su, gin bieni su, su da lodu le ndro biri ber lang. Dege homo asu Provet gin hondre le bug aden: Hi derbe, mu da gin dohor me ndro io le gan anmu, be mu do da le marboga le Kristmas mahangul, mu ber um ad Israel? 43Bugane, mu da gin dohor le ndro beld Molok, mu da gin hanguruen gelman ad beld Revan, mu gin mengseni sameluan asu beld, mu gin lodu le ndro su. Io beg daui mu le gor Babilonia. Su ghosi mu, mu lao dandendegei asu.

44Jehova i gin bai le ndro Mose, i mengseni um hom le ndro Jehova, dege i gin bosilieni le ndro i, be su do da le marboga. 45Um ogo ber salo, su damdu gin hedi bersi, be Josua gin dulieni su Israel le gor asu Haiden, Jehova gin robuldi su Haiden masi le bormarsu damdu, mabenan David i King asu. 46Jehova golnisden David, i ndemani Jehova, i ha somui beg mengseni le ndro i um houen, le ndro Ndorlaben ad Jakob. 47Salomo ge gin mengseni le ndro i um hom. 48Ndorlaben ber belengan, logna aden i do da le um, nemesu ndramed gin mengseni bugane, dege Provet gin hondre: 49Gor lundielang aga logna ordo, gor boan, aga logna ber ndego. Sehe um mu beg mengseni me ndro io ie? Ndorlaben i boi sehe logna me ndro io, io da hengang ri? 50Nemo i da gin mengseni gor masigane de bui?

51Mu ndramed ndoun ndoun, bergolmu ma delengamu ndoun. Sidesi mu da bo lil le ndro Meluan Helian, su damu ber goru, mu dagara lie. 52Provet homo i da oho, damu ber goru de gin hingismad aden bui? Su gin daii su, su da gin boharni longu le Ndorlaben i da beg meher, mu ge, mu gin hangaini i, gin hevani i, mu gin daii i. 53Su Angelo su da gin doui nongen ad Jehova gle ndro mu, mu de gin hinen i bui.

54Be su gin hirong nongen ogo, i gina le bergolsu gane, su nunueie lehesu, ndrnesu i mah manden. 55Stevanus bergoln i da beb le Meluan Helian, i dendrai le belengan, i ilndri engerang ad Jehova, i ilndri Jesu i da le nemen sengen ad Jehova. 56I loholo, i boi: Malabo io ilndri gor lundielang i deh, io ilndri Ndurndramed, i da le nemen sengen ad Jehova. 57Malabo su lug bohosu manden ge, su loholo su ndrodhi delengasu, boen su hilou bersi ndro i. 58Boen su hosi i, su robuldi i le marbohon gor, su daii i le bad. Su da gin bieni bad, su daui salo asu eluen baghege ndro hom ulhou, ngarn aden Saulus, ir gulue salo asu. 59Boen su daii Stevanus le bad. I ogo, i loh, i boi: Ndorlaben Jesu, ibdi meluo gle ndro uo. 60Boen i loh, gina le ngondrnegen, i loh i boi: Ndorlaben, mbue surien longu asu momen, mbue hanguruen i. Boen meluan gin bieni i. Saulus, i da gin somui ri be su gin daii i.

Currently Selected:

Apostel 7: LLENT

Highlight

Copy