Apostel 10

Petrus ma polismaster Kornelius.

1I da le gor Sesarea hom gamel ngarn Kornelius. I hom polismaster asu polisboi ber Italia. 2I da gin dogi monen, i voaniso Jehova, i ma su ber um aden. I bo hian le ndro su Juda, i hengen le ndro su heb memrad asu bui, sidesi i da lodu le ndro Jehova. 3Bersi muren ndramed ogo i ilndri gelman. Ibia hom Angelo ad Jehova i gina le um aden le ndro i, i boi: Kornelius! 4Meluan ad Kornelius i ieb, begmarn i lele Angelo ndoun, i ndemani i i boi: Ndorlaben, io gob sa? I bodeie: Raring adem ma mburer adem hian i gina le belengan, le ndro Jehova, i da hanguruen leri. 5Rendegien su gamel le gor Jope, bai le ndro Simon, ngarn aden Petrus lie i gmeher ndro uo. 6I da le um ad Simon ndremda gogon, um aden i da le leng. 7Nongen ad Angelo ogo boen, i bieni Kornelius. Boen Kornelius i loh sor lao dandendegei aden marmou, ma hom polisboi, i da voaniso nongen ad Jehova lie. 8I bosoui le ndro su nongen masigane, i rendegien su le gor Jope.

9Bing si muren, be su da le sal, gin meher baghege le gor, Petrus i gina le belengan le um aden, beg lodu. 10Malabo i mundrul i ha leng ien heb gan. Be su da gin bo mburer le gan, ndoui ber belengan gin meher ndro i. 11I ilndri gor lundielang i deh ndob manden ge su gin lulueni vas i da le gersen mahahu. 12Longu mabosanged ber lonhou, bosel e lou, moad e drondrhun, ma ndorgan ber belengan i da le lundie ndob. 13Ngasen homo i loh, i boi le ndro i: Petrus edne, daii su, gien leri. 14Petrus i bodeie: Ndorlaben, bugane, io de gin ien heb longu i da helian ndro io, i da segdan masou. 15Malabo ngasen i da vong le ndro i bersilie: Longu masi, Jehova i da gin mengseni rosan, mbue hanguruen i segdan. 16Longu ogo gin meher ndro i maberdolo, boen su gin rui ndob le belengan lie. 17Petrus i de danen longu ogo masou, i de danen bui gelman ogo i da vonei sa. E lele, su gamel, Kornelius gin rendegien su, be su gin danoni um ad Simon, su da le marbohon um. 18Su loh homo, su ndemani i Simon, ngarn aden Petrus lie i do da, de bui. 19Petrus, be i da hanguruen gelman, i da gin mbsig le ndro i, Meluan Helian i vong le ndro i: Su gamel madilmou gahi uo. 20Edne, al ndro su, dogi la born ndro su le sal, io ge gin rendegien su. 21-22Petrus i la ndro su gamel, i vong le ndro su: Io gorbo, mu da gahi io. Mu ha lengi sa me ndro io ie? Su bodeie: Kornelius, polismaster adu, i da homo monen ge, i da voaniso Jehova ma su Juda masi, su da mugueni i. Angelo Helian ad Jehova gin meher ndro i, i gin vong le ndro i, i eloh uo le um aden, beg hirong nongen adem ge. 23Petrus i ndemani su, su gmeher le lundieum, i bo hian le ndro su le gan.

Bing si muren i la born ndro su, su dogi le gor Sesarea. Su lao ad Jesu holel ber Jope su la born ndro su. 24Su da gin dogi si, su gin meher le gor Sesarea. Kornelius i belengen su, ma su loun, dagara su gous aden i da gin loh su, su gin me goure. 25Be Petrus i gin meher le um, Kornelius i sohal sal le ndro i, i godurhu, i mugueni Petrus. 26Petrus i vong le ndro i, i boi: Edne io hom ndramed ge molhe. 27Boen su iao le lundieum, ma Petrus i ilndri su mabosanged su do da ri. 28I vong le ndro su: Mu danen i, i helian le ndro hom Juda, le dogi le um asu Haiden, su da asu Juda bui. Jehova ge i gin henunuen io, su ndramed masigane su de segdan bui, Jehova gin mengseni su. 29Be su lao adem gin loh io, io da gin somui ri. Malabo io gorbo, hian bai me ndro io, desa mu gin loh io. 30Kornelius i bodeie: Bing mahahu gin los, io da gin lodu le um ordo baghege ibia, hom gamel gin meher ndro io, salo aden beren, hinganen ge, i da le bormoro. 31I vong, i boi: Kornelius, Jehova gin hirong raring adem ma mburer adem hian ge, i hanguruen uo. 32Rendegien su holel le gor Jope, le ndro Simon, ngarn aden Petrus lie, i da le um ad Simon, ndremda gogon, um aden i da le leng. Be Petrus ogo na gmehere i bosoui le ndro uo longu masigane. 33Io gin rendegien su lao ordo le ndro uo, io mugueni uo, uo da gin somui ri. Malabo iou masi gorbo, iou da le bormarn ad Jehova. Iou beg hirong longu masigane, Ndorlaben gin boharni le ndro uo.

34Malabo Petrus i lug bohon, i vong, i boi: Io dono i hian ge malabo, Jehova de ilndri mandrn ad hom ndramed bui. 35Homo ma homo asu ndramed, i da voaniso Jehova, i da bo mburer hian ge, i beg rui i le ndro i. 36Danmu Nongen aden Helian le ndro su Israel, i da gin boharni le bohon ad Jesu Kristo, i Ndorlaben asu gor masi. 37Danmu longu masigane i da gin meher ndro du le gor asu Juda. Le taim ad Johanes i da gin bohernou le ndro su, i da gin surhi su ber Galilea. 38Jehova i gin daui Meluan Helian, ndoui ber belengan le ndro Jesu ber Nasaret. I ogo i gin dogi le gor masi, gin sobani su ndramed, gin regurdueni su, gin rumburdi su, beld Satan i da gin hosi su. Jehova i da le bergoln. 39Longu ogo dandu i, iou da bosoui longu masi ogo, i da gin hinen i le gor asu Juda ma le gor asu Jerusalem lie. Su gin dadhe i le gei, su gin daii i. 40Jehova, i ge, gin hingeni i le ngad aden, bing madolo muren. Su gin ilndri i, 41su masigane bui, iou holel ge i da gin loh du, i ha lengi iou gobharni longu ogo. Be i da gin ndne lie le ngad aden, i da gin ien gan, i da gin ilmui le molengadu. 42I gin bai me ndro du, iou bohernou le ndro su ndramed, iou gobharni le ndro su, Jesu i ndremda gord asu mamaren, ma asu ginmad, Jehova gin hinen i leri. 43Su Provet masi su gin boharni: Homo ma homo i da boro ndoui aden, Ndorlaben i esbui longu aden momen giao, le ngarn aden.

44Petrus i da vong ndon, Meluan Helian gin meher ndro su, su da gin hirong nongen aden. 45-46Su lao ad Jesu asu Juda, su da gin meher bersi ndro Petrus, meluasu masi i ieb manden, be su gin ilndri, Meluan Helian gin meher ndro su Haiden lie. Su gin hirong i, su da gin bosoui longu le Jehova le germen houen, su mugueni Jehova. Petrus i boi: 47Be Meluan Helian gin meher ndro su, dege i gin meher ndro du lie, dandu sendraini su le ndran Helian bui. 48I vong le ndro su, su gsurhi su le ngarn ad Jesu Kristo. Boen su ndemani i, i dandon le gor asu le bing holel.

Currently Selected:

Apostel 10: LLENT

Highlight

Copy