Apostel 11

Petrus i boharni le ndro su Apostel: Surhi asu Haiden i monen.

1Su Apostel ma su ndern ber Judea gin hirong i, su Haiden gin somui le nongen ad Jehova. 2-3Be Paulus gin mul le gor Jerusalem, su lao ad Jesu asu Juda su bo gros le ndro Petrus. Su vong, su boi: Uo gina le um ad hom Haiden, uo gin ien gan le mandrgosgeao asu. 4Malabo Petrus i bosoui le ndro su longu masigane i da gin me dala, i vong, i bai: 5Io do da le gor Jope, io gin lodu, malabo ndoui ber belengan gin meher ndro io, io gin ilndri gelman si. Ndob manden su gin lulueni ber lang su gin hosi i le vas mahahu, ndob ogo gin meher baghege ndro io. 6Be io da gin lele, io gin ilndri longu mabosanged ber lonhou, dagara moad e ndrondrhun ma su ndorgan ber lang. 7Bersi io gin hirong ngasen ad homo, i da loh, i bai: Petrus, edne, gdaii su, gien leri. 8Io bode: Ndorlaben, bugane, io de gin ien heb longu i da helian ndro io bersi bugane. 9Ngasen ogo i vong bersilie: Longu masi Jehova i hanguruen, i rosan, mbue hanguruen i momen ge. 10Gelman ogo gin meher ndro io maberdolo, boen i gina le belengan lie. 11E lele malabo su gamel madilmou, su da marbohon um ordo, su ber Sesarea. Homo gin rendegien su me ndro io. 12Meluan Helian gin vong me ndro io, io la born ndro su. Su lao ad Jesu ber Jope, su manonou, su la born ndro du le sal adu. Iou gin meher Sesarea, iou la um ad ndramed, i da gin loh io. 13I bosoui me ndro du longu masi i da gin meher ndro i, i boi, i gin ilndri hom Angelo le um aden, i da baghege ndro i, i gin boi: Rendegien su lao adem le gor Jope, eloh hom gamel, ngarn Simon, su bosoui ngarn Petrus lie. 14I ogo i gobharni le ndro uo longu masigane, boen uo, ma su ber um adem masi horuan ge. 15Be io da gin boharni heb longu le Jesu, Meluan Helian gina le bergolsu masi, dege i da gin meher ndro du goru. 16Io da gin hanguruen nongen ad Ndorlaben, i da gin boi: Johanes gin surhi mu ge le ndran, io ge, beg surhi mu gle Meluan Helian. 17Be Jehova i gin daui golnisden aden le ndro su, dege i da gin ilgi le bergoldu, be iou da gin boro ndoui ad Ndorlaben Jesu Kristo, io dono sendraini su derbe, be Jehova gin somui ri? 18Be su gin hirong nongen ogo, su de bo iil le ndro Petrus bui, su mugueni Jehova, su boi: Jehova i da belueni bern asu Haiden lie, i hengen su, su mamaren lie.

Lodu ad Jesu i da le gor Antiogia.

19Su lao ad Jesu, su Juda gin masumbue su, su gin meher le gor Vinisien, le Sipern ma le Antiogia. Su gin bosoui nongen le Jesu le ndro su Juda ge, le ndro su Haiden bui. 20Su gamel holel, ber Sipern e Kirene, be su gin meher le gor Antiogia, su bohernou le ndro su Haiden nongen le Ndorlaben Jesu. 21Nemen ad Ndorlaben i da ndro su, i sobani su, su mabosanged gin belueni bern asu, su lao ad Ndorlaben. 22Ngarnongen le longu ogo gin hilou le ndro su lao ad Jesu ber Jerusalem. Su rendegien Barnabas le gor Antiogia. 23Be i gin meher le gor Antiogia, i ilndri golnisden ad Jehova le molengasu, i mugmug ge, i henunuen su, i ndemani su, su boro ndoui ad Ndorlaben le bergolsu gane. 24Barnabas i hom gamel monen ge i da gin boro ndoui ad Ndorlaben, Meluan Helian i da le bergoln. Su mabosanged ber gor ogo su lao ad Ndorlaben. 25Boen Barnabas i dogi le gor Tarsus, beg gahi Saulus. 26Be i gin danoni i, sor marmou dogi le gor Antiogia su dandon Kristmas si, su Antiogia gin somui le asoro, sor gin henunuen su Antiogia mabosanged. Su ber Antiogia su bosoui su lao ad Jesu: Kristen.

27Le rang ogo, su Provet ber Jerusalem gin meher le gor Antiogia. 28Homo asu, ngarn Agabus, i dne, i boharni gle ndoui ad Meluan Helian, song manden beg meher le gor masigane ber boan. I gin mehere dagara, be Klaudius i ndurhian ber Rom. 29Su lao ad Jesu su gin vong me goure, su beg daui heb memrad asu le geherong, beg sobani su ndern ber Judea. 30Su gin hinen dagara, su gin daui moni asu le nemen ad Barnabas sor Saulus, su gin rendegien su le ndro su Apostel ber Jerusalem.

Currently Selected:

Apostel 11: LLENT

Highlight

Copy