Apostel 9

Saulus belueni bern aden.

1Saulus i da bo iil le ndro Ndorlaben, ma le ndro su lao aden sidesi. 2I gina le ndro su ndurhian ber gor Jerusalem, i ndemani su gle pas, i beg dogi le gor Damaskus, le ndro su Juda, beg hosi gamel ma su bihin, su da gin ibdi Jesu gle Ndorlaben asu, beg rui su le gor Jerusalem. 3Be i da gin dogi le sal, i gin meher baghege le gor Damaskus. Malabo sul ber lang mandromai gin meher ndro i roud. Gin hinganen manden le ndro su. 4Saulus i los le boan, malabo i hirong ngasen ad homo i da loh, i boi: Saul, Saul, desa uo da hingismad ordo ie? 5Saulus i ndemani malabo: Ndorlaben uo sie? I bodeie: Io Jesu, uo da bo bahun le ndro i. 6Edne, al gor ogo, su da bosoui le ndro uo, uo gob sa malabo. 7Su gamel, su da le sal la born ndro i, de dansu vong hebsa bui, su lie gin hirong ngasen ad homo, de dansu ilndri homo bui. 8Malabo Saulus i dne, beg lele, i de danen ilndri hebsa bui. Su dulieni i le gor Damaskus. 9Bing madolo begmarn bui, de gin ien hebsa bui.

10Hom lao ad Jesu i da le gor Damaskus, ngarn Ananias. Ndorlaben gin mbsig le ndro i, i vong le ndro i, i boi: Ananias! I bodeie: Ndorlaben io gorbo. 11Malabo Ndorlaben i vong: Edne, al le sal, su bosoui sal monen. Ndemani su ber um ad Judas le ad hom gamel, ngarn Saulus ber Tarsus. E lele, i lodu. 12I gin ilndri gelman, hom gamel ngarn Ananias gin meher ndro i, gin daui nemen le borbalen, begmarn gin reu lie. 13Ananias i bodeie: Ngarnongen gin hilou le ndramed ogo me ndro io, i da gin bo iil le ndro su lao aden helian ber gor Jerusalem sidesi. 14Su ndurhian gin hengen le ndro i pas, i ndoa le hosi su masi su da lodu le ngarm. 15Ndorlaben i vong le ndro i, i boi: Al hilou ndro i, io beg hinen ndramed ogo gle hom lao ordo, i da boharni le ndro su Haiden, ma le ndro su King ber boan, ma le ndro su ndur Israel le longu ordo ber lang. 16Io beg bosilieni le ndro i, sehe ngendian ir belengen i, be i da bo mburer ordo. 17Ananias i dne, i dogi le sal, le um ad Judas, i daui nemen le borbalen ad Saulus, i vong le ndro i, i boi: Ndere Saul, Ndorlaben gin rendegien io, Jesu i da gin mbsig le ndro uo le sal adem, i ha lengi, begmarm na greu, uo danem ilndri lie. Meluan Helian na gmeher ndro uo. 18Malabo begmarn gin reu i danen lele hian, i dne, su gin surhi. 19Boen i gin ien gan lie.

Mburer ad Saulus le gor Damaskus e Jerusalem.

Saulus i da le gor Damaskus le bing holel. 20I bohernou le ndro su longu le Jesu le numohernou asu, i boharni le ndro su, Jesu i ndur Jehova. 21Su masi su gin hirong nongen aden, meluasu i ieb, su vong, su boi: Aga i Saulus, i da gin bo iil le ndro su masi su da gin lodu le ngarn ogo de bui? I gin meher le gor ogo, beg hosi su lao ad Jesu ber gor ogo, beg rui su le gord le ndro su ndurhian ber Jerusalem, de bugane? 22Saulus i da bohernou le ndro su Juda ber Damaskus nongen le Jesu. I boharni le ndro su, Jesu i Mesias adu. Meluasu masi i ieb leri. 23Be i da gin bo mburer dagara, su Juda vong le goure, su beg daii Saulus. 24Saulus gin hirong leri, su Juda, su bogulue babi ber gor ma sal lobing e lorang, beg hosi Saulus, beg daii i. 25Su lao aden, i da gin henunuen su, su gin hedi ndob manden, su gin daui Saulus le ndob, su lulueni i le boan. 26Boen Saulus i dogi le gor Jerusalem. I la born ndro lao ad Jesu. Su ge, su noh aden, de dansu boro i bui, Saulus i hom lao ad Jesu. 27Malabo Barnabas i golnisden Saulus, i dulieni i le ndro i le ndro su Apostel, i bosoui le ndro su longu, i da gin meher ndro i le sal, i da gin ilndri Ndorlaben Jesu, i da gin boi le ndro i, boen i gin bohernou le ndro su Juda ber Damaskus nongen le Jesu. 28Malabo su gin somui le aden, i da le gor Jerusalem le dogrosu, i bohernou le ndro su le ngarn ad Ndorlaben. 29I bosoui le ndro su longu ber lang, su bo iil le ndro Saulus, su Juda ber gor Grek. Su beg daii Saulus. 30Be su lao ad Jesu gin hirong leri, su rendegien i le gor Sesarea, boen Saulus i dogi le gor Tarsus.

Mburer ad Petrus le gor Lida e Jope.

31Ndorlaben gin lug mandri aden le ndro su lao ad Jesu masi ber Judea, ber Galilea, ma ber Samaria. Su da gin dogi monen ge le bormarn ad Ndorlaben, voasuiso Ndorlaben asu. Su gin menda, gina mabosanged gle ndoui ad Meluan Helian, i da gin sobani su.

32Petrus i da dogi le gor hoger e hoger, i gin meher ndro su Kristen ber gor Lida. 33I ilndri hom gamel, ngarn Eneas, i da le berle aden le Kristmas manondruo, i gina sik gane, de danen dogi bui. 34Petrus i vong le ndro i, i boi: Eneas, Jesu, Mesias adu, beg regurdueni uo, edne, hedi berle adem. I ogo i dne malabo. 35Su ndramed ber Lida ma ber Saron, be su gin ilndri i, su belueni bern asu, su lao ad Ndorlaben Jesu.

36I da le gor Jope hom bihilou ad Jesu, ngarn Tabea. I da gin bo mburer hian ge, gin sobani su, heb memrad asu bui. 37Le taim ogo, Tabea gina sik, i ginmad. Su gin surhi numbuen le ndran, boen su daui i le berle aden, i da le um le belengan. 38Lida i da baghege le gor Jope, be su ber gor Jope gin hirong i, Petrus i da le gor Lida, su rendegien sor marmou le ndro i, su ndemani Petrus: Am ndro du roud. 39Petrus i dne, i la born ndro sor, be i gin meher le gor Lida, su gin dulieni i le um ad Tabea. Su bihinou gin meher, su da gin dang, su bosilieni le ndro i golos e salo asu, Tabea gin hengen le ndro su, be i da mamaren le gor. 40Petrus gin buldi su masi, boen i godurhu, i bo raring. Muren i vong le ndro bihin ogo i da ginmad, i boi: Tabea edne! Malabo begmarn ad bihin gin reu, be i gin ilndri Petrus, i lugdo. 41Petrus i boro nemen, i sobani i, i gin ndne, boen i loh su lao helian, ma su bihinou, i dulieni Tabea le ndro su. 42Ngarnongen le longu ogo gin hilou le ndro su masi ber Jope. Su mabosanged gin belueni bern asu, gin boro ndoui ad Ndorlaben. 43Petrus i dandon le gor Jope eluen hebe. I da le um hom ad Simon, i da bo mburer le gogen meh.

Currently Selected:

Apostel 9: LLENT

Highlight

Copy