Marc 15

Jesus va gusu Pilate

(Matt 27.1-2, 11-14; Luc 23.1-5; Jean 18.28-38)

1Muna kedi bivunda bibavagulitsi bapagu na bivunda bisusu na milonsi mimigaga na bivunda bineni biotsu bamabenguna va mosi uyemugelila yinsima. Banomana utunga Jesus bapanga bamamubega ombu Pilate. 2Pilate amamuwivula rie: Ndeju la kaga jibaJuif?

Jesus amamugabusila rie: Ndeʼ beni gumadivosa.

3Bivunda bibavagulitsi bapagu bamamufuengilila mambu mapuela. 4Pilate amamuemuwivula rie: Gugewaguli ne dimosi? Gugegulu begufuengilili?

5Tumba Jesus amamuebusa uwagula; Pilate amakambulu mu dionyi.

Jesus evegu mbela dufu

(Matt 27.15-26; Luc 23.13-25; Jean 18.39-40; 19.1-16)

6Kadi feta Paque, Pilate amabapalisilanga muisi tsugu agu batu bamarondanga. 7O tsugu vamaba mutu, diina diandi Barabbas, jogu na bambatsi bandi bamaboka mutu mu nguba. 8Batu bamabenguna ombu Pilate na bamamuwivula uvaga ama amabavayilanga na kala. 9Pilate amabawivula rie: Duirondi yiri nyudupalisila kaga jibaJuif?

10Amajaba yiri bivunda bibavagulitsi bapagu bamafunda Jesus mu diambu didiwavi. 11Tumba bivunda bibavagulitsi bapagu bamatsagumusa yinombu yiri bowivula Pilate ubapalisila Barabbas. 12Pilate amamuewivulayinombu rie: Kabogu yi duirondi yiriiiyuvaga na jandi agu duinengili kaga jibaJuif?

13Bamamuegamuga rie: Mugomini va kurusu!

14Pilate amabawivula rie: Dibi yi atsivaga?

Tumba bamaviolila ugamuga rie: Mugomini va kurusu!

15Pilate amaronda ulasa batu ubueji kabogu amabapalisila Barabbas. Amadimbisa Jesus mikasa mbana amamuwakisa ugomunu va kurusu.

Bagora udesa bedesi Jesus

(Matt 27.27-31; Jean 19.2-3)

16Bagora bamabega Jesus o gari ndagu (diwendi rie: o ndagu yivunda yibulongu) aguna dibuli diotsu dimabenguna va mosi. 17Bamamuduisa yijungi yibenga na bamavasa dugaba dumatsiendi adu bamamuduisa. 18Mbana bamamuvega mbolu rie: Mbolua kaga jibaJuif!

19Bamamudimba na nguangu va muru na bamamufuta mateji, bamakutama na bamagudama va gusu andi. 20Banomana umudesanga bamamuvula yijungi yibenga na bamamuemuduisa biduaru biandi mbana bamamubega uyegomunu va kurusu.

Jesus egomunu va kurusu

(Matt 27.32-44; Luc 23.26-43; Jean 19.17-27)

21Ava bamabila mu nsila bamabenguna na mutu diina diandi Simon agumaruyila o musiru. Bagora bamamutsotsa ubega kurusu Jesus. Simon eni amaba muisi Cyrene taji andi Alexandre, muana nguji andi Rufus. 22Mbana bamabega Jesus o Golgotha, divindugulu rie: mbura dubengili. 23Jogu bamamuvega dive dinganyi tumba amadibusa. 24Mbana bamamugomina va kurusu na banobuaga mbanda ujaba banyi bodila biduaru biandi, bamabigabana. 25Dimaba kedi mbe wisi usakamata puela ava bamamugominina va kurusu. 26Mambu memama mamasonu va kurusu rie: Kaga jibaJuif. 27Yiari na yiari bamagomina bikongu va bakurusu; umosi va mabaala mandi na ususu va magetu mandi. [ 28Anana Bisonu bimadugusulu rie: Amarangu va mosi na batu babi.]

29Ava batu bamavioyilanga bamamusienga na bamamuangisa miuru na bamagamuga rie: Ndeʼ aguvu na mangolu upansa Ndagu Nsambi nomuejirunga mu bilumbu birieru, 30kegobula, sunduga!

31Bivunda bibavagulitsi bapagu na milonsi mimigaga wandi bamamudesanga rie: Jandi agumagobula basusu agorungula ukegobula? 32Tsie tulabatianu Christ, kaga jiIsrael, nana esunduyili va kurusu mbana tumuvayila yitu!

Jogu abamagomunu nandi bamamusienga wandi.

Dufu duJesus

(Matt 27.45-56; Luc 23.44-49; Jean 19.28-30)

33Ava muangulu bulongu buotsu bumaba yika pisama na pisama te na murekumunu. 34Ava murekumunu Jesus amagamuga rie: Eloi, Eloi, lema sabachthani? Divindugulu rie: Nsambi ami, Nsambi ami, mu mbari yi gumambuayila?

35Bamosi abamaba vana banomugulu bamavosa rie: Guluanu enengili Elie! 36Umosi amawenda mbangu ubasa mutsabu dive dinganyi, amaguvakiga va nguangu. Amagubambasana na munu Jesus mbana amavosa rie: Lekelati tanguji Elie oruga umusundusa.

37Tumba Jesus anogamuga mugamu uneni, amatabuga.

38Dumbu duNdagu Nsambi dumapasiga biasi bibeji, ubandila o julu te no tsi. 39Yivunda yikama bagora ayimaba va nsungisini na Jesus anolaba nana amatabuyila amavosa rie: Dingensa mutu eni abetsi Muana Nsambi.

40Vamaba bagetu bamosi abamamukelisa. Va gari ogu vamaba Marie Magdala na Salome na Marie nguji Jacques (aji ngebi) na Joses. 41Bamadukanga Jesus ava amabila o Galilee na bamamusalilanga. Bagetu basusu bamaba vana abamaruga nandi o Jerusalem.

Dutsigu duJesus

(Matt 27.57-61; Luc 23.50-56; Jean 19.38-42)

42-43Ava tsisiga eni Joseph muisi Arimathee amatola vana. Amaba umosi va gari bivunda bineni. Amavivanga ujaba Durumu duNsambi. Yimaba yilumbu ayi bekunsi Paque (diwendi rie: vendredi). Kabogu amawenda ombu Pilate uyevonda mfumbi. 44Pilate amakambulu ugulu yiri Jesus amaketabuyila. Kabogu amanengila yivunda yikama bagora na amamuwivula rie: Dingensa amatabuga? 45Anogulu munu uyivunda yikama bagora amasingisa Joseph ubonga mfumbi. 46Joseph anosumba tsanda amasundusa mfumbi na amajigumba tsanda. Amajitsiga o ngila ajimatobu mu dimanyi mbana amajidibiga na dimanyi dineni. 47Marie Magdala na Marie jinguji Joses bamamukelisa kabogu bamalaba ava Jesus amatsigulu.

Currently Selected:

Marc 15: PUU1992

Highlight

Copy