Marc 14

Fundu aji bamatungila Jesus

(Matt 26.1-5; Luc 22.1-2; Jean 11.45-53)

1Bivunda bibavagulitsi bapagu na milonsi mimigaga banojaba yiri vamasiala yika bilumbu bibeji te na feta jimapa magambu na dufunusu ajinengulu Paque, bamaronda uboka Jesus o musuega. 2Bamavosa rie: Tuyadivaga mu temu feta mu mbari batu bakevaga nguba.

Jesus ewitulu matsi o Bethanie

(Matt 26.6-13; Jean 12.1-8)

3Ava Jesus amabila o Bethanie o ndagu Simon agumaba na nyambi, mugetu amabarasuna ava betsanini va tavula. Amabega muyombu udufunu duneni; amadibula yirura na amawitila muyombu va julu muru uJesus. 4Bamosi bamavosa na kabu rie: Dibandu yi uibungulu nana? 5Mbe umasumbusu mbe tumadila kama yirieru tsimbongu tsilora jivema uvega ombu bijaga. Bamasiemba mugetu eni na mangolu. 6Tumba Jesus amavosa rie: Mudundianu! Dibandu yi duimulasili maguga? Jandi atsipayila diambu diboti. 7Bijaga bivu nenu temu tsiotsu na durungula ubavayila maboti nana duirondili, tumba menu ngoba nenu temu tsiotsu. 8Jandi atsivaga adi atsirungulu; amakekotsila muyombu ukunsa dunyuru duami te na dutsigu. 9Ngensa nyidutsinguli rie: Mbura tsiotsu atsi Musamu Uboti usamunu te na malongu motsu adi mugetu egugu atsipayila diurangumunungu.

Judas ukunsa ekunsi kwakusulu Jesus

(Matt 26.14-16; Luc 22.3-6)

10Judas Iscariote umosi va gari digumi na badukitsi babeji amawenda ombu bivunda bibavagulitsi bapagu uyekunsa kwakusulu Jesus. 11Banomana umugulu bamalaba nsangu na bamavangana umuvega mbongu. Ubongila va temu eni Judas amaketanga Jesus umuwakisa ombu gogu.

Jesus uji eji feta Paque na badukitsi bandi

(Matt 26.17-25; Luc 22.7-14, 21-23; Jean 13.21-30)

12Badukitsi baJesus banolaba yiri yilumbu yitega yifeta jimapa magambu na dufunusu yimatola, ayi bamabokila yindombu, bamamuwivula rie: Agunyi guirondi tuyegulambila Paque? 13Jesus amasindiga badukitsi bandi babeji na amabalonsa rie: Wendanu o musiengi, dubenguna na dibaala adiwendi na tsuva mamba. Mudukianu, 14ava okotila o ndagu dukavosa na odila ndagu rie: Mulonsi ewivuli rie: Jetu na badukitsi bami tugodila mbura aji tulila Paque? 15Na odulonsa yibuku yineni yiminsu ayi julu; amuna dulambila biguji biPaque. 16Banowenda bamarasuna motsu nana Jesus amavosila na bamayelamba biguji biPaque.

17Ava tsisiga Jesus amaruga na digumi na babeji. 18Ava bamatsanina va tavula uji, Jesus amavosa rie: Ngensa nyidutsinguli rie: Umosi va gari enu oyiji nami, omfunda. 19Badukitsi bamalaba munyongu na bamamu wivula umoʼ umosi rie: Je menu?

20Jesus amabawaka rie: Va gari enu, digumi na babeji, voba umosi agubotiga dipa nami mu yipela. La jandi! 21Muana Mutu ofu nana Bisonu bisonugulu tumba ka muna maguga ma dibaala adifundi Muana Mutu olaba! Mbe diwelimina yiri dibaala dieni asamaburu.

Tavula Fumu

(Matt 26.26-30; Luc 22.15-20; 1 Cor 11.23-25)

22Uji beji na Jesus amabonga dipa; anogabusila Nsambi diboti amadibukula na amabagabila novosa rie: Dibongianu, adudu la dunyuru duami.

23Mbana amabonga kopa, anogabusila Nsambi diboti, amabavega jionyi, jogu botsu bamanu. 24Amabaisingula rie: Amama la malungu mami amamawitulu mu diambu dibapuela; malurigu mami amedugusu pangini Nsambi. 25Ngensa riyidutsinguli rie: Ngomuenu mamba mamilunda te na nyumanu ava Durumu duNsambi dujabununu. 26Banomana uwimbila nyimbu tsifeta, bamawenda o julu mukongu umiOlive.

Jesus ubiga ebiyi yiri Pierre omugala

(Matt 26.31-35; Luc 22.31-34; Jean 13.36-38)

27Jesus amatsingula badukitsi bandi rie: Jenu botsu dutina mu mbari Bisonu bisonugu rie: Nyuboka mubungulitsi bindombu na bindombu biupansiga yiari na yiari. 28T umba ava nyurambuyila o dufu nyudureyila o Galilee.

29Pierre amamutsingula rie: Menu ngogurina, via, ne pa botsu basusu bodivaga.

30Jesus amamuwaka rie: Kebana Pierre! Ne koku akavosa temu beji mukolu egugu, guvosa temu yirieru rie: Ngemujabi!

31Tumba Pierre amamuewaka rie: Tsatsabi! Ngogugala ne pa vengu nyufu nagu!

Badukitsi botsu bamavosa munongu mosi.

Jesus usambila esambili o Gethsemane

(Matt 26.36-46; Luc 22.39-46)

32Mbana bamatola o mbura ajinengulu Gethsemane na Jesus amatsingula badukitsi bandi rie: Tsananu vava, nyuwenda o gusu uyesambila. 33Abamawenda nandi o gusu yika Pierre na Jacques na Jean. Amalaba keri na goma 34na amabalonsa rie: Nyigulu tindi munyongu. Sialanu vava duyawenda bilu.

35Mbana amakakana nogu nana vava na vana na amagudama va tsi; amasambila rie: Pa divu diwelimina, nyiyalaba maguga madiweru diedidi. 36Amabuesa rie: Tata motsu morungulu nagu! Pa guisingi, nyiyanu kopa ejiji jimaguga! Tumba tsiri duganu duami aduvagu, aduagu duvagu.

37Mbana amagabuga ombu badukitsi beni barieru na amabarasuna bilu, amavosa na Pierre rie: Simon, yilu guiwendi! Gugaarungula umoga ne diweru dimosi! 38Duyawenda bilu, sambilanu yiri dumangu dugoduviolila. Mirima mienu misingi tumba nyuru tsienu tsivu tsideda.

39Amamuekakana nogu na amasambila munongu mosi. 40Anogabuga ombu badukitsi amamuebarasuna bilu, misu yika timbila! Bamabasa na yisonyi.

41Anogabuga kumbu ajimurieru amavosa nogu rie: Sie wendianu bilu na vumanu! Vana dedi! Diweru dimatola. Labanu Muana Mutu amavegu ombu bavayitsi bamasumu. 42Relamanu, tʼwendianu! Labanu oyimfundisi amaruga.

Ugaanga begaangi Jesus

(Matt 26.47-56; Luc 22.47-53; Jean 18.3-12)

43Yika uvosa evosi na Judas, umosi va gari digumi na badukitsi babeji, amaruga na batu bapuela abamaba na majenga na banguangu. Bamasindugu na bivunda bibavagulitsi bapagu na milonsi mimigaga na bivunda bisusu. 44Judas amabavega yilimba kala rie: Agu nyubumba la jandi agu duirombi. Mugaangianu na mubeyianu o dimbu. 45Yika Judas etoli ombu Jesus amavosa rie: Mulonsi!

Mbana amamubumba. 46Kabogu batu beni bamagaanga Jesus na bamamutunga mikudu. 47Umosi agumaba vana, amasomuna dijenga na amatabula musalitsi uyivunda yibavagulitsi bapagu dituji. 48Jesus amabawivula rie: Diwelimina yiri dukaangila nana begaangili yikongu na majenga na banguangu? 49Yilumbu na yilumbu nyibetsi nenu o Ndagu Nsambi na dusamakaanga Mbukua, vagaa diambu, vengu Bisonu biudugusu.

50Mbana badukitsi botsu bamamurina.

51Mufudu umosi amamuduka agumaduara yika tsanda. Mbe bamamugaanga 52tumba amarina penyi, jogu bamasiala yika na tsanda andi.

Jesus va gusu bivunda bineni

(Matt 26.57-68; Luc 22.54-55, 63-71; Jean 18.13-14, 19-24)

53Bamatolisa Jesus o ndagu yivunda yibavagulitsi bapagu, aguna bamarasuna bivunda bibavagulitsi bapagu na bivunda bisusu na milonsi mimigaga. 54Pierre amayenabadukanga vagegeyi. Muji umabangusu va dulombili duyivunda yibavagulitsi bapagu; Pierre amatsana na basalitsi botsu na bamagoranga muji.

55Bivunda bibavagulitsi bapagu na bivunda biotsu bisusu bamaronda ufunda Jesus nomuvega mbela dufu tumba basamadila ne diambu dimosi. 56Bambeji bapuela bamamana miunu miogu tumba misamaba kingu mosi. 57Bamosi bamafurila Jesus rie: 58Jetu tumagulu ava amavosila rie: Nyupansa Ndagu Nsambi ejiji ajimarungu na batu. Yiotsu ayi bilumbu birieru biusukila nyukemanina jisusu ajigorungu na batu.

59Tumba ne jogu wogu basamaba na kingu mosi.

60Mbana yivunda yibavagulitsi bapagu amarelama va gari abamabenguna na amawivula Jesus rie: Gugewaguli? Gugegulu begufuengilili?

61Tumba Jesus amavola sui na asamawaka ne dimosi. Yivunda yibavagulitsi bapagu amamuemuwivula rie: Ndeju la Christ, Muana Nsambi?

62Jesus amagabusila rie: Nyiina, o gusu dulaba Muana Mutu atsana va mabaala maNsambi na osunduyila o julu va gari mamungi.

63Mbana yivunda yibavagulitsi bapagu amapasa biduaru biandi na amagamuga rie: Tugomueromba bambeji basusu! 64Jenu dutsimugulu elensi Nsambi. Bunsonsi yi dumutabulila? Botsu bamavosa kingu mosi rie: Ana mbela, afuangingi!

65Bamosi bamamufuta mateji, basusu bamamukubiga yinsi na banomudimba bamamuwivularie: Jabati! Anyi atsigudimba?

Bakelisi batsugu banomudila bamamudimba mambata.

Pierre ugala egali Jesus

(Matt 26.69-75; Luc 22.56-62; Jean 18.15-18, 25-27)

66Pierre aki va dulombili ava mugetu agumaba musalitsi uyivunda yibavagulitsi bapagu amavioyila. 67Anolaba Pierre agumagoranga muji amamugengila yisuisu novosa rie: Ndeʼ wagu gubetsi na Jesus muisi Nazareth, mbe?

68Tumba amagala rie: Ngemujabi! Ngegulu adi guivosi. Mbana amayenalinganga va piasu. Koku yika uvosa evosi. 69Musalitsi eni anomulabilila amavosa na jogu abamaba vana rie: Jandi guna aji mutu ogu.

70Tumba Pierre amamuedigala. Mua pesu temu abamaba vana bamamuevosa na Pierre rie: Guyagala, guji mutu ogu mu mbari guji muisi Galilee.

71Mbana Pierre amaleva rie: Nsambi ejabi! Ngemujabi! 72Vana vanakoku jimavosa temu ajimubeji. Pierre amarangimina adi Jesus amamutsingula rie: Nesi koku akavosa temu beji gukala kumbu yirieru. Anodirangimina amalilanga.

Currently Selected:

Marc 14: PUU1992

Highlight

Copy