Marc 13

Jesus ubiga ebiyi nana Ndagu Nsambi jiupansiyila

(Matt 24.1-2; Luc 21.5-6)

1Ava Jesus na badukitsi bandi bamapalila o yibenguna, mudukitsi umosi anogengila Ndagu Nsambi amasimina rie: Mulonsi, gengilati! Ka muna mamanyi ma! Ka muna tungitsi ji!

2Jesus amawaka rie: Nyiina, guilabi Ndagu, tumba jaba o gusu vagosiala ne dimanyi adigopansu; Ndagu jiotsu jiurakuga.

Maguga amolabana va disukusulu dibulongu

(Matt 24.3-14; Luc 21.7-19)

3Jesus amatsana va julu mukongu umiOlive va nsungisini na Ndagu Nsambi. Pierre na Jean na Andre bamamurasuna guna, banolabilila Ndagu Nsambi bamamuwivula rie: 4Tutsinguli temu yi mambu meni mobila? Yilimba yi yiulasa yiri mambu meni molabana?

5Mbana Jesus amabalubusa rie: Kebananu yiri mutu agodudunsa. 6Bapuela boruga na diina diami novosa rie: Nyiji Christ! Bodunsa batu bapuela. 7Duyalaba keri ava dugululu makumbula madivita amavu yiari na yiari; vengu mambu meni moleba. Tumba disukusulu dibulongu digoba mu temu eni. 8Bisi dilongu dimosi botoga na bisi dilongu disusu na bakaga botoga na bakaga basusu; voba masisana mabutamba mu biari biotsu na voba dungosu dunsala. Dionyi diuba yika dibandu dimaguga.

9Tumba jenu lubuganu; bodufimdisa na bodudimba o Mandagu maBibenguna; bodubega va gusu bakaga na va gusu bivunda bimalongu mu diambu diami; mu temu eni dubasamunina Musamu Uboti. 10Musamu Uboti ulesamunu ombu batu botsu. 11Ava bodufundisila duyaletasa adi duwagula, muna diweru dieni vosanu adi dudila. Mambu meni magoba amenu, moruyila ombu Yinyunyi yiNsambi. 12Muana nguji owakisa nesi muana nguji andi ombu bango dikasi yiri oboku na taji ovaga munongu mosi na muana andi; baana bovina bataji na banguji bogu na bobawakisa ombu bango dikasi yiri boboku. 13Botsu boduvina mu diambu didiina diami. Tumba oyiwari ogobulu.

Dubungu adulabana

(Matt 24.15-28; Luc 21.20-24)

14Dulaba dubungu va mbura ajigaa jiwelimina. (Jandi oyirangi atsiyisi!) Jogu aboba o Judee barini o mikongu. 15Jandi oguba va julu muansa ayaviosa temu umuekota o ndagu andi ubonga abiandi. 16Jandi oguba o musiru ayagabuga uyebonga yijungi yiai di. 17Ka muna maguga ma bagetu aboba na mimi na abonuisanga mabenyi bolaba mu bilumbu bieni! 18Sambilanu yiri mambu meni magodurasuna ava yitsubi! 19Mu temu eni maguga moba maneni. Ubongila va diweru adi Nsambi amasundila biotsu te na namunyi maguga mamunongu eni mbe masakalabana; o gusu vagoba masusu mamunongu eni, via! 20Mbe Fumu asamatabula diambu ugufisa bilumbu bieni mbe mutu ne umosi agogobulu; tumba amabigufisa mu diambu dijogu aba amasola.

21Pa mutu odutsingula rie: Christ aji vava vo aji vana, duyamuvayila yitu. 22Mu mbari voba bachrist bamfurulu na babiyitsi bamfurulu; bovaga bilimba na bimaga uweliga udunsa aba Nsambi amasola. 23Kabogu lubuganu, nyimadutubulila motsu.

Durugu duMuana Mutu

(Matt 24.29-31; Luc 21.25-28)

24Yiotsu ayi maguga meni movioga, wisi upindusu, tsungi jigomuebatsa muetsa, 25bambuelili bobonduga na julu jiotsu jiukungusu. 26Mbana Muana Mutu oruga va gari mamungi; bomulaba na mangolu maneni na bundumba. 27Mbana osindiga biansa o biari biotsu bibina bibutamba ugukiga aba Nsambi amasola te no masuka mabulongu.

Divindugulu dinongu jimumanga

(Matt 24.32-35; Luc 21.29-33)

28Rangiminanu yibagunu yimumanga; pa bitayi biwansi duijabi yiri mfula yika utuba. 29Munongu mosi ava duilabili mambu meni, jabanu yiri durugu duMuana Mutu duka bebeli. 30Ngensa nyidutsinguli rie: Dukula duedudu dugolefu te na mambu meni molabana. 31Julu na butamba biutsiemuga tumba mambu mami magotsiemuga, via!

Yika Nsambi ejabi diweru

(Matt 24.36-44)

32Mutu agojaba yilumbu yieni vo diweru; ne biansa ne Muana yika Taji buandi edijabi. 33Lubuganu, duyawenda bilu mu mbari dugejabi diweru dieni. 34Diuba nana dibaala adimalinga; amasila ndagu andi na basalitsi bandi na amavega mutu mutu yisalu yiandi. Amaruma mukelisi umunu ndagu rie: Guyawenda yilu. 35Kabogu jenu wenu moganu mu mbari dugejabi temu aji fumu ndagu oruyila, tanguji va tsisiga vo va gari wisi vo va mavuvungi vo kedi. 36Pa odusutusu ayadurasuna bilu. 37Adi nyidutsinguli, nyiditsinguli ombu botsu rie: Moganu, duyawenda bilu.

Currently Selected:

Marc 13: PUU1992

Highlight

Copy