Marc 12

Nongu jifumu nungi na basalitsi bandi

(Matt 21.33-46; Luc 20.9-19)

1Mbana Jesus amamuebabuayila nongu. Jandi rie: Dibaala amavara nungi. Amajitsiengisa yivaga; amakunsa yigamunu na amarunga mua yikumbulu yimfula. Amajisila ombu basalitsi na amawenda o ulinga. 2Mu temu dutsonsugu amasindiga musalitsi ombu basalitsi beni uyebonga dikabu diandi. 3Bamamugaanga nomudimba na bamamugabusa miogu na miogu. 4Amamuesindiga musalitsi ususu; bamamudimba nomunemisa muru na bamamusienga. 5Fumu nungi amamuesindiga musalitsi ususu na bamamuboka; va julu vana bamalasa basalitsi bapuela maguga: bamosi bamadimbu na basusu bamaboku. 6Vamasiala yika muana andi udurondu. Kabogu amamusindiga ombu basalitsi beni. Amavosa rie: Boyitsa muana ami. 7Tumba basalitsi beni bamavosa joʼ beni na joʼ beni rie: Labanu mubongitsi disiala! Ruganu tumubokianu yiri disiala diuba adietu. 8Kabogu bamagaanga muana na bamamuboka mbana bamasila mfumbi o pari.

9Mbana Jesus amawivula rie: Fumu nungi yi ovaga? Adidi rie: Oruga na oboka basalitsi beni novega nungi ombu basusu. 10Dusakaranga Bisonu abisonugu rie:

Dimanyi adimabuagu na barungitsi divu tindi adiviolila ubueji

11Adudu la duganu duFumu

na duitulasi ubueji.

12Bivunda bibaJuif bamaronda ugaanga Jesus mu mbari nongu andi jimabatsokila tumba basamamuedivaga mu mbari bamadumanga batu.

Bivu mu diambu dilepu

(Matt 22.15-22; Luc 20.20-26)

13BaJuif bamosi abamaba baPharisie na bambatsi baHerode bamawenda ombu Jesus uyemulega na posulu tsiandi. 14Bamavosa nandi rie: Fumu tuijabi yiri ama guivosi na ama guilonsi mavu mangensa. Tuijabi yiri gugegengili buneni bumutu nana mutu mutu eketasila. Tumba guilonsi duganu aduvu na Nsambi ombu mutu uotsu. Letutsingulati, divu diwelimina yiri jetu tufuta dumandu ombu kaga?

15Jesus anojaba yiri diela besoyi amawaka rie: Mu mbari yi duimbangili? Ndasianu dubongu dumosi.

16Bamabega dumosi na Jesus amabawivula rie: Yigolini yinyi na bisonu binyi bivu muna? Bamamuwaka rie: Kaga.

17Mbana amabatsingula rie: Kabogu veganu abi kaga ombu kaga na abi Nsambi ombu Nsambi.

Kabusulu tsiandi tsimabakambisa.

Bivu mu diambu didurambugu duabafu

(Matt 22.23-33; Luc 20.27-40)

18BaJuif bamosi abamaba baSadducee bamawenda ombu Jesus. (Jogu abevosi yiri abamafu bagorambuga.) Bamavosa nandi rie: 19Mulonsi, Moise amatusila diruma diedidi rie: Pa mutu amafu nosila mugatsi agusakabura baana, muana nguji andi amuweli yiri baburili mutu agumafu baana. 20Vamaba yisambuali yibaana banguji. Agutega amawela mukuili eni na amafu tsiri ubura baana. 21Agumubeji amabialila mukuili, aguna anofu agumurieru amamubialila. 22Dimaba munongu mosi te na yisambuali yiotsu bamafu tsiri ubura baana. Mbana mugetu wandi amafu. 23Kabogu ava durambugu duabafu mugatsi nyi oba? Jandi asamaba mugatsi uyisambuali yiotsu?

24Jesus amabagabusila rie: Duna mbela mu mbari dugetsiyisi Bisonu na dusakajaba mangolu maNsambi. 25Mu mbari ava durambugu duabafu babaala bagomuewela bagatsi na bagetu bagomueba na balumi tumba boba nana biansa. 26Mu diambu didurambugu duabafu jenu mbe dusakaranga mu dibuku diMoise ava amabila o yivala? Nsambi amavosa na Moise rie: Menu la Nsambi Abraham na Nsambi Isaac na Nsambi Jacob. 27Jesus amabuesa rie: Nsambi agaa Nsambi jibatu abafu tumba jibatu abavu monyu. Jenu dumatsimbu puela!

Diruma adiviolili motsu

(Matt 22.34-40; Luc 10.25-28)

28Mulonsi umigaga umosi amagulu ava betsundili. Anogulu yiri Jesus amawagula baSadducee buranga amamuwivula rie: Va gari maruma motsu diruma yi diviolili motsu?

29Jesus amamugabusila rie: Diruma adiviolili motsu adidi rie: Guluanu Israel! Fumu Nsambi etu avu Fumu mosi buandi. 30Ronda Fumu Nsambi agu na murima agu uotsu na matasa magu motsu na mangolu magu motsu. 31Adimubeji adidi rie: Ronda mutu nagu iiana guikerondila. Vagaa diruma disusu adiviolili mana mabeji. 32Mulonsi eni amavosa na Jesus rie: Nyiina, anana Mulonsi! Ngensa gutsivosa rie: Fumu Nsambi avu umosi buandi na vagaa Nsambi jisusu, yika jandi. 33Kabogu mutu arondi Nsambi na murima andi uotsu na matasa mandi motsu na mangolu mandi motsu na arondi mutu nandi nana ekerondila. Uviolila ubueji udedila maruma memama mabeji tsiri ubeganga bibulu biunyensa pagu ombu Nsambi nesi umuvagulilanga pagu tsiotsu tsisusu. 34Jesus anogulu yiri mutu eni amawagula na diela amamutsingula rie: Gugaa vala ujaba Durumu duNsambi.

Banogulu dionyi bamagaangu leli.

Christ na David

(Matt 22.41-46; Luc 20.41-44)

35Ava Jesus amalonsila o Ndagu Nsambi amawivula rie: Dibandu yi milonsi mimigaga belonsili rie: Christ aji Muana David. 36Jaʼ beni David ava amagaangulu na mangolu maYinyunyi ayiruyili ombu Nsambi amavosa rie:

Fumu amavosa na Fumu ami rie:

Ndeʼ tsana va mabaala mami

te na nyusunsa batu abeguvini o tsi durumu duagu.

37Jaʼ beni David emunengili Fumu kabogu tsie abila muana andi?

Malubu maJesus mu diambu dimilonsi mimigaga

(Matt 23.1-36; Luc 20.45-47)

Batu bapuela bamagulungu Jesus na nsangu. 38Ava Jesus amabalonsila amavosa rie: Lubuganu mu diambu dimilonsi mimigaga abelingi na bilinga bisakama uyenavegu mambolu mu migungi. 39Berondi bitsiga bibatu baneni o Mandagu maBibenguna, nesi o milambu. 40Ne bediongi bakuili adina digebakambisi usambila tsambu tsiogu tsisakama. Ka muna mukilu gu bokilusu!

Muensili umukuili

(Luc 21.1-4)

41Mbana Jesus amatsana va gusu yisuegulu yimbongu na amagengila nana batu bamapodulila mbongu. Bisina bipuela bimapodula mbongu tsipuela. 42Vamaruga yijaga yimukuili wandi, amapodula mikuti mibeji muna. 43Mbana Jesus amanengila badukitsi bandi na amabatsingula rie: Ngensa nyidutsinguli rie: Yijaga yieni yimukuili atsipodula uviolila botsu basusu. 44Botsu bana batsivega atsitsisialulu banomana nsala tsiogu tumba jandi atsivega tsiotsu atsibetsi nandi.

Currently Selected:

Marc 12: PUU1992

Highlight

Copy