Marc 11
11
Jesus ukota ekoti o Jerusalem
(Matt 21.1-11; Luc 19.28-40; Jean 12.12-19)
1Banobambana o Jerusalem mbe basakatola o Bethpage na Bethanie bamatola o yiari yimukongu umiOlive. Jesus amaruma badukitsi babeji rie: 2Wendanu o dimbu adivu o gusu. Aguna durasuna muana buru utungu agu mutu asakatsanina na kala. Munyangulianu na mubeyianu. 3Pa mutu oduwivula rie: Yi duivayi? Mugabusilianu rie: Fumu ana nsala uonyi, omugabusa namapapa.
4Kabogu bamawenda na va mugula nsila bamarasuna muana buru utungu bebeli na munu ndagu, bamamunyangula. 5Batu bamosi abamaba vana bamabawivula rie: Yi duivayi? Dibandu yi duimunyangulili?
6Bamabawaka nana Jesus amavosila. Kabogu bamabasingisa uwenda. 7Banobega muana buru ombu Jesus bamasakiga buru biduaru biogu mbana Jesus amanangama. 8Batu bapuela bamayenawalanga biduaru biogu na metu muna nsila. 9Batu abamawenda va gusu Jesus na abamamuduka bamayenagamuganga rie: Diboti ombu Nsambi! 10Miula mibi mu durumu aduiruyi, durumu dutaji etu David! Diboti ombuNsambi!
11Jesus amakota o Jerusalem na amawenda o Ndagu Nsambi. Tumba anolaba yiri wisi umaketsimina amawenda o Bethanie na digumi na badukitsi bandi babeji.
Jesus uloga eloyi mumanga
(Matt 21.18-19)
12Vana kedi ava bamaruyila o Bethanie Jesus amagulu nsala. 13Amalabilila mumanga agumaba na magaji maboti, amawenda uyelaba yiri tanguji orasuna mimanga muna. Anotsuna amalaba yika magaji na magaji mu mbari temu mimanga mbe jimavioga. 14Mbana amavosa na mumanga rie: Mutu agomueji mimanga miagu, via!
Badukitsi bandi bamadigulu.
Jesus ukota ekoti o Ndagu Nsambi
(Matt 21.12-17; Luc 19.45-48; Jean 2.13-22)
15Banotola o Jerusalem Jesus amakota o Ndagu Nsambi na amasansa jogu abamasumbisanga na abamasumbanga bima biogu muna. Amagudiga batavula babasansitsi bambongu na bivika bibasumbisitsi bamabembi 16na asamagaru yiri mutu okota na mufuna o gari Ndagu Nsambi. 17Mbana amalonsa batu rie: Bisonu bimasonugu rie: Ndagu ami jiunengulungu Ndagu jiDusambu. Tumba jenu dumajivaga yisuemunu yibadayitsi.
18Bivunda bibavagulitsi bapagu na milonsi mimigaga banodigulu bamaromba uboka Jesus. Bamalaba keri udivaga mu mbari batu botsu bamaba liyiyi ugulu malongi mandi.
19Wisi unotsima Jesus na badukitsi bandi bamagusuga vana musiengi.
Divindugulu dimulogu umumanga
(Matt 21.20-22)
20Va kedi ava bamavioyila badukitsi bamalaba mumanga umagumuga te no ngansi. 21Pierre anorangimina adimavagu amavosa na Jesus rie: Mulonsi, gengilati mumanga agu gutsiloga, umafu. 22Jesus amavosa nogu rie: Dingensa nyidutsinguli rie: Pa duvayila Nsambi yitu 23durungula uvosa na mukongu egugu rie: Gusuga vana na kebuaga o mubu. Pa dugotumuna paga, diwendi rie: pa duivayi yitu yiri adi dutsivosa diuvagu dudilaba. 24La dibandu nyidutsinguli rie: Ava duisambilili novonda yima, vaganu yitu yiri dumayidila na yionyi yiuduvegu. 25Ava duisambilili pa duna diambu na mutu nenu mutandianu yiri Taji enu ajivu o julu odutanda masumu menu wandi. [ 26Tumba pa dugetandi basusu, Taji enu ajivu o julu agodutanda masumu menu.]
Musuga uJesus agunyi uiruyisini?
(Matt 21.23-27; Luc 20.1-8)
27Bamamuegabuga o Jerusalem. Ava Jesus amalingila o Ndagu Nsambi bivunda bamaruga ombu gandi. 28Bamamuwivula rie: Agunyi guidilili musuga uvaga mambu memama? Anyi amaguvega musuga egugu?
29Jesus amabagabusila rie: Menu wami nyunduwivula yivu pa dukwagula nyundutsingula agunyi musuga ami uiruyili. 30Nsingulianu, anyi amasindiga Jean ubatisa? Nsambi vo batu?
31Tumba bamavosa joʼ beni na joʼ beni rie: Pa tuwagula rie: Nsambi amamusindiga owivula rie: Dibandu yi dusamamuvayila yitu? 32Pa tuwagula rie: Batu ba mamusindiga… (Jogu bamaduma batu mu mbari botsu bamatasa Jean amaba tindi mubiyitsi.)
33Kabogu bamawagula Jesus rie: Tugejabi.
Jesus amabawaka rie: Kabogu menu wami ngodutsingula agunyi nyidilili musuga uvaga mambu memama.
Currently Selected:
Marc 11: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
