Marc 10
10
Malongi maJesus mu diambu diuboka diwela
(Matt 19.1-12; Luc 16.18)
1Jesus amagusuga vana na amawenda o yiari yiJudee na amasabuga mujamba uJourdain. Batu bapuela bapuela bamamueruga ombu gandi na amabalonsa nana amabalonsila kala.
2BaJuif bamosi abamaba baPharisie bamaruga ombu gandi umuweliga. Bamamuwivula rie: Mugaga etu uiveyi dibaala musuga ugusula mugatsi andi?
3Jesus amabawagula na yivu yiandi rie: Diruma yi Moise amaduvega?
4Bamamuwaka rie: Moise amavega dibaala musuga usona muganda uboka diwela nogusula mugatsi andi.
5Jesus amavosa nogu rie: Moise amaduvega diruma dieni mu mbari dumaba na miuru mibi. 6Va dibandu ava Nsambi amasundila biotsu, dimasonugu rie: Nsambi amabasunda dibaala na mugetu. 7La dibandu dibaala osila taji andi na nguji notsana va mosi na mugatsi andi 8na jogu babeji boba umosi. Mu dionyi besaa babeji tumba baji umosi. 9Kabogu dibaala ayakakasana aba Nsambi amafubana.
10Ava bamakotila o ndagu badukitsi bamamuewivula Jesus bivu mu diambu dieni. 11Amabatsingula rie: Jandi oyigusuli mugatsi andi nowelana na ususu evayi bumbembu; 12munongu mosi pa mugetu egusuyi ombu mulumi andi nowelana na dibaala disusu evayi bumbembu.
Jesus usakiga esakiyi baana bageyi miogu
(Matt 19.13-15; Luc 18.15-17)
13Batu bamosi bamabega baana ombu Jesus yiri obabemba. Tumba badukitsi bamabasiemba. 14Jesus anodigulu amanyoga na amavosa na badukitsi rie: Baana baruyi ombu gami! Duyabagandisa mu mbari ombu munongu egugu Durumu duNsambi dumajabunu. 15Jabanu yiri uotsu agugosinga Durumu duNsambi nana muana ugeyi edusingili agaa muna.
16Mbana amabasunsa va tulu; amasakiga muana muana miogu ava amabaveyila miula.
Yisina
(Matt 19.16-30; Luc 18.18-30)
17Jesus yika usogama esoyimi ava dibaala amaruyila mbangu na amakutama va gusu andi. Amamuwivula rie: Mulonsi uboti, yi nyuvaga udila monyu umutubu?
18Jesus amamugabusila rie: Mu mbari yi guindengili muboti? Vagaa muboti yika Nsambi buandi. 19Guijabi maruma memama: guyaboka; guyavaga bumbembu; guyadaga; guyafura; guyadionga batu; yitsa taji agu na nguji.
20Dibaala amamugabusila rie: Mulonsi, ubongila va bungebi buami nyimakelisa maruma memama motsu.
21Jesus amamugengila yisuisu, amamuronda puela; amavosa nandi rie: Vaki diambu dimosi! Weʼ yesumbisa biotsu abivu nagu novega badoli ombu bijaga mbana guba na busina o julu; mbana ruga, nduki!
22Tumba dibaala dieni anogulu nana amatunga dusisi na amayenawenda na munyongu mu mbari amaba yisina yineni.
23Jesus amageluga na amatsingula badukitsi bandi rie: Divu divura ombu yisina ujaba Durumu duNsambi!
24Badukitsi bandi bamakambulu mu adi amavosa tumba ne nana Jesus amabuela rie: Baana bami, divu divura ombu yisina ujaba Durumu duNsambi. 25Nyiina, divu divura yiri tsungu ovioga va digola ditsongi tumba divu diviolila uvura yiri yisina ojaba Durumu duNsambi.
26Badukitsi bamakambulu viri na bamawivusana rie: Kabogu anyi orungula ugobulu?
27Jesus amabagengila yisuisu na amavosa rie: Adivu divura ombu batu digaa divura ombu Nsambi mu mbaii motsu morungulu ombu gandi.
28Pierre amavosa nandi rie: Jetu tumabusa biotsu na tumaguduka. 29Jesus amagabusila rie: Ngensa nyidutsinguli rie: Ojivu na murima ubusa ndagu andi nesi baana banguji bandi nesi nguji andi nesi taji andi nesi baana bandi nesi manungi mandi mu diambu diami na diMusamu Uboti okelusu ne uviolila; 30va temu ejiji odila kama kama mu biotsu: nesi mandagu nesi baana babanguji nesi baana nesi manungi diuleba okuanu tumba o gusu odila monyu umutubu. 31Bapuela abavu baneni namunyi boba bageyi na bapuela abavu bageyi namunyi boba baneni.
Kumbu jimurieru Jesus ubuesa ebuesi ulonsa diambu didufu na durambugu duandi
(Matt 20.17-19; Luc 18.31-34)
32Bamasogama uwenda o Jerusalem. Jesus amaba o gusu na badukitsi na botsu abamamudukanga bamakambulu na basusu bamalaba goma. Jesus amamuebega digumi na babeji o fundu na amabatsinguta amolabana ombu gandi. 33Amavosa rie: O Jerusalem tuiweʼ na Muana Mutu ovegu ombu bivunda bibavagulitsi bapagu na milonsi mimigaga. Bomuvega mbela dufu mbana bomuvega ombu abageduki Nsambi. 34Bomudesa, bomufuta mateji, bomudimba mikasana bomuboka; mu yilumbu yimurieru orambuga o dufu.
Jacques na Jean bewivuli Jesus diambu
(Matt 20.20-28)
35Mbana Jacques na Jean, baana baZebedee bamawenda ombu Jesus. Bamavosa rie: Mulonsi, tuirondi yiri gutuvayila mua diambu. 36Amabawivula rie: Yi duirondi yiri nyuduvayila?
37Bamamutsingula rie: Ava Durumu duagu dujabununu tusingisi yiri tuba tutsana umosi va mabaala magu na ususu va magetu magu.
38Jesus amabagabusila rie: Dugejabi adi duiwivuli. Durungula unu kopa aji vengu nyunu? Durungula ubatusu batema aji nyubatusulu? Diwendi rie: Durungula uwarila maguga ama nyuwarila?
39Bamawaka rie: Turungula.
Jesus amavosa nogu rie: Divu dingensa yiri dunu kopa aji nyunu na dubatusu na batema aji nyubatusu. 40Tumba menu ngaa na musuga utsanisa mutu va mabaala vo va magetu mami. Nsambi ovega bitsiga bieni ombu aba amakunsila bionyi.
41Badukitsi basusu banodigulu bamanyoyila Jacques na Jean. 42Kabogu Jesus amamuebanengila na amabalonsa rie: Duijabi yiri barumitsi bana musuga uruma malongu na bedivayi na dikasi nesi ombu mindumba. 43Diyaba nana ombu genu tumba uotsu oyirondi uba muneni abi musalitsi 44na uotsu oyirondi uba yivunda abi muviga batu botsu. 45Mu mbari ne Muana Mutu asamaruga uyisalulu tumba usalila novega monyu andi pagu yiri batu bapuela boliomusu.
Jesus ubelusa ebelusi Bartimee agumaba yidunga
(Matt 20.29-34; Luc 18.35-43)
46Bamatola o Jericho. Ava bamagusuyila Jesus na badukitsi bandi na yinombu yieni bamarasuna yidunga diina diandi Bartimee agumaba muana dibaala uTimee; amaba atsana va mugula nsila uyevonda. 47Anogulu yiri oyivioyi la Jesus muisi Nazareth amabanda ugamuga rie: Jesus, Muana David, ndasi yingeba!
48Bapuela bamamusiemba na bamavosa nandi rie: Vola sui! Tumba amabuela ugamuga na mangolu rie: Muana David, ndasi yingeba!
49Kabogu Jesus anosikama amavosa rie: Munengilianu.
Kabogu bamanengila yidunga. Bamavosa nandi rie: Sunsa murima, tʼwendi, egunengili.
50Kabogu amabuaga yijungi yiandi; amarelama na amadumuga; amawenda nogu ombu Jesus. 51Jesus amamuwivula rie: Yi guirondi yiri nyuguvayila? Yidunga amamugabusila rie: Mulonsi, nyirondi umuelaba nana va kala.
52Jesus amamutsingula rie: Wendanga, yitu yiagu yimagutiemusa.
Vana vana amalaba na amafubana nsila nogu.
Currently Selected:
Marc 10: PUU1992
Highlight
Share
Copy
Want to have your highlights saved across all your devices? Sign up or sign in
La sainte Bible en langue Yipunu © Alliance Biblique du Cameroun, 1992.
