Luc 2

Duburu duJesus

(Matt 1.18-25)

1Mbana kaga Auguste amaruma yiri botsu abamatsana mu bufumu buandi basansumu. 2Sansama jitega jimaba mu temu Qurinius amabila yivunda yibulongu buSyrie. 3Botsu bamawenda uyesonu, mutu mutu amasonu mu musiengi andi.

4Joseph wandi amarambuyila o Nazareth musiengi uGalilee, uwenda o Judee o Bethleem musiengi uDavid mu mbari amaba mu yifumba na mu mukuta uDavid. 5Amayesonugu na mugatsi andi Marie omaba na dimi. 6Ava bamabila vana, diweru diMarie dimatola 7na amabura tsomi andi dibaala. Amamupieta va tsanda na amamusiliga mu yidu ayi bibulu bejangingi; diwendi rie: basamadila mbura o ndagu benyi.

Babungulitsi babindombu na biansa

8O yiari yieni umaba babungulitsi babindombu abamayelungu mu musiru ukelisa migamba miogu. 9Sundila yiansa yiFumu yimalabana nogu na bundumba buFumu bumalabana nana yijalala ayimabalulila yiari na yiari. Bamaregama na goma. 10Tumba yiansa yimabatsingula rie: Duyalaba goma! Nyina musamu uboti agulasa batu botsu ubueji. 11Mukolu egugu o musiengi uDavid, dumaburulu Mugobutsi aguvu Christ, jandi la Fumu. 12Guluanu yilimba ayi dumujabila; durasuna muana upietu va tsanda na usilugu mu yidu ayi bibulu bejangingi.

13Sundila yinombu yineni yibiansa yimarasuna yiansa, yimayitsa Nsambi novosa rie:

14Bundumba ombu Nsambi aguvu o julu

na duvotsu ombu bisi tsi abemulasi ubueji.

Babungulitsi babindombu uwenda bewendi o Bethleem

15Ava biansa bimabasilila ugabuga o julu babungulitsi babindombu bamavosa joʼ beni na joʼ beni rie: Tʼwendianu o Bethleem, tuyelabanu adimalabana guna adi Fumu amatujabisa. 16Kabogu bamawenda mbangu mbangu na bamarasuna Marie na Joseph na muana kali usilugu mu yidu ayi bibulu bejangingi. 17Banomulaba, bamavosa adi yiansa yimabatsingula mu diambu dimuana. 18Botsu bamakambulu ava bamagululu misamu mibabungulitsi babindombu. 19Marie amarangiminanga mambu meni motsu na amamatasanga. 20Babungulitsi babindombu bamayenagabuga. Bamayenadodisanga Nsambi mu mbari ama bamagulu nolaba mamaba nana bamatsingululu.

Bamaluga Jesus

21Yilumbu yimunana ayi muana amarebulu bamamuluga Jesus, diina adi yiansa yimabatsingula ne Marie akasama.

Jesus amawakusu ombu Fumu

22Bilumbu biduliomusu binovioga nana dimarumunu mu mugaga uMoise, Joseph na Marie bamabega muana o Jerusalem umuwakisa ombu Fumu. 23Agumasonu agugu rie: Tsomi tsiotsu tsibabaala tsiuwakusu ombu Fumu. 24Va julu vana bamaronda udugusu mugaga agumasonu rie: Vagula pagu tsimakunda mabeji vo baana babeji bamabembi.

25O Jerusalem umaba mutu diina diandi Simeon, amaba usungama na uwelimina va gusu Nsambi na amavivanga dugobutsu duIsrael. Yinyunyi yiNsambi yimaba nandi. 26Amamutsingula rie: Gugolefu te na gulaba Christ agu Fumu osindiga. 27Kabogu anosindugu na Yinyunyi yieni amawenda o Ndagu Nsambi vana diweru dieni adi taji na nguji bamaruga na Jesus uyemureba udugusu mugaga. 28Simeon amabonga Jesus va tulu na amayitsa Nsambi novosa rie:

29Fumu namunyi gurungula unsingisa uwenda na murima usunda.

30Adi gumavangana dimalabana.

Namunyi nyimalaba aguba Mugobutsi,

31agu gumakunsila batu botsu:

32aguvu yijalala ayiumonitsa batu botsu nsila

novega bundumba ombu batu bagu baIsrael.

Mbigulu jiSimeon

33Taji andi na nguji bamakambulu puela ugulu ama Simeon amavosa mu diambu dimuana. 34Simeon amabagabila miula na amalubusa Marie rie: Muana egugu amasolu na Nsambi yiri osundusa batu baIsrael bapuela nomatisa basusu. 35Va julu vana jandi oba mulubusitsi agu batu bapuela bogelanga nolasanga ubiva umirima miogu. Na ndeʼ beni mugetu gulaba tindi munyongu mu diambu diandi.

Mubiyitsi umugetu

36Vamaba mubiyitsi umugetu diina diandi Anne, muana uPhanuel jimukuta uAsser. Amaba yinunu; amatsana yisambuali yibilima na mulumi agumamuwela va bungebi buandi 37mbana amatsana magumidunana mabilima yika mukuili. Asamamuepala o Ndagu Nsambi; nyangu na mukolu amayitsanga Nsambi na va julu vana amabusanga uji temu na temu ukevega usambilanga. 38Anobarasuna vana amasundila ugabusila Nsambi diboti na amavosa mambu mandi ombu botsu abamavivanga dugobutsu duJerusalem.

Bamagabuga o Nazareth

39Joseph na Marie banodugusu migaga miotsu miFumu bamayenagabuga o musiengi ogu o Nazareth o Galilee. 40Muana amabanguga na amawara, amaba na diela na miula miNsambi mimabanganga nandi.

Jesus ava amabila digumi na bilima bibeji amasiala o Ndagu Nsambi

41Yilima na yilima taji na nguji Jesus bamawendanga o Jerusalem ukelisa feta Paque. 42Yilima ayi Jesus amaba digumi na bilima bibeji, bamawenda o Jerusalem munongu mosi nana va kala. 43Bilumbu bifeta binosuka, bamayenagabusila tumba Jesus amasiala o Jerusalem. Taji andi na nguji basamadijaba. 44Bamatasa yiri Jesus amaba nogu mu yinombu kabogu wisi unotsima bamabanda umuromba va gari biburu biogu ne va gari bambatsi bogu. 45Tumba basamamulaba kabogu bamagabusila o Jerusalem umuromba. 46Bilumbu birieru binovioga bamamurasuna o Ndagu Nsambi, amaba atsana va gari milonsi amimaba baJuif. Amaba liyiyi ugulu malongi mogu nobawivula bivu. 47Botsu abamamugulu bamakambulu na diela diandi na kabusulu tsiandi. 48Ava taji andi na nguji andi bamamulabila bamakambulu puela na nguji andi amamuwivula rie: Muana ami, dibandu yi gutsituvayila nana? Labati, jetu na taji agu tuigurombi na keri. 49Amabawaka rie: Dibandu yi duitombili? Dugejabi yiri vengu nyusala bisalu biTaji ami? 50Tumba basamatsiyisa divindugulu didiambu dieni.

51Amagabuga nogu o Nazareth na amabadedilanga. Nguji andi amarangiminanga mambu meni motsu na amamatasanga. 52Jesus amanega na diela diandi dimafunanga; amaba uwelimina va gusu Nsambi na va gusu batu.

Currently Selected:

Luc 2: PUU1992

Highlight

Copy