Luc 3

Malongi maJean Baptiste

(Matt 3.1-12; Marc 1.1-8; Jean 1.19-28)

1Muna yilima yidigumi nabiranu bidurumu dukaga Tibere, Ponce Pilate amaba yivunda yibulongu buJudee na Herode amaruma o Galilee na muana nguji andi Philippe amaruma o Ituree na mu bulongu bubaTrachonie na Lysanias amaruma o Abilene; 2Anne na Caiphe bamaba bivunda bibavagulitsi bapagu. Va temu eni Mbembu Nsambi jimatsingulu ombu Jean muana uZacharie agumaba o kumu. 3Jean amalinganga mu mbanda tsi jiotsu jiJourdain uyenalubusanga batu rie: Kalulanu diela na batusuanu; Nsambi odutandila masumu menu.

4Nesi mubiyitsi Esaie amadivosa rie:

Adidi la diufi dimutu

oyigamuyi o kumu rie:

Solanu nsila Fumu

futsanu mansila mandi.

5Bibususu biotsu biubasu

mikongu miotsu miusiepulu

na bikundubuga biudiamusu;

amavu marekama mosungama

na mansila amavu biduna mofutsu.

6Batu botsu bolaba nana Nsambi otugobulila.

7Bapuela bapuela bamawendanga ombu Jean uyebatusu. Amabanyangila rie: Bijolu bijenu, anyi amadulubusa urina kabu Nsambi? 8Salanu bisalu biwelimina abiulasa yiri dumakalula diela! Duyakematisa novosa rie: Tuji baana baAbraham! Ngensa nyidutsinguli rie: Ne na mamanyi memama Nsambi orungula ukitusila Abraham baana! 9Diumbi dimakesingulu va ngansi tsimuiri; kabogu muiri uotsu agugeburi milunda miboti uwangu nobuagu o muji.

10Botsu bamamuwivula rie: Kabogu yika tsie tuvayila?

11Jandi amabagabusila rie: Jandi ona bikutu bibeji aveyi yimosi ombu agugaa na yikutu na ojivu na biguji agabi na basusu.

12Babongitsi balepu wandi bamawenda uyebatusu na bamawivula Jean rie: Mulonsi, tsie tuvayila?

13Amabagabusila rie: Ava dubongila lepu duyaviosulila adimaduvegu musuga.

14Bagora wandi bamamuwivula rie: Jetu tsie tuvayila?

Amabagabusila rie: Duyamuepatula batu mbongu nesi na mangolu nesi na mapemi tumba labanu ubueji na futa aji duidili.

15Batu botsu bamaba nsunsaba: mutu mutu amatasa tanguji Jean la Christ. 16Kabogu Jean amabatsingula rie: Menu nyidubatisi na mamba tumba oyiruyi epiolili mangolu na nyisaawelimina ne unyangula mikudu mibapondu bandi. Odubatisa na Yinyunyi yiNsambi na muji. 17Aji ukunsama na yisagulu yiandi usayila uresi. Osuega uresi o yisuegulu yiandi tumba onyensa bipupu o muji agugetsimi.

18Jean amalubusa batu na mambu memama na masusu mapuela na amabasamunina Musamu Uboti. 19Na amasiemba Herode yivunda yibulongu wandi; diwendi rie: Herode amabonga Herodiade mugatsi umuana taji andi mujeba na amavaganga puela mabi masusu. 20Va julu motsu mana amabuesa disusu: amakotisa Jean o tsugu.

Batema jiJesus

(Matt 3.13-17; Marc 1.9-11)

21Batu botsu banobatusu Jesus wandi amabatusu. Ava amasambilila julu jimadibuga 22na Yinyunyi yiNsambi amasuduga mu yibagunu yidibembi na dimamubetama; diufi dimagulunu o julu rie: Guji muana ami udurondu, nyilabi nsangu jineni nagu.

Bukulu buJesus

(Matt 1.1-17)

23Ava Jesus amabandila yisalu yiandi amaba na magumarieru mabilima. 24Batu bamamulaba nana muana uJoseph muana uHeli muana uMatthat muana uLevi muana uMelchi muana uJannai muana uJoseph, 25muana uMatthatias muana uAmos muana uNahum muana uEsli muana uNaggai, 26muana uMaath muana uMatthatias muana uSemein muana uJosech muana uJoda 27muana uJoanan muana uRhesa muana uZorobabel muana uSalathiel muana uNeri, 28muana uMelchi muana uAddi muana uKosam muana uElmadam muana uEr 29muana uJesus muana uEliezer muana uJorim muana uMatthat muana uLevi, 30muana uSimeon muana uJuda muana uJoseph muana uJonam muana uEliakim, 31muana uMelea muana uMenna muana uMatthata muana uNathan muana uDavid, 32muana uJesse muana uJobed muana uBooz muana uSala muana uNaasson 33muana uAminadab muana uAdmin muana uAmi muana uEsrom muana uPhares muana uJuda, 34muana uJacob muana uIsaac muana uAbraham muana uThara muana uNachor, 35muana uSeruch muana uRagau muana uPhalek muana uEber muana uSala, 36muana uKainam muana uArphaxad muana uSem muana uNoe muana uLamek, 37muana uMathusala muana uHenok muana uJared muana uMaleleel muana uKainan, 38muana uEnos muana uSeth muana uAdam muana uNsambi.

Currently Selected:

Luc 3: PUU1992

Highlight

Copy